Perezida Kagame yaganiriye n’intumwa za RDC ku gushimangira umubano w’ibihugu byombi

Yanditswe na IGIHE
Kuya 7 Ugushyingo 2020 saa 07:07
Yasuwe :
0 0

Perezida w’u Rwanda, Paul Kagame yakiriye mu biro bye Itsinda riturutse mu Repubulika Iharanira Demokarasi ya Congo rimuzaniye ubutumwa bwa Perezida w’iki gihugu Félix Tshisekedi.

Ibiro by’Umukuru w’Igihugu bibinyujije kuri Twitter byatangaje ko ibiganiro bya Perezida Kagame n’iri tsinda byibanze ku buryo bwo kurushaho kunoza ubufatanye bw’ibihugu byombi.

Iri tsinda kandi ryagize umwanya wo kugaragariza Perezida Kagame uko politike yifashe muri Repubulika Iharanira Demokarasi ya Congo.

Perezida Kagame na we yabwiye iri tsinda ko ashyigikiye Perezida Tshisekedi mu rugendo arimo rw’ibiganiro bya politiki bigamije gushaka ibisubizo ku bibazo bya politiki mu gihugu cye.

Iri tsinda rigendereye Perezida Kagame, nyuma y’igihe gito yitabiriye inama y’Abakuru b’Ibihugu byo mu Karere yaganiriwemo ibibazo by’umutekano n’ibijyanye n’ubufatanye mu iterambere n’ubundi yari yateguwe bigizwemo uruhare rukomeye na Perezida Félix Tshisekedi.

Kuva Perezida Félix Tshisekedi yatorerwa kuyobora Repubulika Iharanira Demokarasi ya Congo mu 2019, yagaragaje ubushake bwo kunoza umubano hagati y’igihugu cye n’u Rwanda ndetse no gufatanyiriza hamwe kugira ngo ibihugu byombi n’akarere muri rusange bigire umutekano, bitandukanye n’uwo yasimbuye Joseph Kabila.

Umuhate wo gushaka amahoro mu karere wa Tshisekedi wanagaragajwe n’uburyo akijya ku butegetsi yikije cyane ku guhashya imitwe yitwaje intwaro ibarizwa mu Burasirazuba bw’igihugu cye irimo FDLR n’indi.

Benshi mu bari abarwanyi bayo bakijweho umuriro barafatwa, abandi baricwa ku buryo abasigaye nabo ari mbarwa. Abagiye bazanwa mu Rwanda bavuye muri iyi mitwe bagiye bagaragaza ko kuva Tshisekedi yajya ku butegetsi ibintu byahise bihinduka.

Muri Nyakanga, Urwego rw’Igihugu rushinzwe Ubugenzacyaha, RIB, rweretse itangazamakuru abarwanyi 57 bafatiwe muri ibi bitero by’ingabo za RDC ku mitwe yitwaje intwaro. Muri bo harimo abajenerali batanu, aba-colonel batatu, ba lieutenant Colonel babiri, ba kapiteni n’abandi basirikare bato.

Ubu bushake bw’ubuyobozi bwa Congo burangajwe imbere na Perezida Tshisekedi bwashimwe na Leta y’u Rwanda. Muri Mutarama mu kiganiro Minisitiri w’Ububanyi n’amahanga w’u Rwanda, Dr Vincent Biruta yagiranye n’itangazamakuru.

Minisitiri Dr Biruta yashimye uruhare rw’ubuyobozi bwa RDC mu guhashya imitwe yitwaje intwaro ibarizwa mu Burasirazuba bwa RDC irimo na bamwe mu bagize uruhare muri Jenoside yakorewe Abatutsi.

Ubu bushake bwatumye muri Nzeri 2019 uwari Umuyobozi wa FDLR ushinzwe ibya gisirikare, Gen Mudacumura Sylvestre yicwa, aguye mu mirwano bagabweho n’ingabo za Congo. Nyuma ye yagiye akurikirwa n’abandi benshi bari mu bayobozi bakomeye b’uyu mutwe w’iterabwoba.

Uretse ibijyanye na Politike kugeza ubu n’ubucuruzi hagati y’u Rwanda na Congo bwifashe neza cyane ko Repubulika Iharanira Demokarasi ya Congo ari rimwe mu masoko akomeye y’ibicuruzwa bituruka mu Rwanda, kandi agaciro k’ubuhahirane hagati y’impande zombi kagenda kiyongera umwaka ku wundi.

Agaciro k’ibicuruzwa u Rwanda rwoherezaga muri RDC kavuye kuri miliyoni 109.3$,kariho mu 2012 kagera kuri miliyoni 376,71$ mu 2019, biturutse ku bushake ibihugu byombi bigenda bishyira mu buhahirane.

Perezida Kagame yakiriye iri tsinda riturutse muri RDC bagirana ibiganiro bigamije gushimangira umubano hagati y'ibihugu byombi
Izi ntumwa zagejeje kuri Perezida Kagame ubutumwa ryahawe na Mugenzi we wa RDC, Perezida Tshisekedi
Perezida Kagame yagaragarije iri tsinda ko ashyigikiye ibiri gukorwa na Tshisekedi hagamijwe gushakira ibisubizo by'ibibazo RDC igifite uyu munsi
Perezida Kagame yashimye uburyo umubano w'u Rwanda na RDC ukomeje kugenda neza ku buyobozi bwa Tshisekedi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .