Perezida Kagame yahaye imbabazi abana bafunzwe batsinze ikizamini cya leta

Yanditswe na Philbert Girinema
Kuya 16 Mutarama 2019 saa 07:58
Yasuwe :
0 0

Perezida Kagame yahaye imbabazi abana 16 barimo abakobwa batatu, bari bafungiye muri Gereza ya Nyagatare batsinze ibizamini bya Leta bisoza amashuri abanza n’ay’icyiciro rusange.

Abahawe imbabazi bari bafungiye ibyaha bitandukanye birimo gufata ku ngufu, gusambanya umwana, gutunda no gukoresha ibiyobyabwenge n’iterabwoba.

Muri aba bana, umukuru ubarimo yavutse mu 1998 mu gihe umuto ari uwo mu 2003. Mu bakoze ikizamini mu mashuri abanza, bane baje mu cyiciro cya mbere nk’abatsinze neza abanda umunani baboneka mu cyiciro cya kabiri.

Muri bane bakoze ikizamini cy’icyiciro rusange, umwe yaje mu cyiciro cya mbere abandi batatu batsindira mu cyiciro cya kabiri.

Amakuru agera kuri IGIHE ni uko kuri uyu wa Kane aribwo bari bufungurwe mu muhango uzabera kuri Gereza ya Nyagatare, bagakomeza amasomo yabo mu mashuri asanzwe.

Umwaka ushize nabwo Perezida Kagame yahaye imbabazi abana 18 bakoze ibizamini bisoza amashuri abanza n’icyiciro rusange bagatsinda neza.

Mu bana b’abahungu 15 n’umukobwa umwe barangije amashuri abanza, umunani baje mu cyiciro cya mbere cy’abatsinze neza mu gihugu; barindwi baza mu cya kabiri na ho undi aza mu cya gatatu.

Mu bana batanu bakoze ikizamini gisoza icyiciro rusange, umwe yaje mu cyiciro cya mbere; babiri mu cya kabiri na ho abandi babiri baza mu cya kane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza