Perezida Kagame na Emir wa Qatar bakurikiranye isinywa ry’amasezerano atatu akomeye

Yanditswe na Rabbi Malo Umucunguzi
Kuya 16 Ugushyingo 2018 saa 09:17
Yasuwe :
0 0

Perezida Paul Kagame na Emir wa Qatar Sheikh Tamim bin Hamad Al Thani, bakurikiranye isinywa ry’amasezerano atatu hagati y’ibihugu byombi, agamije kurushaho kuzamura umubano n’ubufatanye hagati y’ibi bihugu.

Kuri uyu wa Kane nibwo Perezida Kagame yatangiye uruzinduko rw’iminsi ibiri muri Qatar, aho yakiriwe na Emir Sheikh Tamim mu ngoro ya Amiri Diwan i Doha.

Ubwo Emir yakiraga Perezida Kagame n’itsinda ayoboye, yagaragaje ko uru ruzinduko rushimangira ubushake bw’ibihugu byombi mu guteza imbere umubano wabyo.

Perezida Kagame nawe yamushimiye uburyo yamwakiriye, ashimangira akamaro k’umubano mwiza hagati y’ibi bihugu ndetse ko yizeye ko uyu ruzinduko ruzagira uruhare mu kuzamura urwego rw’ubucuti n’ubutwererane bifitanye, rukabigeza ku rwego ruhanitse.

Ibyo biganiro byibanze ku kurebera hamwe urwego rw’ubufatanye muri politiki, ubukungu, ishoramari n’ubuhinzi ndetse n’ubucukuzi bw’amabuye y’agaciro, hanarebwa uko byarushaho gutezwa imbere hagamijwe inyungu z’ibihugu byombi n’ababituye.

Nk’uko ibiro by’umukuru w’igihugu byabitangaje, “Abayobozi bombi n’intumwa bayoboye bagiranye ibiganiro bigamije guteza imbere ubufatanye mu bukungu hagati y’ibihugu byombi.”

“Ku musozo w’ibiganiro, aba bayobozi bakurikiranye isinywa ry’amasezerano atatu hagati y’impande zombi. Arimo amasezerano mu bijyanye n’indege, amasezerano ku guteza imbere no kurengera ishoramari n’amasezerano y’ubufatanye ku butwererane mu bijyanye n’ubukungu, ubucuruzi na tekiniki.”

Aba bayobozi banaganiriye ku kuzamura ubutwererane hagati ya Leta ya Qatar n’Umuryango wa Afurika Yunze Ubumwe Perezida Kagame ayoboye muri uyu mwaka.

Ku mugoroba wo kuri uyu wa Kane, Perezida Kagame yasuye ibice bitandukanye birimo Ikigega cya Qatar giteza imbere Uburezi, ubumenyi n’abaturage, aho yanasuye Isomero ry’Igihugu rya Qatar n’ibindi bikorwa.

Abanya-Qatar bakomeje kugaragaza ubushake bwo gukorera mu Rwanda, ndetse mu kwezi gushize rwakiriye itsinda ry’abashoramari baturutse muri icyo gihugu barambagiza amahirwe ahari.

Bakiriwe n’abayobozi batandukanye bo mu Kigo cy’Igihugu cy’Iterambere (RDB); Minisiteri zirimo iy’Ibikorwaremezo, iy’Ubuhinzi n’Ubworozi, iy’Uburezi, iy’Ikoranabuhanga mu Itumanaho na Inovasiyo na Minisiteri y’Imari n’Igenamigambi, n’Ikigo cy Igihugu gishinzwe Mine, Peteroli na Gaz.

Iryo tsinda ryari riyobowe na Sheikh Faisal bin Thani Al-Thani, umwe mu bagize umuryango uyoboye Qatar, akaba n’Umuyobozi Mukuru ushinzwe ishoramari mu kigo ‘Qatar Investment Authority’.

Ni ikigo cya leta gifatwa nk’ikigega cyagoboka igihugu mu bihe biri ngombwa. Gikora ishoramari imbere mu gihugu no mu mahanga. Iki kigo cyashinzwe mu 2005, kibarirwa umutungo wa miliyari $300.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza