00:00:00 IGIHE NETWORK KN KINYARWANDA EN ENGLISH FR FRANCAIS

"Perezida Kagame arihangana!"

Yanditswe na Philbert Girinema
Kuya 28 Ugushyingo 2022 saa 10:44
Yasuwe :

Mu myaka yose amaze ku buyobozi na mbere yaho, Perezida Kagame ntiyigeze yihishira ku byo yanga. Yabivuze mu nama zibera mu muhezo, mu ruhame n’imbere y’abaturage bose, ariko inshuro nyinshi hari ubwo bisa nko kugosorera mu rucaca.

Muri izo nshuro zose, yavugaga ku myitwarire y’abayobozi, ko hari abakora nabi kandi ko iyo migirire ikwiriye guhinduka. Hari abitwaye nabi nyuma yo kubohora igihugu, bazana za rwaserera no kuvunda mu bihe bidakwiye; hari abandi bananiranye mu myaka ya 2000 igihe amashyaka nka za MDR zasenyukaga hakabamo n’abandi bashatse kuzana Ubuyanja n’ibindi nk’ibyo.

Nyuma yaho haza abasirikare bagiye bitwara nabi nka ba Kayumba na ba Karegeya, ugasanga ni abantu bashaka gushyira imbere inda zabo. Ibyo byiyongeragaho imigambi mibisha muri bo yo gusenya u Rwanda, n’abashakaga kugira utuntu tumeze nk’utuzu kandi ari ibyo FPR yaje irwanya.

Hari abagiye bagaragarwaho n’ubujura, ntitwakwirirwa tuvuga amazina yabo ni benshi. Harimo abafunzwe by’igihe kirekire yewe banafungurwa, akongera akabagirira icyizere. Nabo ni benshi.

Urutonde rw’abo yagiye akura mu myanya bakoze amakosa akomeye nyuma bakongera kugirirwa icyizere ni rurerure cyane, ariko ibyo byose bifite icyo bivuze. Byerekana ko nubwo agira igitsure, imbabazi n’impuhwe bimuba hafi. Ahora agoragoza.

Muri uko kugoragoza, hari benshi bahindukira rimwe, bakahakura isomo, bakaba bazima, abo nubwo ntawabasha kubamenya neza ariko arabishimira cyane kuko u Rwanda ari igihugu cyubakiye ku mbabazi.

Kuva umwaka watangira, ntihashobora gushira amezi abiri nta mpinduka zibayeho mu nzego zitandukanye nkuru z’igihugu, abayobozi bamwe bagasimburwa kubera imikorere n’imikoranire n’abandi bidahwitse.

Muri Gicurasi uyu mwaka ubwo habaga Inama Nkuru y’Umuryango FPR Inkotanyi, Perezida Kagame yagarutse ku mikorere y’abayobozi bamwe, avuga ko ubusanzwe, urebye ubushobozi bwabo n’ibyo bakoze ahantu hatandukanye, nta kintu cyagakwiriye kuba kibananira.

Ati "Aba bantu bose ndikubaza, urebye CV zabo, nta kintu gikwiriye kuba kibananira."

Uwo munsi, Tito Rutaremara yagiranye ikiganiro cyiza na Perezida Kagame, amubwira ko amaherezo ari uko bakwiremera abantu, Umukuru w’Igihugu amusobanurira ko atari Imana, Tito na we amusubiza ko nubwo atari Imana, ariko hageze ko abantu bahabwa indangaciro zihariye zituma bakora inshingano zabo neza.

Rutaremara yaganiriye na IGIHE, agaruka kuri iyi ngingo y’imikorere idahwitse mu bayobozi. Uko kurema, yasobanuye ko Perezida Kagame yagukoze ubwo yayoboraga urugamba rwo kubohora igihugu.

Ati "Reba dufite abasirikare beza, si uko bagiyeho se? [Naramubwiraga nti] wagiye ubakurikirana mbere ubareba, uri hamwe nabo, noneho habonekamo abeza barabikora. Ariko we rero afite byinshi arimo, ntabwo yabona umwanya wo kujya inyuma y’abaminisitiri ngo azajye kutuvuganira muri Loni, azajye kudushakira inshuti hirya no hino, ngo azajye kudushakira amafaranga."

Rutaremara ni umwe mu nararibonye zizi neza u Rwanda rwa none, ndetse zanagize uruhare kugira ngo rube ruri uko rumeze. Asobanura ko hari ikintu kimwe abantu batabona, ahanini gishingiye ku buryo Perezida Kagame yihanganira abayobozi.

Ati "Abantu bakwiye gushima ko bafite Perezida wihangana, akubwiye rimwe ntubikoze, akubwiye kabiri urabyongeye, akubwiye gatatu, ubwa kane akavuga ati vaho. Urumva ko ari umuntu wihangana, bose nta we ageraho ataravuze [...] njye nakubwira rimwe ubwa kabiri nkagukuraho. We arihangana akavuga ati ubwo namubwiye wenda arikosora, arageraho yikosore."

Uko kwihangana, Rutaremara avuga ko kugaragaza umuyobozi mwiza, kuko ugiye "ukubita utya, wabamaraho".

Ngo ni byiza guha abantu andi mahirwe ku buryo n’iyo umuntu ahanwe aba yumva ko ikosa ari irye, kandi n’umuyobozi aba azi neza ko yagerageje kenshi.

Rutaremara asobanura ko hari ubwo umuyobozi atoranywa ari muzima, ariko yagera mu nshingano agatangira kwiba, kuko ajya kuzihabwa aba atarakora ku mafaranga.

Birasa n’aho iyi nenge iri mu mikorere y’abayobozi bamwe, itangiye gusa n’aho ishakirwa umuti urambye.

Mu nama ya Biro Politiki iheruka ya FPR Inkotanyi, hanzuwe ko hagomba gushyirwaho ishuri ryigisha imiyoborere rizitwa "RPF Academy". Rizaba rigamije guha urubyiruko ubumenyi, amahame, imigenzo n’ikinyabupfura gikenerwa mu buyobozi.

Gusa nubwo bimeze bityo, ntabwo habaho ishuri ryajyamo abantu miliyoni zingahe, kuko usibye n’abayobozi, hari n’ibyo abaturage bo ubwabo basabwa birimo kuguma mu murongo ugamije iterambere ry’igihugu, kubahiriza amategeko n’ibindi.

Senateri Uwizeyimana Evode aherutse gutangaza ko hari ibintu bikunda kugusha abayobozi mu makosa. Ibyo ngo ni amafaranga, ruswa, igitsina no gukunda icyubahiro.

Ati "Ariko niba mwitegereje neza, muraza gusanga ibinogo abagabo turimo kugwamo ari ibinogo nka bitatu; ni amafaranga, ruswa cyangwa kunyereza, n’ibi bintu by’igitsina, n’ibintu byo gukunda ikuzo n’icyubahiro. Ni ibyo binogo, umuyobozi washobora kubyirinda, ntekereza ko yaba ari hejuru."

Birasaba kwirinda izo nenge kuko nubwo wakurikiza amatwara ya FPR nk’uko byagakwiye, ariko ukaba ufite izo nenge n’ubundi wisanga mu ntege nke.

Perezida Kagame ubwo yumvaga igitekerezo cya Tito Rutaremara wamubwiraga ko bikwiriye ko biremera abantu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .