Perezida Kagame yageneye miliyoni 10 Frw buri wese wagizwe umurinzi w’igihango

Yanditswe na Rabbi Malo Umucunguzi
Kuya 25 Ukwakira 2019 saa 08:31
Yasuwe :
0 0

Perezida Paul Kagame yatangaje ko buri muntu wese wagizwe umurinzi w’igihango ku rwego rw’igihugu azagenerwa miliyoni 10 Frw, nk’ishimwe rituma bakomeza imirimo yabo ya buri munsi.

Perezida Kagame yabitangaje kuri uyu wa Gatanu ubwo yasozaga Ihuriro ngarukamwaka rya 12 ry’Umuryango Unity Club Intwararumuri.

Ni nyuma y’uko Mukarutamu Daphrose, Gasore Serge na Carl Wilkens bari bamaze gushyikirizwa Ishimwe ry’Ubumwe ry’Abarinzi b’igihango.

Yagize ati "Aba bantu bagiye baha ibyemezo by’ishimwe kandi byiza bishimishije, n’uriya mudali uhoraho, kuba uwufite ni byiza ariko ndagira ngo kubera ko hari ibikorwa bakora bindi, dushobore kuba twabashimira no mu bundi buryo bwo kubaha amikoro. Nagiye mbona abo baha igihembo cyitiriwe Nobel bashyiraho za sheki z’amadolari, biba ari ukugira ngo bashobore gukomeza gukora akazi kabo neza, kari muri iyo nzira."

"Ngira ngo mumaze gutanga ibihembo by’ubu buryo, bahoze bambwira ko bamaze kugera nka 40 guhera mu 2016, ariko ndahera ku b’uyu munsi, n’abandi b’icyo gihe nabo turashaka uko tubagenza. Kuri abo 40, buri umwe tuzagenda tumuha miliyoni 10 Frw. Turahera ku b’uyu munsi, n’abandi banyuze ahangaha muzabibuke mubashyire kuri urwo rutonde."

Gasore Serge wahawe umudali w’igihango kuri uyu wa Gatanu akaba n’umwe mu bagiye guherwaho mu gutanga iri shimwe rya miliyoni 10 Frw, yabwiye IGIHE ko ari ibyishimo bikomeye, kubona umukuru w’igihugu abazirikana.

Ati “Birashimishije cyane, biba bigaragaza ko ibyo ukora bifite icyo bivuze, kuko umuntu iyo ajya kugutera inkunga, nka buriya Nyakubahwa Perezida wa Repubulika ni uko ibyo dukora abyizera ko biriho kandi bifite akamaro. Ni ibintu rero bitera umuntu imbaraga nyinshi cyane, ubu rwose zikubye nk’inshuro ijana.”

Gasore yavuze ko kongera miliyoni 10 Frw mu mushinga we, biratuma arushaho kongerera imbaraga mu bikorwa bikemura ibibazo by’abaturage.

Ati “Ibikorwa twari dukeneyemo ubushobozi harimo nko gushakira abiga kudoda aho bakorera, hari abaturage benshi babikunda ariko twari twarabuze icyumba bazajya bakoreramo, ubwo rero duhise tubona ubushobozi, tuzahita duheraho.”

Ni ukuvuga ko nibura mu bantu basaga 40, iki gikorwa kizatwara miliyoni zirenga 400 Frw.

Igikorwa cyo guhemba Abarinzi b’igihango gitegurwa na Unity Club Intwararumuri ku bufatanye na Komisiyo y’Igihugu y’Ubumwe n’Ubwiyunge, hagamijwe kumenya no kumenyekanisha abakoze cyangwa se abagikora ibikorwa by’indashyikirwa mu bumwe n’ubwiyunge bw’Abanyarwanda.

Visi Perezida wa Kabiri wa Unity Club Kayisire Marie Solange ashyikiriza ishimwe Mukarutamu, bari kumwe na Perezida wa Komisiyo y'Ubumwe n'ubwiyunge, Rucyahana John
Mukarutamu nyuma yo kwakira ishimwe rye
Visi Perezida wa mbere Dr Monique Nsanzabaganwa, ashyikiriza ishimwe Gasore Serge
Rucyahana yambika umudali Gasore
Gasore Serge yashimiwe uruhare yagize mu komora ibikomere bya Jenoside abatuye i Ntarama mu Bugesera
Dr Nsanzabaganwa ashyikiriza ishimwe Carl Wilkens
Musenyeri Rucyahana yambika umudali Wilkens
Perezida Kagame mu ifoto y'urwibutso hamwe n'abarinzi b'igihango
Perezida Kagame yashimye ibikorwa by'Abarinzi b'igihango
Iri huriro ngarukamwaka rya Unity Club ryabereye muri Kigali Convention Centre

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza