Perezida Kagame ntameze nk’abandi bayobozi ba Afurika iyo bagiye hanze -Gen Kabarebe

Yanditswe na HABIMANA James
Kuya 21 Gashyantare 2019 saa 08:41
Yasuwe :
0 0

Gen. James Kabarebe yavuze ko Perezida Kagame atandukanye na bamwe mu bayobozi ba Afurika, usanga bajya hanze y’uyu mugabane kwisabira bashaka uko bazabaho nyuma y’ubuyobozi, kuko we ajya gushaka icyateza imbere abanyarwanda.

Ni mu kiganiro yahaye urubyiruko kuri uyu wa Kane muri gahunda ya ‘Rubyiruko Menya Amateka yawe’ cyitabiriwe n’abagera kuri 606 bo mu Ntara y’Amajyepfo, bari bateraniye mu kigo cy’urubyiruko cya Kimisagara.

Muri ibi biganiro byari bifite insanganyamatsiko igira iti “Twigire ku mateka twubaka u Rwanda twifuza”, Gen. Kabarebe yavuze ko hari bamwe mu bayobozi muri Afurika iyo bagiye hanze yayo, bagenda bishakira uko bazabaho mu gihe bazaba bavuye ku butegetsi.

Yabwiye urubyiruko ko bakwiye kwishimira ko bafite Umukuru w’Igihugu wita ku banyarwanda bose, bakaba bakwiye kumwigiraho uko agenda avuga igihugu cye, ashakira ibyiza abaturage bose.

Ati “Iyo agiye hanze y’igihugu ntiyivuga avuga u Rwanda, ntabwo ari abayobozi benshi bateye gutyo, abenshi mu bayobozi bo muri Afurika iyo bagiye hanze bajya kwisabira, usanga bajya kwishakira uko bazabaho nyuma y’ubutegetsi bwabo, ariko Kagame buri rugendo agize hanze ajyayo asabira, avuganira, abanira igihugu cy’u Rwanda namwe mwese, ni urwo rugero mwese mukwiye gukurikiza.”

Yabwiye urubyiruko ko mu gihe bakimufite bagomba kumukuraho byinshi kuko ntacyo abahisha, abafungurira inzira zose zishoboka yaba mu gihugu no hanze yacyo.

Ati “Kugira Perezida Kagame nk’umuyobozi ni ikintu gikomeye mu buzima bwanyu, ubuyobozi bwiza buboneka rimwe, ibihugu byateye imbere ku Isi ni ukubera ko mu gihe kimwe byagize amahirwe yo kugira umuyobozi umwe wujuje byose bikenerwa kugira ngo igihugu kibeho neza, babyubakiraho ntibasubire inyuma”.

Gen Kabarebe yavuze ko Perezida Kagame ntacyo yahishe urubyiruko ndetse n’abanyarwanda kuko ababwiza ukuri kuvuye ku mutima we.

Yavuze ko umuyobozi ubwiza abenegihugu be ukuri icyo gihugu gitera imbere, bityo nabo badakwiye kubifata nk’ibisanzwe ngo babikinishe.

Umwaka wa 2018 wabaye udasanzwe ku Rwanda binyuze mu murava w’Umukuru w’Igihugu wo guhihibikanira no kunoza ubuhahirane n’ubufatanye n’ibindi bihugu.

Perezida Kagame yakoze ingendo 23 mu bihugu 28 byo ku migabane itandukanye y’Isi irimo Afurika, u Burayi, Aziya na Amerika.

Birimo Tanzania, u Busuwisi, Ethiopia, u Budage, u Buhinde, Uganda, u Bwongereza, Repubulika ya Congo, u Busuwisi, u Bubiligi, Amerika, Canada, u Burusiya, Ghana, Kenya, Mauritanie, Djibouti, Afurika y’Epfo, Namibia, u Bushinwa, Arménie, u Bufaransa, Qatar, Argentine, Misiri, Autriche, Jordanie na Côte d’Ivoire.

Uwo mwaka wasize u Rwanda rusinyanye amasezerano y’ubufatanye n’ibihugu bitandukanye ku Isi byiganjemo ibyo Perezida Kagame, yanyuzemo aharura inzira y’imikoranire.

Urubyiruko rurenga 600 rwo mu Ntara y'Amajyepfo rwasobanuriwe amateka y'igihugu
Urubyiruko rwunamiye inzirakarengane zishyinguye mu rwibutso rwa Kigali ku Gisozi
Rwasobanuriwe amateka y'urugamba rwo kubohora igihugu
Minisitiri w'Urubyiruko Rosemary Mbabazi
Gen. James Kabarebe yabwiye urubyiruko ko rufite umuyobozi mwiza wo kwigiraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza