Perezida Kagame yagaragaje impamvu Afurika ikwiriye kwibikira amakuru y’ikoranabuhanga

Yanditswe na Ferdinand Maniraguha
Kuya 18 Ugushyingo 2018 saa 01:43
Yasuwe :
0 0

Perezida Paul Kagame yavuze ko amakuru y’ikoranabuhanga ajyanye n’imyirondoro n’amabanga by’abanyafurika akwiriye kubikwa kuri uwo mugabane kugira ngo hirindwe abashobora kuyakoresha nabi.

Yabitangaje mu gitondo cyo kuri iki Cyumweru, ubwo afatanyije na Minisitiri w’Intebe wa Ethiopia, Dr Abiy Ahmed, bayoboraga umusangiro wabereyemo inama yiga ku mutekano w’amakuru y’ikoranabuhanga nk’imwe mu nzira zizageza Afurika ku cyerecyezo 2030 na 2063.

Perezida Kagame witabiriye inteko y’iminsi ibiri idasanzwe y’Umuryango wa Afurika Yunze Ubumwe abereye umuyobozi, yavuze ko kubika amakuru y’abanyafurika hanze bifite ingaruka.

Yavuze ko Afurika idashobora kubyaza umusaruro ikoranabuhanga mu gihe nta burenganzira ifite ku makuru y’ikoranabuhanga ayireba.

Ati “Ayo makuru akwiriye kubikwa neza mu buryo bwizewe, butuma atavogerwa kandi mu buryo abagizi ba nabi batayageraho.”

Yakomeje agira ati “Ubujura bw’amakuru y’ikoranabuhanga muri sosiyete zikomeye bumaze iminsi buba, bugaragaza ko hakenewe uburyo butuma uburenganzira ku makuru y’umuntu bujya mu maboko ya ba nyira yo, aho kuba mu maboko y’abakoze iryo koranabuhanga.”

Perezida Kagame yavuze ko isoko rusange rigiye gushyirwaho muri Afurika, ryarushaho gutanga umusaruro haramutse habayeho guhahirana mu buryo bw’ikoranabuhanga.

Icyakora, yagaragaje ibyo bisaba sosiyete z’ikoranabuhanga muri Afurika gukora porogaramu, utwuma tubika amakuru n’ibindi byose bikenerwa kugira ngo amakuru ya Afurika abikwe kuri uwo mugabane.

Ati “Mfite icyizere ko dushobora kwikorera no gukurikirana ibyo bintu dukoresheje imikorere ya kinyafurika na sosiyete zo muri Afurika.”

Yavuze ko n’amategeko agenga imikoreshereze y’amakuru y’ikoranabuhanga akwiriye guhinduka, hagashyirwaho ahuriweho ku mugabane wose.

Yatanze urugero rw’u Buhinde rugeze kure mu kwiteza imbere kubera kwibikira amakuru yabwo y’ikoranabuhanga, agaragaza ko na Afurika bishoboka.

Menshi mu makuru y’ikoranabuhanga y’ibihugu bya Afurika abitse ku mugabane w’u Burayi cyangwa Amerika.

Ubushakashatsi bw’Ikigo nyarwanda mu ikoranabuhanga (Ricta), umwaka ushize bwagaragaje ko imbuga zirenga 54 % zikoresha ikirango cy’u Rwanda ‘.rw’ zibika amakuru yazo muri Amerika ya Ruguru, 18% zikoresha ‘.co.rw’ ziyabika mu Rwanda.

Kuba amakuru y’ikoranabuhanga abitswe aho ba nyirayo bari, bituma byihuta kuyabona, kuba nta kibazo cyo kuyabona igihe internet cyangwa imiyoboro byagize ikibazo, kuba bigora abajura kuyageraho n’ibindi.

Umwaka ushize ubujura bwifashisha ikoranabuhanga bwahombeje Isi miliyari zigera 600 z’amadolari. Byitezwe ko nihadafatwa ingamba zikomeye buzaba bumaze guhombya Isi tiliyari esheshatu mu 2021.

Perezida Kagame na Minisitiri w'Intebe wa Ethiopia, Abiy Ahmed

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza