Perezida Kagame na Jack Ma bagaragaje inyungu imaze kuva mu bufatanye na Alibaba

Yanditswe na Rabbi Malo Umucunguzi
Kuya 24 Mutarama 2019 saa 02:42
Yasuwe :
0 0

Umuyobozi w’Ikigo Alibaba Group Holding, Jack Ma, yavuze ko urubuga rwe, Alibaba, rumaze kugira umusanzu mu kumenyekanisha ubwiza bw’ikawa y’u Rwanda, aho nibura udukarito 2000 twashyizweho, twagurishijwe mu minsi itatu.

Ma yari mu kiganiro hamwe na Perezida Kagame i Davos mu Busuwisi, mu nama ya World Economic Forum.

Mu Ukwakira 2018 nibwo u Rwanda na Alibaba Group basinyanye amasezerano y’ubufatanye yo gutangiza urubuga eWTP (electronic World Trade Platform), rufasha ibigo bito n’ibiciriritse gukora ubucuruzi bwambukiranya imipaka binyuze mu ikoranabuhanga.

Mu ntangiriro z’uku kwezi, ubwo hari hashize amezi abiri hasinywe ayo masezerano atuma ibicuruzwa by’abanyarwanda bizajya bigurishwa mu Bushinwa binyuze ku isoko ryo kuri internet rya Alibaba, Abanyarwanda bacuruza ikawa batangiye kubona umusaruro.

Amwe mu mazina y’ikawa icuruzwaho ni Gorilla coffee, West hills coffee na Land of a thousand hills coffee.

Perezida Kagame yagize ati “Kugurishiriza kuri urwo rubuga biha amahirwe babandi basaga n’abahejwe ku isoko nk’urubyiruko n’abahinzi. Byabafashije guhura n’abaguzi.”

Yongeyeho ko kwagura ubucuruzi bwo kuri internet bigira inyungu zihurirwaho n’Isi yose muri rusange.

Jack Ma we yavuze ko usanga ibihugu byinshi biha amahirwe yihariye ibigo binini ku masoko yagutse, ugasanga rimwe na rimwe ibigo biciriritse n’ibito bisigara inyuma.

Ati “Dutekereza ko hakwiye kubaho uburyo bworoheye ubucuruzi bw’ibigo biciriritse.”

Nk’uko yabisobanuye, abahinzi b’ikawa mu Rwanda, nibo bungutse ku ikubitiro kuko kuri Alibaba hashyizweho udukarito 2000 tw’ikawa, twose twagurishijwe mu minsi itatu. Yavuze ko hari icyizere ko uyu mwaka uzarangira hazacurujwe nibura udukarito 200 000.

Kuba aba bahinzi babasha kwigerera ku isoko ry’u Bushinwa biciye kuri internet, bizafasha mu kongera inyungu no kugabanya abantu babaga hagati y’umucuruzi n’umuguzi wa nyuma, ugasanga bose bagabanaga kuri ya nyungu.

Perezida Kagame yavuze ko igihe cyose ikoranabuhanga rizanira inyungu abanyarwanda, igihugu kitazahwema kuriyoboka. Ma yashimangiye ko mu gihe kiri imbere iri koranabuhanga rizakomeza guha amahirwe ubucuruzi muri Afurika.

Uyu munsi Alibaba ifasha mu guhuza abacuruzi n’abaguzi hagati y’u Rwanda n’u Bushinwa. Ma ateganya kongeraho ibindi bihugu, ibintu bizanagira uruhare mu guteza imbere ubucuruzi hagati y’ibihugu bya Afurika.

Kongera ingano y’ubucuruzi hagati y’ibihugu bya Afurika ni intego ikomeye byihaye, nyuma y’uko muri Werurwe 2018 ibihugu 44 byasinye amasezerano ashyiraho isoko rusange, ubu hategerejwe ko 20 mu byayasinye biyemeza burundu, agatangira gushyirwa mu bikorwa.

Ma avuga ko ikoranabuhanga rizafasha muri ibyo bikorwa, kandi gukorera hamwe nk’Isi bizabyara inyungu nyinshi kurushaho.

Inama ya World Economic Forum, ihuriza hamwe abayobozi bagera ku 3000 barimo abayobozi mu nzego za politiki, imiryango itari iya leta, amashuri makuru na za kaminuza, abanyabugeni n’umuco ndetse n’itangazamakuru.

Perezida Kagame na Jack Ma bahuriye mu kiganiro kivuga ku kwimakaza ikoranabuhanga mu bucuruzi bugezweho. Cyayobowe n'umunyamakuru Susan Zanny Minton Beddoes
Perezida Kagame yatangaje ko Jack Ma yishimiye gutangirana ubucuruzi bwo kuri internet n’u Rwanda bitewe n'icyerekezo cyarwo
Jack Ma yavuze ko hakwiye gushyirwaho uburyo bworohereza ibigo bito kwisanzura mu bucuruzi rusange bwambukiranya imipaka
Umwanditsi Mukuru w’ikinyamakuru The Economist, Susan Zanny Minton Beddoes, ukomoka mu Bwongereza ni we wayoboye ikiganiro
Iki kiganiro cyatangiwe i Davos mu Busuwisi ahateraniye inama y'iminsi ine ya World Economic Forum
Abacyitabiriye bahawe umwanya wo kubaza ibibazo bitandukanye
Umuyobozi wa Alibaba Group, Jack Ma, yashimye icyerekezo cya Perezida Kagame ahitamo u Rwanda nk’igihugu cyatangirijwemo eWTP muri Afurika
Perezida Kagame yaganiriye na bamwe mu bitabiriye iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza