Perezida Kagame yagiranye ibiganiro na Minisitiri w’Ububanyi n’Amahanga wa Sudani y’Epfo

Yanditswe na IGIHE
Kuya 9 Nzeri 2019 saa 07:04
Yasuwe :
0 0

Perezida Kagame yakiriye muri Village Urugwiro Minisitiri w’Ububanyi n’Amahanga wa Sudani y’Epfo, Awut Deng Acuil.

Ibiro by’Umukuru w’Igihugu byatangaje ibyo guhura kw’aba bombi mu butumwa bwanyujijwe ku rukuta rwa Twitter ariko ntabwo higeze hatangazwa ibyo aba bombi baganiriye.

Awut Deng Acuil yari mu Rwanda mu gihe ku rundi ruhande mu gihugu cye Riek Machar utavuga rumwe n’ubutegetsi nawe kuri uyu munsi yagiye i Juba guhura na Perezida Salva Kiir.

Kiir na Machar ibiganiro byabo bigamije kurebera hamwe uburyo amasezerano agamije amahoro hagati y’abatavuga rumwe n’ubutegetsi na leta yashyirwa mu bikorwa.

Machar yahunze igihugu muri Nyakanga 2016 ubwo ingabo ze zarwanaga n’iza Kiir. Ni inshuro ya kabiri Machar ageze i Juba kuva mu 2016 kuko yaherukagayo mu Ukwakira umwaka ushize.

Amasezerano y’amahoro yasinywe muri Nzeri 2018 i Addis Ababa, yagenaga ko impande zombi zigomba kuba zemeranyije kuri Guverinoma y’inzibacyuho muri Gicurasi uyu mwaka, ikaganisha ku matora mu gihe kitarenze amezi 30.

Igihe cy’ibanze cyo kuba yashyizwe mu bikorwa cyongereweho amezi atandatu bigeza ku wa 12 Ugushyingo, gusa haracyari ibibazo byinshi bibangamiye ishyirwa mu bikorwa ryayo by’umwihariko ibijyanye n’umutekano ndetse n’imiterere y’igisirikare.

Mbere y’amasezerano y’amahoro yo mu 2018, hari hashize imyaka itanu hari intambara hagati y’aba bayobozi bombi, yangije byinshi mu gihugu igatuma benshi bagana iy’ubuhungiro ndetse abantu bagera ku bihumbi 400 bagapfa bishwe n’imvururu hamwe n’ibyorezo.

Awut Deng Acuil wahuye na Perezida Kagame amaze iminsi 21 ari Minisitiri w’Ububanyi n’Amahanga nyuma yo gusimbura Nhial Deng Nhial. Acuil yari asanzwe ari Minisitiri w’Uburinganire.

U Rwanda rusanzwe rufasha Sudani y’Epfo mu bikorwa byo kugarura amahoro aho rufite abapolisi bari mu butumwa bwa Loni. Abo bari mu matsinda atatu, aho abiri muri ayo matsinda buri rimwe rigizwe n’abapolisi 160, baba mu murwa mukuru w’iki gihugu, Juba. Abandi bagera kuri 240 bakorera ahitwa i Malakal mu gace ka Upper Nile.

Rufiteyo kandi abasirikare nabo bari mu bikorwa byo kugarura amahoro muri iki gihugu.

Perezida Kagame yagiranye ibiganiro na Minisitiri w'Ububanyi n'Amahoro wa Sudani y'Epfo, Awut Deng Acuil
Ibi biganiro byitabiriwe n'Umunyamabanga wa Leta muri Minisitiri y'Ububanyi n'Amahanga, Olivier Nduhungirehe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza