00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yashimangiye ko u Rwanda rudashobora kwihanganira iterabwoba

Yanditswe na Iradukunda Serge
Kuya 18 Mutarama 2023 saa 10:36
Yasuwe :

Perezida Paul Kagame yagaragaje ko imwe mu mpamvu u Rwanda rutihanganira ibikorwa by’iterabwoba ndetse rukihutira gutanga umusanzu aho ryagaragaye, ari uko iki kibazo kirenga imipaka kandi kikagira ingaruka ku bantu benshi bo hirya no hino ku Isi.

Ibi Perezida Kagame yabigarutseho mu Nama Nyafurika yiga ku mahoro yateraniye i Nouakchott muri Mauritanie ku wa 17 Mutarama mu 2023.

Iyi nama izarangira ku wa 19 Mutarama mu 2023, yahurije hamwe abayobozi b’ibihugu bitandukanye byo ku Mugabane wa Afurika, abanyamadini ndetse n’abahagarariye Umuryango w’Abibumbye.

Iyi nama iri kuba ku nshuro ya gatatu igamije kurebera hamwe ingamba zafatwa mu kurandura amakimbirane, guhangana n’ikibazo cy’abimukira, guteza imbere amahoro no kwimakaza iterambere ku mugabane wa Afurika.

Iy’uyu mwaka yahawe insanganyamatsiko igira iti "Twese twinjirane mu mahoro", igamije kurebera hamwe uko muri Afurika hakumirwa ibikorwa by’iterabwoba n’amakimbirane ashingiye ku madini.

Perezida Kagame yagaragarije abari muri iyi nama ko amahoro ari inkingi ya mwamba mu iterambere.

Ati "Amahoro ni urutirigongo rw’iterambere rirambye, imiyoborere mibi ihungabanya ituze."

Yakomeje asangiza abari muri iyi nama uko u Rwanda rwabashije kubaka amahoro nyuma ya Jenoside yakorewe Abatutsi mu 1994.

Ati "Ubwo u Rwanda rwari rutangiye urugendo rw’impinduka nyuma ya Jenoside yakorewe Abatutsi, kubaka inzego zihamye mu kugarura ubumwe n’icyizere byari mu ntego zacu z’ibanze. Ibi byatumye igihugu cyacu kigira umusingi ukomeye mu guharanira umutekano n’iterambere birambye."

Perezida Kagame yagaragaje ko kugera ku mahoro ari ikintu abantu bagomba guharanira bafatanyije, cyane cyane mu bikorwa byo kurwanya iterabwoba kuko ari ikibazo gihungabanya Isi yose.

Ati "Iterabwoba n’ubugizi bwa nabi bushingiye ku buhezanguni biri kurenga imbibi z’ibihugu kandi bigakwirakwira byihuse, ibintu bigira ingaruka ku baturage bo hirya no hino ku Isi na Afurika idasigaye."

Yakomeje avuga ko iyi ari yo mpamvu "nk’igihugu, twahisemo gutanga umusanzu mu bikorwa byo kurwanya iterabwoba no kwiyubaka nyuma y’intambara kuri uyu mugabane wacu."

Yavuze ko mu gihe abantu bafite amahoro, babona uko bahangana n’ibindi bibazo byugarije Isi birimo ihindagurika ry’ibihe, icy’abimukira n’inzara.

Ati "Uyu ni umwenda tubereyemo urubyiruko rwacu n’ahazaza h’umugabane wacu, icy’ingenzi ni ugushyira ku ruhande ibidutanya, buri umwe akumva undi ubundi tugakorera hamwe nk’abafatanyabikorwa."

U Rwanda ni kimwe mu bihugu bitanga umusanzu ukomeye mu bikorwa byo kugarura amahoro hirya no hino ku Isi. Rufite ingabo n’abapolisi bari mu butumwa bw’Umuryango w’Abibumbye bwo kugarura amahoro muri Centrafrique na Sudani y’Epfo.

U Rwanda kandi rufite ingabo rwohereje muri Mozambique mu bikorwa byo kurwanya iterabwoba mu Ntara ya Cabo Delgado kandi zabashije kugarura ituze ndetse abaturage batangira gusubira mu byabo.

Perezida Paul Kagame yagaragaje ko u Rwanda rudashobora kwihanganira iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .