00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yahishuye uko u Rwanda rusaranganya ubushobozi mu butumwa bw’Ingabo z’u Rwanda

Yanditswe na IGIHE
Kuya 30 Ugushyingo 2022 saa 05:01
Yasuwe :

Perezida Paul Kagame yavuze ko mu mikoro make igihugu gifite gikoramo ibintu byinshi kandi bikomeye, birimo umusanzu mu kugarura amahoro aho yabuze, binyuze mu gusarangaya ubushobozi.

Ni ibikorwa Perezida Kagame yavuze ko bishoboka hatabayeho gutaka mu gusaba abadi inkunga, nubwo bashatse gufasha bafasha.

Mu ijambo rirerire yavuze nyuma yo kwakira indahiro z’abayobozi bakuru ba Minisiteri y’Ubuzima, Perezida Kagame yagarutse kuri iyi mikoranire hagati y’ibihugu, itandukanye n’ubutumwa bw’Umuryango w’Abibumbye butangwamo akayabo.

Yagarutse ku buryo u Rwanda rwohereje abasirikare muri Repubulika ya Centrafrique mu Ukuboza 2020, ubwo icyo gihugu cyegerezaga amatora, ariko inyeshyamba zigahaguruka zigamije kuyadobya zirimo n’umutwe uyobowe na François Bozizé wanabaye perezida w’icyo gihugu.

Yakomeje ati "Dukorana n’aba Centrafrique ku buryo byabahaye agahenge bakabona amahoro, ndetse ni yo mpamvu bashoboye kugira amatora y’ubushize, iyo tutajyayo ntabwo baba barayagize. Wenda nta n’ubwo iriya leta iba iriho cyangwa iba yaragiyeho, n’uriya mujyi wa Bangui na wo ushobora kuba utari kuba uri mu maboko yabo, uri mu maboko y’abandi bari bahanganye nabo."

Umukuru w’Igihugu yavuze ko mu butumwa bw’Umuryango w’Abibumbye intumwa z’u Rwanda zubahiriza amategeko yawo, ku buryo kohereza ingabo zizagendera ku bwumvikane bw’ibihugu byombi, byatumye ubutabazi bwihuta.

Ati "Ibyo ni twe tubigena. Iyo wigenera, ukora ibitu uko ubyumva, uko ubishaka, uko ubona bikwiye. Iyo ukorera mu bandi cyangwa ari bo bakuyobora, abo bakorauko bashaka, uko babona ibintu. Akenshi hari ubwo biba binyuranye, bitajyana."

Kugeza ubu u Rwanda rufite abasirikare muri Centrafrique, barimo aboherejwe mu butumwa bw’Umuryango w’Abibumbye n’abagiyeyo mu bwumvikane bw’ibihugu byombi.

Yakomeje ati "Twabwiye ingabo ziri muri UN gukurikira amategeko ya UN, hanyuma ingabo zacu twoherejeyo twazihaye amabwiriza zigomba gukurikiza, zikorana na leta ya Repubulika ya Centrafrique. Ibyo biratandukanye ariko ndibwira ko byuzuzanya. Ibyo nabyo bimaze igihe bigenda bifata inzira. Gusangira erega ni uburyo bwinshi, tuzi gusaranganya cyane, ni cyo kitugejeje aha."

Perezida Kagame yavuze ko Ingabo ziri muri Centrafrique mu bwumvikane bw’ibihugu byombi, usibye ko zishyurwa n’u Rwanda imishara ikajya kuri konti zabo bakaziyasanga, banasaranganya amafaranga atangwa n’Umuryango w’Abibumbye.

Yakomeje ati "Banasaranganya n’abari muri UN ihemba kurusha uko bahembwa hano abandi. Niba muri UN buri muntu yishyurwa amadolari 100, amwe aba ay’uwo wishyuwe ukorera muri UN, ikindi gice agasaranganya agaha mugezi we ukorera mu bwumvikane bw’ibihugu. Mwari mubizi? Ibyo babyita gusaraganya."

Perezida Kagame yavuze ko u Rwanda rufite ubushobozi budahambaye, ariko rubikoresha byinshi.

Yanagarutse ku butumwa bwo muri Mozambique bwoherejwemo abapolisi n’abasirikare b’u Rwanda, avuga ko nkunga y’ahandi bakoresha.

Yakomeje ati "Nta gihugu na kimwe, nta muryango n’umwe uradujha n’urumiya rwo gukoresha muri ako kazi, ni amafaranga yacu, ni amafaranga y’igihugu dukoresha. Muri bya bike dufite, tugabana n’abandi, turasangira, tukabikoresha. Hari abazafasha, hari abatubwira ko bazafasha, turategereje. Nibadufasha tuzabashimira [...] Nta n’umwe wadufashije, ndabivuga niba atari byo, ndaza kwifuza kubona uwampakanya."

"Twatanze uburyo buke dufite, ndetse dutanga n’ubuzima kuko abajya kurwana, mu ntambara nka ziriya hari abantu babigwamo. Ubwo i ukuvuga ngo mu gihugu cyacu twatanze ubuzima bw’abana bacu, gufatanya n’abana ba Mozambique tunatanga n’amikoro yacu make dufite."

Centrafrique yakomeje gushima umusazu ukomeye izi ngabo zatanze mu kugarura amahoro.

Perezida wa Centrafrique, Prof Faustin Archange Touadéra, mu Ukwakira yakiriye ku meza abasirikare 200 b’u Rwanda, boherejwe muri icyo gihugu ku bwumvikane bw’ibihugu byombi ngo bafashe mu kugarura amahoro.

Ni mu gihe mu butumwa bw’Umuryango w’Abibumbye, imibare yo muri Kamena 2022 igaragaza ko u Rwanda rufite muri Centrafrique abasirikare 1698 ari narwo rufiteyo benshi, n’abapolisi 506.

Perezida Kagame avuga ijambo nyuma yo kwakira indahiro z'abayobozi bashya kuri uyu wa Gatatu
Abayobozi bakuru b'inzego z'umutekano bitabiriye uyu muhango
Perezida Kagame yabwiraga abayobozi mu Ngoro y'Inteko Ishinga amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .