Perezida Kagame yagarutse ku nyungu zizava mu ishyirwa mu bikorwa ry’isoko rusange rya Afurika rigiye gutangira

Yanditswe na Uwimana Abraham
Kuya 5 Ukuboza 2020 saa 11:30
Yasuwe :
0 0

Perezida wa Repubulika Paul Kagame yavuze ko ishyirwa mu bikorwa ry’isoko rusange rya Afurika muri iki gihe, rizafasha uyu mugabane muri byinshi, harimo kugira uruhare mu kuzahura ubukungu bwazahajwe na Coronavirus ndetse no gufasha Afurika kurushaho kwigira no kubaka ubushobozi bwatuma ihatana ku ruhando mpuzamahanga.

Ibi Perezida Kagame yabitangaje ku wa 4 Ukuboza 2020, mu nama yiga ku bukungu n’ishyirwaho ry’isoko rusange rya Afurika (AfcFTA Business Forum), ni inama yabaye hifashishijwe uburyo bw’ikoranabuhanga.

Perezida Kagame yavuze ko Covid-19 yadindije itangira ry’ishyirwa mu bikorwa ry’isoko rusange rya Afurika, gusa na none ko iki gihe ari bwo rikenewe gushyirwa mu bikorwa cyane kugira ngo rigire uruhare mu kuzahura ubukungu.

Yagize ati “Imyaka ibiri ishize twasinye amasezerano adasanzwe, dufatanyije twanditse amateka mashya mu nkuru y’ubufatanye bwa Afurika. Icyorezo cya Covid-19 cyadindije itangira ry’ubucuruzi, ariko dukwiye kuguma ku ntego.”

Yongeyeho ati “Iki gikorwa duhuriyeho ubu nibwo gikenewe cyane kurusha mbere, kugira ngo twongere kubaka ubukungu bwacu, dukomeze gushyira imbaraga mu gukumira ibibazo by’ahazaza, ni uko rero mureke tubikore. Guhahirana hagati yacu, bizabyarira ibihugu byacu inyungu zihuriweho, ndetse binadufashe kubaka ubushobozi bwadufasha guhatana ku ruhando mpuzamahanga.”

Perezida Kagame yasabye abikorera kugaragaza uruhare rwabo kugira ngo iki gikorwa kizabashe gutanga umusaruro kitezweho.

Yagize ati “Muri Afurika tuzatangira gukora ubucuruzi hagati yacu mu byumweru bike biri imbere, dukeneye inzego z’abikorera kugaragaza uruhare rwabo, dukwiye gukorera hamwe, kugira ngo twizere ko ibikenewe byose kugira ngo iyi gahunda igere ku ntsinzi yayo, biri mu buryo.”

Yongeho ati “Ikindi kandi, dukwiye gukomeza gutangariza abaturage bacu, inyungu ziri mu kuba Afurika yahahirana mu buryo bworohejwe, cyane cyane urubyiruko, tukarukangurira kugumya kugira uruhare mu cyiciro gikurikiraho cy’ukwishyirahamwe kwa Afurika.”

Amasezerano ashyiraho isoko rusange rya Afurika yasinyiwe i Kigali muri Werurwe 2018 biteganywa ko azahuriza hamwe ibihugu bigize uyu mugabane ku isoko ry’abaturage bagera kuri miliyari 1,3 batuye Afurika n’ibihugu 55 bifite umusaruro mbumbe wa miliyari 3400 z’amadolari ya Amerika.

Azazamura ubucuruzi bukorwa hagati y’ibihugu bya Afurika busanzwe kuri 16%, igipimo kiri hasi cyane ugereranyije na 60% ibyo bihugu bikorana n’u Burayi na 50% bikorana Aziya.

Ibihugu 54 muri 55 bigize Umuryango wa Afurika Yunze ubumwe byasinye amasezerano ashyiraho isoko rusange rya Afurika, mu gihe 34 aribyo bimaze kuyemeza burundu.

Ibikorwa byo guhahirana muri iri soko byari byitezwe ko bitangira gushyirwa mu bikorwa ku ya 1 Nyakanga 2020 ariko ntibyakunze kubera ibibazo byatewe n’icyorezo cya Coronavirus.

Kuri ubu byamaze kwemezwa ko iri soko rizatangira ku wa 1 Mutarama 2021, aho ibicuruzwa byakorewe kuri uyu mugabane bizaba bifite amahirwe yo gucuruzwa ku isoko ry’abaturage basaga miliyari batuye uyu mugabane, nta bisitaza bibangamira ubucuruzi nk’imisoro byatumaga umugabane wa Afurika uba isoko ry’iyindi migabane kurusha uko ari isoko ry’ibiwukorerwamo.

Icyakora mbere y’uko amasezerano atangira gushyirwa mu bikorwa, hari ibigekenewe kunozwa ngo bitazabangamira ubucuruzi ubwo igihe kizaba cyageze.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .