PDP-Imanzi nayo yikuye mu ihuriro P5 risa n’iriri mu marembera

Yanditswe na Musangwa Arthur
Kuya 16 Ugushyingo 2019 saa 07:15
Yasuwe :
0 0

Nyuma y’uko Ingabire Umuhoza Victoire yitandukanyije na FDU-Inkingi ibarizwa mu Ihuriro P5, igitutu kiririho cyakomereje ku Ishyaka PDP-Imanzi, na ryo ryatangaje ko rivuye muri iri huriro risa n’ubwato buyobowe na Kayumba Nyamwasa.

Ku wa 15 Kanama 2015, Ishyaka PDP-Imanzi ritemewe mu Rwanda, ryasinye amasezerano y’ubufatanye muri politiki n’indi mitwe ine ariyo; Amahoro PC, RNC ya Kayumba Nyamwasa, FDU-Inkingi ya Ingabire Victoire na PS-Imberakuri igice cya Me Bernard Ntaganda.

PDP-Imanzi [Igihango cy’Abaturage baharanira Demokarasi] yashinzwe na Mushayidi Déogratias, wakatiwe gufungwa burundu nyuma yo guhamwa n’icyaha cyo guhungabanya umutekano w’igihugu.

Itangazo ry’iri shyaka rivuga ko ‘guhera kuri uyu munsi tariki 16/11/2019, PDP-Imanzi ntikiri mu Ihuriro rya P5’. Rivuga ko rigiye gushyira ingufu mu guharanira ko habaho ibiganiro by’ubwumvikane bihuza Abanyarwanda bose mu gushakira ibisubizo ibibazo bya politiki n’imibereho myiza biri mu gihugu.

PSP-Imanzi isobanura ko iki cyemezo yagifashe nyuma yo kubona ko Guverinoma y’u Rwanda n’abo batavuga rumwe ntaho bahurira kubera amagambo akoreshwa n’impande zombi.

Ku rundi ruhande ariko abasesenguzi barasanga ari igitutu gituruka ahanini ku bitero by’ingabo za FARDC, zidatuma abibumbiye muri P5 bagoheka.

Ihuriro P5, rikomeje gucanwaho umuriro n’ingabo za Repubulika Iharanira Demokarasi ya Congo (FARDC), aho bamwe mu barwanyi bawo bishwe abandi bagafatwa bakaba bari mu nkiko mu Rwanda.

Ku wa 2 Ukwakira 2019 nibwo abarwanyi bari bagize umutwe wa P5 bari bamaze igihe mu mashyamba ya Congo, bisanze mu Rukiko rwa Gisirikare i Kigali. Hari nyuma y’amezi make bari mu Bugenzacyaha, aho bahaswe ibibazo bagasobanura uko binjiye muri uyu mutwe witwara gisirikare n’uko bafashwe.

Abafashwe benshi bakuwe mu mashyamba ya Congo nyuma y’igico gikomeye batezwe n’ingabo z’icyo gihugu, FARDC, aho mu iburanisha abenshi bahurizaga ku kuvuga ko bashyikirijwe u Rwanda ku wa 18 Kamena 2019. Hari n’abatawe muri yombi barageze mu kigo kinyuzwamo abasirikare bavuye ku rugamba cya Mutobo.

Ibitero bya FARDC kandi byasize abarimo uwari umuyobozi wa FDLR, Mudacumura Sylvestre n’umwe mu bayobozi bo hejuru ba RUD Urunana, General Musabyimana Juvénal bakunze kwita Jean Michel Africa bishwe.

P5 igamije guhungabanya u Rwanda no guteza umutekano muke mu gihugu. Hari ibitero bya za gerenade bagabye ku Rwanda, aho abaheruka ari abateye mu Kinigi bakica abaturage 14.

Ubushinjacyaha bw’u Rwanda bwatanze impapuro zo guta muri yombi abanyamuryango ba P5, ku isonga Kayumba Nyamwasa.

Raporo y’impuguke za Loni yagaragaje ko Kayumba akorera ingendo nyinshi muri RDC, asuye ibikorwa by’imitwe yitwaje intwaro.

P5 igabanyijemo batayo eshatu; iyitwa Alpha, Bravo na Delta, buri imwe igizwe n’abarwanyi basaga 120, bose bavuga ko bashaka kubohora u Rwanda.

Mushayidi Déogratias ni we washinze PDP-Imanzi [Igihango cy’Abaturage baharanira Demokarasi]. Uyu yakatiwe gufungwa burundu nyuma yo guhamwa n’icyaha cyo guhungabanya umutekano w’igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza