Perezida Kagame mu masaha 48

Yanditswe na IGIHE
Kuya 10 Ukuboza 2019 saa 11:55
Yasuwe :
0 0

Ubwo ku wa Gatandatu Perezida Kagame yahuraga n’urubyiruko, umwe mu bitabiriye ibiganiro yamubajije ibanga rituma mu kanya gato uba wumva ngo ari mu nama nk’i Burayi, wagoheka gato ugakanguka bakubwira ngo yageze mu Rwanda arimo kwakira abayobozi runaka cyangwa arimo gufungura inama iyi n’iyi.

Akenshi abantu bakoze ingendo ndende mu ndege, usanga nyuma yo gushyika aho baganaga, bafata umwanya munini bakaruhuka kubera umunaniro [jet lag] ariko kuri Perezida Kagame ubanza bitandukanye.

Rumwe mu ngero za hafi ni igihe muri Mutarama 2019 Perezida Kagame yafunguraga Kaminuza mpuzamahanga y’Ubuvuzi, University of Global Health Equity (UGHE), i Butaro mu Karere ka Burera. Yageze i Butaro akiva mu Nama Mpuzamahanga yiga ku Bukungu yaberaga i Davos mu Busuwisi.

Uretse kuba Umukuru w’Igihugu akoresha indege yihariye, igenekereza risanzwe ryerekana ko umuntu yahakoresha hagati y’amasaha icumi n’iminota 50 na 14 n’iminota 15 bitewe n’indege wateze.

Rimwe mu mabanga Perezida Kagame yahishuriye urubyiruko rimushoboza ibyo byose, ni ukuzirikana ko inshingano zawe nta wundi uzaza kuzigukorera.

Yagize ati “Abo mbana na bo mu rugo babizi neza, hari ubwo njya kuryama nkibuka ikintu ntakoze cyangwa kikaba igitekerezo kije, nkabyuka ngatangira gukora.”

Kuva ku Cyumweru kugeza ku wa Mbere, Perezida Kagame yagize amasaha 48 yabayemo akazi kenshi imbere mu gihugu no hanze yacyo, byose bishimangira ubwitange bwe no gukora ubutaruhuka byakunze gutangaza benshi.

Mu gitondo cyo ku Cyumweru, Perezida Kagame yagiranye inama n’itsinda rishinzwe gukurikirana amavugurura mu Muryango wa Afurika Yunze Ubumwe, inama yabereye muri Village Urugwiro.

Ni inama yitabiriwe n’itsinda rigizwe n’abarimo Dr Donald Kaberuka wayoboye Banki Nyafurika Itsura Amajyambere (Afdb), kuri ubu ni Umuyobozi mu kanama ko ku rwego rwo hejuru kashyizweho n’Umuryango w’Abibumbye gashinzwe gushakira umuti ibibazo by’abantu bavanwe mu byabo akaba n’Umuyobozi w’Inama y’Ubutegetsi y’Ikigega Global Fund; Umuyobozi wa Komisiyo ya AU, Moussa Faki Mahamat; Carlos Lopez wayoboye Komisiyo y’Ubukungu ya Loni kuri Afurika hagati ya 2012 na 2016; Umuherwe Strive Masiyiwa na Minisitiri w’Ububanyi n’Amahanga w’u Rwanda, Dr Vincent Biruta.

Hari kandi n’Umunya-Guinée-Bissau, Dr. Carlos Lopes wari Umunyamabanga Mukuru Wungirije w’Umuryango w’Abibumbye akaba n’Umunyamabanga Nshingwabikorwa wa Komisiyo y’Ubukungu ya Afurika. Harimo kandi Cristina Duarte, Mariam Mahamat Nour, Vera Songwe, Amina J. Mohammed na Tito Mboweni, Minisitiri w’Imari wa Afurika y’Epfo.

Nyuma ya saa sita habaye Inama Mpuzamahanga ya Kusi Ideas Festival mu Intare Conference Arena, yitabirwa n’abarimo Perezida Félix Tshisekedi wa RDC; Moussa Faki Mahamat; Raila Odinga, Intumwa ya Afurika Yunze Ubumwe mu bijyanye n’Iterambere ry’Ibikorwa remezo muri Afurika na Dr. Vera Songwe, Umunyamabanga Nshingwabikorwa wa Komisiyo ya Loni ishinzwe Afurika.

Mu gitondo kuri uyu wa Mbere bwo yagize ingendo zamusabye kujya mu mahanga, kuko yabanje kwitabira n’Inama y’Abakuru b’ibihugu na za Guverinoma b’ibihugu bya Afurika, Caraïbes na Pacifique, ACP, yabereye i Nairobi muri Kenya.

Ni inama yitabiriwe n’abandi bayobozi barimo Uhuru Kenyatta; Perezida wa Bostwana, Mokgweetsi Masisi; Perezida wa Centrafrique, Faustin-Archange Touadéra; Perezida wa Comores, Azali Assoumani na Perezida wa RDC, Felix Tshisekedi wari uturutse i Kigali. Yitabiriwe kandi na Perezida wa Ghana, Nana Akufo-Addo; Perezida wa Mozambique, Filipe Nyusi; Perezida wa Namibia, Hage Geingob na Perezida wa Seychelles, Danny Faure.

Perezida Kagame yasoje inama ahita ahindukira asubira i Kigali hamwe na Perezida wa Namibia, Hage Geingob, bitabiriye itangwa ry’ibihembo mpuzamahanga byo kurwanya ruswa, byitiriwe n’Umuyobozi w’Ikirenga wa Qatar, Sheikh Tamim bin Hamad Al Thani.

Perezida Kagame yakunze kuvuga ko nubwo aba afite akazi kenshi, atajya aburira umwanya umuryango we, cyane ko ari wo umufasha kukanoza uko bikwiye.

Mu kiganiro yatanze ku wa 6 Werurwe 2019 muri Afurika y’Epfo, aho yari yitabiriye Inama ngarukamwaka y’Umuryango w’Abayobozi bakiri bato izwi nka ‘YPO EDGE’, yakomoje ku buryo mu 1995 umwana we w’imfura afite imyaka ine, buri muntu mu gihugu yari ahuze, hagahoraho inama n’ingendo ugasanga bifashe amasaha yose.

Yavuze uburyo umunsi yari aryamye, yumva umuntu ukomanze akeka ko ari abashinzwe umutekano bamuzaniye amakuru mabi, akinguye asanga ni umuhungu we, amubaza aho amaze iminsi.

Yakomeje ati “Ntabwo nafashe umwanya wo gusobanura byinshi, nageze aho amarira atemba ajya imbere aho kujya hanze, narimo ngerageza kumva icyarimo kuba. Nahise nizeza umuhungu wanjye ko mu gihe cyose nzaba ndi mu murwa mukuru [Kigali], icyo nzaba ndimo nkora cyose, buri saa mbili z’umugoroba nzajya ndeka ibyo ndimo nkajya kumureba mbere y’uko ajya kuryama, nkabona gusubira mu kazi.”

Perezida Kagame kandi ubwo yari mu Nama ya Eisenhower Fellowships igamije gushishikariza abayobozi mu mpande z’Isi gutekereza byisumbuyeho, muri Kamena uyu mwaka, yongeye gushimangira ko akazi kenshi agira kadatuma yibagirwa inshingano afite nk’umubyeyi.

Yakomoje ku buryo abana be bacyiga mu mashuri abanza yabajyanaga ku ishuri ugasanga hari ababyibazaho, bitewe n’uko hari abantu bagera mu myanya imwe n’imwe bikaba nk’aho basonewe inshingano bakagombye gukora.

“Kujyana abana banjye ku ishuri, abana banjye ni abanjye, ntabwo ari ab’abashoferi banjye. Abashoferi na bo bafite ababo bagomba kwitaho.”

Perezida Kagame ahura n’itsinda rimufasha mu mavugurura muri AU

Dr Donald Kaberuka aganira na bagenzi be muri Village Urugwiro
Perezida Kagame aganira n'itsinda rimufasha amavugurura muri AU
Minisitiri w’Imari wa Afurika y’Epfo, Tito Mboweni atanga igitekerezo mu nama y'intiti ziri gufasha Perezida Kagame mu mavugurura yo muri AU

Perezida Kagame yitabira Kusi Ideas Festival

<

Perezida Kagame na Tshisekedi binjira ahabereye inama
Perezida Kagame hamwe na Perezida Tshisekedi mu Nama ya Kusi Ideas Festival
Iyi nama yitabiriwe n'abayobozi batandukanye

Perezida Kagame yitabira ACP Summit i Nairobi

Perezida Kagame agera muri Kenya, ahabereye ACP Summit
Perezida Kagame asinya mu gitabo cy'abashyitsi
Perezida Kagame mu ifoto y'urwibutso hamwe n'abandi bayobozi

Perezida Kagame mu bihembo byo kurwanya ruswa

Perezida Kagame yatwaye mu modoka Umuyobozi w’Ikirenga wa Qatar, Sheikh Tamim bin Hamad Al Thani
Perezida Kagame na Emir Sheikh Tamim bin Hamad Al Thani baganira
Abayobozi bafatanyije gusenya urukuta rwa ruswa
Perezida Kagame yasabye ibihugu gufatanya mu kurwanya ruswa
Ababaye indashyikirwa mu kurwanya ruswa ku Isi bahembwe mu birori byabereye mu Mujyi wa Kigali

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .