00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yagereranyije imyitwarire ya RDC n’iy’umwana warezwe bajeyi

Yanditswe na Iradukunda Serge
Kuya 4 July 2022 saa 03:55
Yasuwe :

Perezida Paul Kagame yagaragaje ko Repubulika Iharanira Demokarasi ya Congo ifite imyitwarire isa nk’iy’umwana warezwe bajeyi, aho yiteza ibibazo ariko bikarangira iri kwiriza ivuga ko hari abantu bari kuyihohotera.

Aha Perezida Kagame yagarukaga ku birego bya RDC imaze igihe ishinja u Rwanda gushyigikira Umutwe wa M23. Ni mu kiganiro yagiranye n’Ikigo cy’Igihugu cy’itangazamakuru kuri uyu wa Mbere tariki 4 Nyakanga 2022.

Ku bijyanye n’ikibazo cya M23 wubuye imirwano muri RDC, Leta y’iki gihugu ikaba ishinja u Rwanda kuwushyigikira, Perezida Kagame yavuze ko iki kibazo gihera mu mateka ya kera.

Yavuze ko mu gukemura ikibazo cya M23 mu 2012 hakozwe ikosa ryo kwibwira ko umuti wacyo uzanyuzwa mu nzira za gisirikare mu gihe u Rwanda rwagaragazaga ko igikwiye ari ukwitabaza inzira za politiki.

Yavuze ko bidakwiye ko abantu bamwe bafatwa nk’aho atari abaturage b’igihugu kuko n’iyo bibaye bituma abantu bashaka guharanira uburenganzira bwabo. Yagaragaje ko kuvuga ko Abanye-Congo bavuga Ikinyarwanda ari Abanyarwanda ari ukwibeshya.

Perezida Kagame yavuze ko ubwo Félix Antoine Tshisekedi yatorwaga, ikibazo cya M23 bagiye bakiganiraho cyane ku buryo hari n’intumwa ze zagiye ziza mu Rwanda kureba abarwanyi b’uyu mutwe bari barahahungiye bakizezwa ko bagiye gukemura ikibazo cyabo.

Yavuze ko ubwo M23 yajyaga kubura imirwano, u Rwanda rwari rwaraburiye Congo rushingiye ku makuru rwari rufite mu bijyanye n’ubutasi.

Ni nk’umwana warezwe bajeyi

Perezida Kagame yavuze ko ibirego RDC ishinja u Rwanda byo gushyigikira Umutwe wa M23 nta shingiro bifite ahubwo iki gihugu gishyigikira FDLR ihungabanya umutekano w’u Rwanda.

Ati “Ntabwo ari byo, nta shingiro bifite ahubwo RDC ishyigikira FDLR kandi ikibabaje ni uko Monusco, ingabo za Loni ziri muri Congo zibizi. Ni na ko byagenze ijya kurasa ku butaka bw’u Rwanda. Hari ibyagiye biba kuva mu 2019 ubwo FDLR yinjiraga ku butaka bwacu mu Kinigi ariko ikaza guhashywa n’ingabo zacu, yari yaturutse muri RDC ndetse barahawe intwaro na RDC.”

Yakomeje avuga ko nyuma y’ibyo bitero hongeye kubaho ibikorwa byo kurasa ku butaka bw’u Rwanda ubugira gatatu.

Ati “Nyuma y’ibyo habayeho kurasa ku butaka bw’u Rwanda ubugira gatatu hakoreshejwe intwaro ziremereye, bishe abantu, basenya ibintu. Ibi byose twabiganiriye na RDC, ibyo ni byo navuga. Ku rundi ruhande kuki twagira uruhare mu bibazo biri kubera muri RDC muri ubwo buryo? Ariko bakoze ibishoboka byose ngo badushyire mu bibazo byabo.”

Perezida Kagame yakomeje avuga ko mu bihe bitandukanye Congo yagiye yitwara nk’umwana warezwe bajeyi.

Ati “Ikindi kibazo ni uko Congo kuva mu myaka yashize kugeza ejo bundi bagenda bitwara nk’umwana warezwe bajeyi, bateza ibibazo bikarangira biriza, basakuza bavuga ngo hari umuntu uri kubakorera ibintu bibi kandi bisa nka hari igice cy’Isi kigenda kibogamira kuri RDC ndetse no mu gihe aribo bari mu makosa.”

Perezida Kagame yavuze ko nta kibazo u Rwanda rutewe no kuba RDC yaragaragaje ko idashaka ko ingabo zarwo zizaba mu zigize Umutwe w’Ingabo wa EAC uzajya kugarura amahoro mu Burasirazuba bw’iki gihugu.

Yavuze ko icyo u Rwanda rwifuza ari uko ingabo zose zizajyayo zizagira uruhare mu gukemura burundu ikibazo cy’umutekano kimaze igihe mu Burasirazuba bwa RDC kandi zigatanga umuti uzatuma u Rwanda rutongera kugabwaho ibitero biturutse muri icyo gihugu.

Kuva mu ntangiriro z’uyu mwaka M23 yubura imirwano, Leta ya RDC yongeye kubura ibirego by’uko uyu mutwe ushyigikirwa n’u Rwanda.

Mu ruzindiko Perezida Félix Antoine Tshisekedi yagiriye muri Congo Brazzaville muri Kamena 2022 yavuze ko icyo ashyize imbere ari ugushaka amahoro, kubaka ubucuti n’ubufatanye ariko ibi ntawe ukwiye kubibona nk’intege nke cyangwa ngo bigire uwo biha urwaho rwo gushotora igihugu cye.

Ashize amanga, Tshisekedi yahamije ko nta gushidikanya afite ku kuba u Rwanda rufasha M23 ngo ishotore igihugu cye ariko yifuza ko igihugu cye kibana neza n’abaturanyi bacyo.

Ati "Ndizera ko u Rwanda rwize isomo kuko uyu munsi biragaragara ko nta gushidikanya u Rwanda rufasha M23 ngo ize gushotora RDC."

Tshisekedi yakomeje avuga uburyo mu 2013 M23 yatsinzwe ndetse n’intwaro zayo zigafatwa ariko uyu munsi ikaba yarongeye kubura umutwe ifite izindi, ngo bisobanuye ko hari aho yazikuye.

Perezida Kagame yagereranyije imyitwarire ya Repubulika Iharanira Demokarasi ya Congo n’iy’umwana warezwe bajeyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .