00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yaganiriye na mugenzi we William Ruto ku bibazo byo mu karere

Yanditswe na IGIHE
Kuya 17 May 2024 saa 07:17
Yasuwe :

Perezida Kagame Paul yaganiriye na mugenzi we wa Kenya William Ruto uri mu Rwanda aho yitabiriye inama ya Africa CEO Forum iri kubera i Kigali, baganira ku mubano usanzwe hagati y’ibihugu byombi ndetse n’ibibazo biri mu karere.

Perezida William Ruto ntiyahwemye kugaragaza ubushake mu gushyikira ibiganiro bigamije gushakira umuti ibibazo biri mu karere by’umwihariko ibya Repubulika Iharanira Demokarasi ya Congo n’u Rwanda, ndetse n’iyubahirizwa ry’amasezerano ya Luanda n’aya Nairobi agamije gukemura ibibazo byo mu Burasirazuba bwa RDC.

Inama ya Africa CEO Forum, uyu Mukuru w’Igihugu n’abandi bitabiriye, iri kubera mu Rwanda ku nshuro ya kabiri kuko yaherukaga kuhabera mu 2019. Iyi nama ngari yitabirwa n’abayobozi mu nzego z’abikorera muri Afurika ndetse n’abayobozi mu nzego zitandukanye.

Umubano w’u Rwanda na Kenya umaze gushinga imizi bishingiye ku bikorwa bihuza abaturage b’ibihugu byombi.

Muri Mata 2023 Perezida Ruto yagiriye uruzinduko rw’akazi mu Rwanda, hasinywa amasezerano ari mu ngeri zirimo ubufatanye mu bijyanye n’amagororero, ajyanye n’amahugurwa mu bya dipolomasi, ajyanye n’ikoranabuhanga, ajyanye n’ubuzima, ajyanye n’urubyiruko n’ayo guteza imbere amakoperative.

Ishoramari ry’Abanya-Kenya rigaragara muri serivisi zitandukanye zirimo uburezi, ubuvuzi, amabanki n’ibindi byinshi.

Nko mu burezi, Kenya ifite Kaminuza ya Mount Kenya, mu itangazamakuru hari ibigo bikomeye nk’ibinyamakuru nka Rwanda Today, The East African, Royal FM na Kiss FM.

Kugeza ubu urwego rw’amabanki mu Rwanda rwiganjemo ishoramari ry’abanya-Kenya, aho bashoye imari muri BPR Rwanda Plc ndetse baherutse kugura iyari Cogebanque.

Izindi banki zisanzwe mu Rwanda zifite inkomoko muri Kenya harimo nka Guaranty Trust Bank Rwanda Plc yihuje na Fina Bank mu 2013 na NCBA Bank Rwanda Plc nyuma yo kwihuza kwa CBA na Crane Bank mu 2018.

Hari ibindi bigo nka Britam bitanga serivisi z’ubwishingizi ndetse mbere y’uko UAP igurwa na Old Mutual nayo yari ishoramari ry’Abanyakenya mu Rwanda. Mu bigo by’ubukerarugendo hari Serena Hotel n’ibindi.

Umubano w'u Rwanda na Kenya umaze gushinga imizi mu nzego zitandukanye
Perezida Kagame yagiranye ibiganiro na mugenzi we William Ruto uri mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .