Perezida Kagame yagaragaje icyafasha Afurika kurenga gutumiza ibiribwa byinshi mu mahanga

Yanditswe na Rabbi Malo Umucunguzi
Kuya 11 Nzeri 2020 saa 08:52
Yasuwe :
0 0

Perezida Paul Kagame yagaragaje ko kongerera agaciro umusaruro w’ubuhinzi no gukorana ubucuruzi hagati y’Abanyafurika, ari byo byatuma uyu mugabane urenga gutumiza ibiribwa byinshi mu mahanga, mu gihe wifitemo ubushobozi bukenewe mu bijyanye n’umusaruro w’ibiribwa.

Perezida Kagame yabigarutseho mu nama nyafurika yiga ku buhinzi, AGRF. Yagarutse ku buryo Afurika itumiza hanze ibiribwa byinshi, aho imibare iheruka yerekanaga ko buri mwaka ikoresha miliyari $35 itumiza ibiribwa mu yindi migabane, mu gihe yihariye nibura 60% by’ubutaka buhingwa ku Isi.

Perezida Kagame yagaragaje ko kubyaza umusaruro ubuhinzi bisaba kongera umusaruro no kuwongerera agaciro, kandi kubigeraho bisaba gushora imari mu ikoranabuhanga rigezweho, ririmo imishinga yo kuhira n’imbuto z’indobanure, kugira amasoko n’uburyo bwo gukwirakwiza umusaruro.

Yavuze ko bijyanye n’uburyo Afurika ari umugabane ufite imijyi irimo gutera imbere byihuse kurusha ahandi ku Isi, ikeneye no kujyanisha n’ingano y’ibiribwa, kandi bikaboneka ku biciro bibereye buri wese mu mijyi.

Perezida Kagame yavuze ko mu gihe Afurika irimo kubaka isoko rusange rihuriweho rya Afurika, ayo akwiye gufatwa nk’amahirwe akomeye.

Ati “Impamvu rukumbi yatumye Afurika ikomeza gutumiza hanze hanze y’umugabane ingano nini y’ibiribwa, ni ukuba bisa n’aho kongerera agaciro umusaruro bitabaye ibyihutirwa kimwe no gukorana ubucuruzi hagati yacu. Ibi byatangiye guhinduka, ariko biri mu maboko y’urubyiruko runahagarariwe hano, ngo rubyaze umusaruro amahirwe rufite, ngo ruhindure bifatika ubucuruzi bw’ibiribwa muri Afurika.”

Perezida Kagame yavuze ko hari icyizere ko urubyiruko rwiteguye gufata izo nshingano.

Mu gihe ibihugu bikomeje guhangana n’icyorezo cya COVID-19 cyahagaritse ibikorwa byinshi by’ubucuruzi, Perezida Kagame yavuze ko urwego rw’ubuhinzi rufite uruhare rukomeye ruzagira mu gusubiza ibintu ku murongo.

Yakomeje ati “Kubera ko niyo soko y’imibereho kuri bibiri bya gatatu by’Abanyafurika bose, ariko nyine 100% buri wese akenera ibiribwa.”

Yavuze ko mu myaka myinshi hagiye havugwa ko ubushobozi muri Afurika buhari, ariko bigasa n’ibirangirira aho, igihe kikaba kigeze ko abantu bave mu magambo y’ubushobozi buhari bagaragaze ibikorwa bishoboka.

Ati “Icyo nasaba urubyiruko by’umwihariko, ni ukugira bene iyo imyumvire yo gukora ibintu bikava ahantu hamwe bikagera ahandi, ku buryo ushobora kubona ko ari ibi byakugejeje hariya, ni ibi wari ukeneye gukora kandi warabikoze, kugira ngo tudakomeza kwirukanka mu ruziga, nta mpamvu n’imwe yasobanura impamvu Afurika yakomeje kuguma aho iri.”

“Nyamara ku rundi ruhande tukavuga ibyo dufite nk’umutungo kamere, abaturage bacu, urubyiruko, abafite ubumenyi mu ikoreshwa ry’ikoranabuhanga, abantu ubu bafite ubumenyi mu bintu binyuranye, ikibazo ni icyo dufite.”

Yabigereranyije n’indege icanye moteri iri mu muhanda wayo, aho iba igomba kuguruka igafata ikirere, ntigume kuwuzengurukamo.

Umuyobozi w’Icyubahiro w’Ihuriro Nyafurika ry’Ubuhinzi, Hailemariam Desalegn, yagaragaje ko bijyanye n’uburyo imijyi irimo gutera imbere, abantu bakwiye kubibona nk’amahirwe aho kuba byaba imbogamizi mu bijyanye n’ubuhinzi.

Ati “Mu 2030, nibura 50% by’abaturage ba Afurika bazaba batuye mu mijyi. Ibi ku ruhande rumwe ni imbogamizi, ku rundi ni amahirwe. Nka AGRF twafashe iki cyumwru ngo dushishikarize za guverinoma, abakora ubucuruzi n’abahinzi, kubona ibi nk’amahirwe yo guteza imbere ibyaro byo muri Afurika, kuzamura imibereho y’abahinzi n’abaturage bo mu byaro."

Iyi nama nyafurika yiga ku buhinzi yitabiriwe n’abantu bagera ku 10 000, baturuka mu bihugu 150. Yabaye mu gihe gikomeye cya Coronavirus, ku buryo benshi bahura mu ikoranabuhanga, bake cyane nibo bari muri Kigali Convention Centre.

Umuyobozi w’Icyubahiro w’Ihuriro Nyafurika ry’Ubuhinzi, Hailemariam Desalegn, yagaragaje ko bijyanye n’uburyo imijyi irimo gutera imbere, abantu bakwiye kubibona nk’amahirwe aho kuba byaba imbogamizi mu bijyanye n’ubuhinzi
Perezida Kagame yasabye urubyiruko kubyaza umusaruro amahirwe ari mu buhinzi
Perezida Kagame yitabiriye inama mu buryo bw'ikoranabuhanga
Minisitiri w'Intebe wa Ethiopia, Dr Abiy Ahmed, yasangije ibindi bihugu ubunararibonye bw'igihugu cye mu buhinzi
Perezida Kagame yakurikiye imirimo y'inama hakoreshejwe ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .