Perezida Kagame na Museveni mu nama i Gatuna (Amafoto)

Yanditswe na Rabbi Malo Umucunguzi
Kuya 21 Gashyantare 2020 saa 01:10
Yasuwe :
0 0

Perezida Kagame yageze i Gatuna hafi saa sita ari kumwe na Perezida Lourenço wa Angola hamwe na Tshisekedi wa RDC, bo babanje kunyura i Kigali mbere yo kwerekeza i Gatuna.

Perezida Museveni we yageze i Gatuna hakiri kare, ariko aguma hakurya y’umupaka arindira bagenzi be baturukaga i Kigali, ari nabo bamwakiriye ahabereye ibiganiro.

Iyi nama ibaye mu gihe u Rwanda rwasabye abaturage barwo kutajya muri Uganda kubera itotezwa bahurirayo naryo, ndetse icyo gihugu gishinjwa gufasha imitwe igamije guhungabanya umutekano w’u Rwanda irimo RNC ya Kayumba Nyamwasa, FDLR, RUD Urunana n’indi.

U Rwanda kandi rushinja umuturanyi warwo wo mu majyaruguru kubangamira ubucuruzi bwarwo, kuko hari ibicuruzwa by’abanyarwanda byagiye bifatirwa nta mpamvu, ku buryo byahungabanyije ubucuruzi bwanyuraga mu muhora wa ruguru.

Ibaye kandi mu gihe Uganda ikomeje gutera intambwe mu gushyira mu bikorwa ubusabe bw’u Rwanda, aho yatangaje ko yatesheje agaciro pasiporo yari yarahawe Charlotte Mukankusi ushinzwe dipolomasi muri RNC.

Ku wa Gatatu nabwo Uganda yarekuye abanyarwanda 13 bari bafungiwe muri Uganda, hamwe n’abandi babiri bashinjwa kugaba ibitero mu Kinigi byahitanye abantu 14 umwaka ushize, ndetse bemera ko babigizemo uruhare.

Byitezwe ko iyi nama isinyirwamo amasezerano yo kohererezanya abanyabyaha, hagati y’u Rwanda na Uganda.

Mu gihe ibihugu byombi byaba binyuzwe n’intambwe yatewe hagendewe ku byasabwe na buri gihugu mu gukemura ibibazo, aba bakuru b’ibihugu basuzuma ikibazo cyo “gusubiza mu buryo ibikorwa n’urujya n’uruza rw’abantu n’ibicuruzwa ku mupaka uhuriweho hagati y’u Rwanda na Uganda.”

Guverineri w'Intara y'Amajyaruguru, Gatabazi Jean Marie Vianney, aramutsa Justin Inzun Kakiak uyobora Urwego rw'Iperereza rwa RDC, mbere y'ibiganiro
Minisitiri w'Ubutabera akaba n'Intumwa nkuru ya Leta Johnston Busingye
Minisitiri w'Ibikorwa remezo Amb. Gatete Claver yitabiriye iyi nama
Perezida Kagame amaze kuva mu modoka ye, ategereje Perezida Lourenço na Tshisekedi bari inyuma
Perezida Kagame na Lourenço bagera i Gatuna
Perezida Tshisekedi asanga bagenzi be mu nama y'i Gatuna
Abayobozi batandukanye binjira mu cyumba cyabereyemo inama
Minisitiri w'Ububanyi n'amahanga w'u Rwanda, Dr Vincent Biruta, mu nzira agana ahabereye inama
Perezida Lourenço aramutsa abayobozi hamwe na Perezida Kagame
Perezida Kagame yakira Museveni ku mupaka wa Gatuna
Perezida Kagame, Museveni, Lourenço na Tshisekedi bafata ifoto mbere y'inama yabereye mu muhezo

Amafoto: Niyonzima Moise

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza