Perezida Kagame yagiranye ikiganiro kuri telefoni n’Umwami Mohammed VI wa Maroc

Yanditswe na IGIHE
Kuya 6 Ugushyingo 2018 saa 08:35
Yasuwe :
0 0

Perezida Kagame unayoboye Umuryango wa Afurika yunze Ubumwe (AU), yagiranye ikiganiro kuri telefoni n’Umwami Mohammed VI wa Maroc, amushimira amavugurura akomeje gukora muri uyu muryango ndetse banaganira ku mubano w’ibihugu byombi.

Itangazo ry’ubwami bwa Maroc rivuga ko ‘Umwami Mohammed VI, yagiranye ikiganiro kuri telefoni na Perezida Paul Kagame w’u Rwanda akaba n’umuyobozi w’Umuryango wa Afurika yunze Ubumwe’.

Ibi biganiro babigiranye mbere y’uko hatangira inama idasanzwe ya 11 y’abakuru b’ibihugu na za Guverinoma ba AU, ibera i Addis Abeba, iganira aho ibyemezo byafashwe ku mavugurura ya AU bigeze bishyirwa mu bikorwa.

Iyi nama yatangiye kuri uyu wa 5 Ugushyingo, ariko abakuru b’ibihugu na za Guverinoma bakazayitabira kuwa 17-18 Ugushyingo 2018.

Muri icyo kiganiro, Umwami Mohammed VI yashimye umuhate wa Perezida Kagame uyoboye AU, anamwizeza kumushyigikira mu cyerekezo cyo kuvugurura imikorere ya AU.

Kugira ngo AU ibashe kuba umuryango usubiza ibibazo by’abaturage, hemejwe amavugurura ndetse hashyirwaho inzego zikurikirana ishyirwa mu bikorwa ryayo, hamwe n’impuguke zitanga ibitekerezo ku ngingo zirebwaho.

Mu mavugurura ari gukorwa muri AU kandi, mu nama y’abakuru b’ibihugu yabereye mu Rwanda muri Nyakanga 2016, hemejwe ko ikigega cy’amahoro, Peace Fund, kizashyirwamo miliyoni 325$ mu 2017, akagera kuri miliyoni 400$ mu 2020.

Ni igice cya miliyari 1.2 y’amadolari ya Amerika biteganywa ko azajya akusanywa mu bihugu 55 bigize AU buri mwaka, aturutse kuri 0.2% by’umusoro w’ibitumizwa mu mahanga.

Abakuru b’ibihugu byombi kandi banaganiriye ku ngingo zikomeza gushimangira umubano w’ibihugu byombi mu nzego zitandukanye.

Mu 2016 Umwami Mohammed VI yasuye u Rwanda mu ruzinduko rwakurikiye urwo Perezida Kagame yagiriye muri Maroc muri uwo mwaka, bakaganira ku mubano w’ibihugu byombi akanamwambika umudali w’icyubahiro witiriwe Wissam Al-Mohammadi.

Ubwo yari i Kigali, amasezerano y’ubufatanye 22 hagati y’ibihugu byombi yashyizweho umukono. Harimo nk’ayo kubaka inzu ziciriritse zigera ku 5000 mu Murenge wa Ndera zizatwara miliyoni 68 z’amadolari (asaga miliyari 54 Frw), miliyoni y’ama-euro yahawe Imbuto Foundation, n’indi mishinga nko kubaka uruganda rw’imiti, ishuri ry’ikoranabuhanga n’ibindi.

Perezida Kagame ubwo yagiriraga uruzinduko muri Maroc mu 2016, agasangira n'Umwami Mohammed VI
Ubwo Perezida Kagame yasuraga Maroc muri Kamena 2016
Perezida Kagame yakira Umwami Mohammed VI i Kigali
Ibihugu byombi bifitanye umubano mwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza