Perezida Kagame arakira indahiro z’abasenateri 20 bagiye kwinjira mu Nteko

Yanditswe na Ishimwe Israel
Kuya 16 Ukwakira 2019 saa 07:05
Yasuwe :
0 0

Perezida Kagame agiye kwakira indahiro z’abasenateri 20 barimo abaheruka gutorwa n’abemerewe kwinjira mu Nteko Ishinga Amategeko y’u Rwanda, Umutwe wa Sena.

Uyu muhango uzabera mu Nteko Ishinga Amategeko ku Kimihurura ku wa Kane, tariki ya 17 Ukwakira 2019.

Mu basenateri bazarahira barimo Dr. Iyamuremye Augustin, Nyirasafari Espérance, Habiyakare François na Dr Mukabaramba Alvera bashyizweho na Perezida Kagame ku wa 20 Nzeri 2019.

Bashyizweho nyuma y’uko Komisiyo y’Igihugu y’Amatora yemeje abasenateri 14 batowe bahagarariye inzego zitandukanye zirimo Intara n’Umujyi wa Kigali, amashuri makuru na kaminuza bya leta n’ibyigenga n’abahagarariye imitwe ya politiki yemewe mu Rwanda.

Abasenateri 20 baziyongeraho, abandi batandatu bazashyirwaho nyuma y’umwaka manda nshya itangiye ngo mu mikorere ya Sena hatabaho icyuho mu nshingano yo kugenzura ishyirwa mu bikorwa ry’amahame remezo no kwemeza abayobozi.

Mu basenateri bane bashyirwaho n’Ihuriro Nyunguranabitekerezo ry’Imitwe ya Politiki, babiri batangirana na manda nshya, abandi bakazashyirwaho nyuma y’umwaka. Naho mu basenateri umunani bashyirwaho na Perezida wa Repubulika, hashyizweho bane, abandi bane bazinjira muri sena nyuma y’umwaka.

Ibyo biterwa n’uko bitandukanye n’Umutwe w’Abadepite, Sena ntijya iseswa ndetse nta gihe imirimo yayo irangira ngo habeho igihe nta bantu barimo kubera imiterere y’inshingano zayo. Ni yo mpamvu abagiye kujya muri Sena uyu mwaka bazaba ari abasenateri 20 kuri 26.

Muri Sena irimo kurangiza imirimo, abasenateri bashyizweho nyuma bazanasoza manda yabo mu 2020 ni Prof. Karangwa Chrysologue, Kalimba Zephyrin, Uwimana Consolée na Nyagahura Marguerite bashyizweho na Perezida wa Repubulika.

Bazarangiriza manda icya rimwe n’abashyizweho n’Ihuriro Nyunguranabitekerezo ry’Imitwe ya Politiki, ari bo Uyisenga Charles na Mukakalisa Jeanne D’Arc.

Sena y’u Rwanda iriho yatangiye imirimo yayo mu 2011; igaragaza ko muri manda yayo ya kabiri yagize uruhare rukomeye mu iterambere n’imibereho myiza by’abaturage binyuze mu gutora amategeko, kwemeza abayobozi, gukemura ibibazo n’ibindi.

Inshingano zihariye za Sena zirimo kugenzura iyubahirizwa ry’amahame remezo, kugenzura imikorere y’imitwe ya Politiki, kwemeza ishyirwaho ry’abayobozi, gutanga ibitekerezo ku mushinga w’ingengo y’imari mbere y’uko wemezwa n’Abadepite, kwakira inyandiko zimenyekanisha imitungo y’urwego rw’umuvunyi.

Perezida Kagame agiye kwakira indahiro z’abasenateri 20 bagiye kwinjira mu Nteko. Aha ni ku wa 19 Nzeri 2018 ubwo yarahizaga Abadepite binjiye mu Nteko Ishinga Amategeko, Umutwe w'Abadepite

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza