Nyuma y’umwaka umwe Intara y’Amajyepfo izaba icyitegererezo- Ikiganiro cyihariye na Guverineri Gasana (Video)

Yanditswe na Philbert Girinema
Kuya 27 Gashyantare 2019 saa 10:53
Yasuwe :
0 0

Gasana Emmanuel yamenyekanye cyane nk’Umuyobozi wa Polisi y’Igihugu mu gihe yari Urwego rucyiyubaka ngo ruhamye ubushobozi n’ubunyamwunga. Mu myaka icyenda yayiyoboye, yakoze akazi gakomeye uru rwego ruza ku isonga mu zizerwa n’abaturage kubera imitangire inoze ya serivisi byose biganisha ku gusigasira umutekano w’abaturarwanda n’ibyabo.

Magingo aya, amaze iminsi 130 ari Guverineri w’Intara y’Amajyepfo imaze imyaka igera kuri itatu iza inyuma mu kwesa imihigo ndetse nta bikorwa bikomeye birangaza abahisi n’abagenzi biyibarizwamo.

Ni intara igizwe n’uturere umunani, imirenge 101, utugari 352 n’imidugudu 3501. Ayobora abaturage barenga miliyoni ebyiri n’ibihumbi 700 ndetse mu gihe cy’amezi ane, buri gace kose kayo yamaze kukageramo.

Kuva ku Buyobozi bw’Urwego rukuru nka Polisi y’Igihugu ukajya kuyobora mu nzego z’ibanze, ni akazi katoroshye kandi gasaba kudahuzagurika na gato.

Gasana nk’umuntu wabaye igihe kinini muri Polisi y’Igihugu ibyo abyumva vuba. Asobanura ko kuba yaragiriwe icyizere agahabwa kuyobora iyi ntara, yari avuye mu rwego n’ubundi rukorana n’abaturage umunsi ku wundi, bityo bitamugoye nubwo hari byinshi byamutunguye.

IGIHE yasuye iyi ntara, ireba ibikorwa bitandukanye birimo gukorwa ngo yongeye isubirane umucyo nk’uko yahoze mu myaka yo hambere. Mu minsi 100 ya mbere y’ubuyobozi bwa Gasana nka Guverineri, byinshi byarahindutse.

Magingo aya, amatongo yari amaze imyaka ine ari ahitwa mu cyarabu mu Karere ka Huye ubu ni inzu nziza ziri gukorerwamo ubucuruzi, utugari tw’icyitegererezo tumaze kuba twinshi mu Karere ka Nyanza, imishinga irimo uwo kubyaza amashanyarazi nyiramugengeri iratanga icyizere n’ibindi byinshi.

Ikiganiro kirambuye Gasana yagiranye na IGIHE

IGIHE: Kuva ku mwanya w’Umuyobozi Mukuru wa Polisi ukagirwa Guverineri, hari benshi babifashe nko kumanurwa mu ntera. Wowe wabyakiriye ute ?

Gasana : Mu by’ukuri nabyakiriye neza cyane bikomeye. Ni iby’agaciro, ni icyizere baguhaye cyiyongera ku kindi cyizere usanzwe waragiriwe.

Namaze imyaka icyenda irenga mpagarariye Perezida wa Repubulika nyobora Polisi, arongera ampa ikindi cyizere angira Guverineri. Kuba Guverineri uhagarariye Umukuru w’Igihugu uyobora abaturage miliyoni ebyiri na 700 kugira ngo amatwara ya politiki ya leta abajyemo, ni icyizere gikomeye cyane.

Ni iby’agaciro. Ubwo se ahubwo waba ushaka iki kindi kandi kirenze icyo? Cyangwa se n’iyo waba ugishaka, ntabwo ari wowe ucyiha.

Umukuru w’Igihugu arebye ibyo ushoboye n’ibyo wakora nyuma ya hariya hantu aguhaye akandi kazi, uhinduriwe imirimo kandi aguhaye akazi, icyo cyizere uretse n’aha kabone n’ubwo haba ari hasi. Narishimye cyane bikomeye, nta na rimwe namutenguha.

IGIHE: Kuba warayoboye Polisi y’Igihugu bigufasha gute kuzuza inshingano nka Guverineri?

Gasana: Muri polisi twagiraga ubufatanye n’abaturage kugira ngo badufashe gukora akazi neza, ubufatanye mu gukumira ibyaha bitaraba nibinaba dufatanye kubirwanya. Icyo gihe rero byari amahirwe kuko iyo ntekerezo yagiye idufasha cyane.

Ugasanga rero ni amahirwe kuba narakoze muri polisi muri ubwo buryo noneho mbyirebere mpari ndetse mfatanye n’izo nzego z’ibanze n’ibyo byiciro bindi birimo igisirikare, igipolisi, RIB ...

Igitandukanye ni uko muri polisi harimo amategeko n’amabwiriza ariko aba bo ni ukubanza ukazamura imyumvire yabo kugira ngo bumve neza gahunda za leta, bumve inshingano. Bitandukanye no muri polisi kuko ho haba amategeko.

IGIHE: Ni iki cyagutunguye utari witeze muri aka kazi?

Gasana: Icyantunguye najyaga mbona amanota y’imihigo yabo ariko ntazi ko abaturage bumva leta noneho twajya mu nama nsanga imyumvire irahari, ntangira kwibaza aho bipfira ariko nza gusanga hari ikibazo gikomeye: Ukuntu abayobozi bamenyekanisha igikorwa kugira ngo abaturage babyumve neza.

Naje gusanga abaturage nta kibazo bafite gikomeye iyo twebwe dushyizemo imbaraga nyinshi kugira ngo tubegere twumvikane. Ikindi cyantunguye ni uburyo bazi gahunda za leta, ugasanga ibintu bijyanye n’imanza, kashe mpuruza… Ikindi bumva radiyo, barakurikira cyane.

IGIHE : Intara y’Amajyepfo wayisanze ute ?

Gasana : Mu mihigo y’ubushize yaje ku mwanya wa nyuma. Ntabwo ari ibintu bishimishije kuza ku mwanya wa nyuma mu mihigo uba warasinyanye n’umukuru w’igihugu cyacu.

Iyo usinya icyiza ni uko ari wowe ubwawe witoranyiriza imihigo. Hari imihigo imwe wenda itaduturukaho bitewe n’abafatanyabikorwa bacu ariko imyinshi iduturukaho, ntacyo twakwireguza ku kutayirangiza.

Hari indi mihigo nayo ivuga ngo abaturage bishimiye ibyo tubakorera cyangwa se babigiramo uruhe ruhare. Ibyo byose ni ibintu wumva twatunganya neza. Uretse no mu mihigo ariko no mu bukene urabona ko twasubiye inyuma.

IGIHE: Mu mibare iheruka, Amajyepfo ahagaze he mu bukene?

Gasana: Ubu ubukene ni ukuvuga ngo turi kuri 41%. Byasubiye inyuma gato kuko mu myaka itanu ishize byari 38% birongera bisubira inyuma gato bigera kuri 41%.

IGIHE: Ni izihe ngamba mwashyizeho mu maguru mashya zigamije gukemura iki kibazo?

Gasana: Icya mbere kwari ukugira ngo twongere turebe aho bitagenze neza mu mihigo tuhihutishe cyane kugira ngo imihigo tuzayese nk’uko biteganyijwe mu kwezi kwa Gatandatu.

Icya kabiri ni uguca ikintu kibangamiye imibereho myiza y’abaturage cyane cyane twibanda ku isuku n’isukura (ubwiherero, ubwisungane mu kwivuza). Ikindi turi kwibandaho ni [ukurwanya] imirire mibi ishobora no gutuma abana bagwingira.

Uturere tumwe dufite imibare itari myiza nka za Nyaruguru, Nyamagabe usanga hari ikibazo gikomeye cyane. Twihutiye kugira ngo dutabare vuba na vuba turebe uko twabavana mu mutuku.

Icya gatatu ni umutekano, tukareba amakimbirane ari mu ngo, amacakubiri, ibiyobyabwenge n’ibisindisha, ruswa; ibintu byose bituma umutekano uba muke mu ngo.

Icya kane ni ugusuzuma ubushobozi bw’abayobozi bw’inzego zibanze. Imyumvire yabo iri hasi, ntushobora kuba ufite imyumvire iri hasi ngo ushobore kuyobora umuntu kandi nawe utari kubyumva.

IGIHE: Ni ibiki wasanze iyi ntara yihariye bitaboneka ahandi?

Gasana: Icya mbere Intara y’Amajyepfo ubu hari inganda zigera kuri zirindwi z’icyayi, bagiye kuhubaka izindi eshatu zikaba 10. Inganda 10 rero ahantu hamwe ni nyinshi.

Ikawa ya Maraba ni ikawa igurwa muri Amerika. Ni ikawa ifite uburyohe bwihariye ku buryo irimo guhingwa cyane.

Tugiye mu bintu byo kurya nk’imiceri hari inganda nyinshi. Za Mukunguri, Gikonko n’ahandi hari ibishanga binini cyane. Dufite uruganda rw’imyumbati rwa Kinazi.

Ubu dufite uruganda rwa Gisagara rutunganya neza urwagwa ndetse rugiye kugira n’imitobe yindi. Dufite urutoki runini, nirwo ruganda rwonyine runini ruri mu Rwanda, ngira ngo bagiye gushyira urundi i Kayonza rutunganya inzoga.

Mu bworozi, Perezida wa Repubulika yabahaye uruganda rw’amata asanzwe na fromage. Dufite inka zirenga ibihumbi 400 hano mu Ntara y’Amajyepfo.

Icyo navugaga, ubuhinzi n’ubworozi ni amahirwe ahari, twabwiye n’abashoramari tuti nyabuneka muze mushore imari yanyu hano. Mwagure mukore neza ibikorwa byanyu by’iterambere.

Nk’ubu bagiye gushyira hano uruganda rw’ibumba rukora amasahani, amasafuriya, utubindi, udukombe n’ibindi bitandukanye ndetse banatangize no kubaka izindi.

Hari uruganda bagiye gushyira mu Ruhango, uruganda bagiye gushyira i Nyanza, urukora amakaro n’urukora ibiva mu ibumba.

Agace ka Kamonyi, Ruhango, Muhanga ndetse na Nyaruguru ni ahantu hari amabuye y’agaciro kandi meza menshi.

Mu bukerarugendo, buriya iyo utangiriye hariya ku Ijuru rya Kamonyi, ukamanuka ku rutare rwa Kamegeri, ukaza aha mu Rukari ku gicumbi cy’umuco n’amateka, noneho ukajya mu iyobokamana i Kibeho n’ahandi n’ahandi, ukagera Nyungwe ukareba uko bimeze; turagira ngo dukore ikintu kimwe aricyo bita Tourism Corridor kugira ngo ubukerarugendo hose, nuza uhamare iminsi itatu cyangwa ine bakwereka amateka.

Icya kane ngira ngo ni nacyo gikomeye, ni ingufu, ibintu by’umuriro w’amashanyarazi. Ubu Intara y’Amajyepfo harimo kuva Megawatt zigera kuri 40. Gikonko muri Gisagara aho bita Mamba, tugiye kuzahabona Megawatt 80 ziva muri nyiramugengeri.

Icya gatanu ni uburezi. Ubu aha Intara y’Amajyepfo dufite Kaminuza 11, tukagira ibigo by’amashuri birenga 1000, iby’abanza birenga 800.

Muhanga barimo gushyiramo icyanya cy’inganda hamwe na Huye, imijyi yunganira umujyi wa Kigali ndetse na Kamonyi nayo iri mu nkengero z’umujyi. Ibyo ni amahirwe ahari mu Ntara y’Amajyepfo.

Twaravugaga tuti nka Huye iyo dushyiraho icyanya cy’inganda hano, ibihugu bitwegereye byari kujya biza kurangurira aha aho kugira ngo bijye i Kigali. Ingengo y’imari tubona miliyari zirenga 120, washyiraho n’iz’abafatanyabikorwa harimo miliyari 150.

Wavuga uti nibura miliyari 150 zigiye mu Ntara, Akarere kaba gafite miliyari 14. Ayo mafaranga mu myaka itanu yakabaye azamura imibereho y’abaturage, ubukungu bukazamuka, bigatungana.

IGIHE: Mu ngamba mwafashe, ufite icyizere kingana gute ko ibintu bizaba byasubiye mu buryo?

Gasana: Hari ibintu icumi byo kwitaho mu myaka itanu twihaye kugira ngo Intara y’Amajyepfo igere aho dushaka. Inkingi ikomeye ni imiyoborere myiza ni nayo dukwiye gukoraho, ubuzima buhari, abashoramari batangiye kuza.

Gusa ibi byose ntabwo byashoboka tudashyizemo imbaraga nyinshi mu miyoborere myiza ariko hibanzwe cyane mu nzego zo hasi.

Aho dukwiye gushyira imbaraga ni uguha ubumenyi n’ubushobozi abayobozi bose mu nzego zose cyane izegereye abaturage kandi natwe tukajya kureba ko byakozwe.

Ndaguha icyizere ko nyuma y’umwaka umwe Intara y’Amajyepfo izaba icyitegererezo.

IGIHE: Twizere ko mu mwaka umwe cyangwa mu myaka ibiri nta turere two mu Ntara y’Amajyepfo tuzongera kuza inyuma mu mihigo?

Gasana: Kuko nasanze imihigo barayisinye, tubirimo kugira ngo tubyihutishe, hari ubwo wenda baba baparapara ubu. Ariko ubutaha rwose nicyo dushyize imbere kuko niyo mpamvu duhari. Ntabwo naba ndi aha Perezida wa Repubulika yarampaye icyizere kugira ngo muhagararire ngo noneho mbinanirwe. Ntabwo byashoboka.

Hari ibintu bimwe tudashobora kwemera. Twemere tubikore cyangwa bitunanire bashyireho abandi bashobora kubikora kuko ntabwo byashoboka ko twaba duhari ibintu bigapfa kandi tubireba.

IGIHE: Hari ibibazo byavuzwe ku mishinga imwe n’imwe nk’uw’amashanyarazi aturuka kuri Nyiramugengeri wadindiye. Haba hari icyizere ko ushobora gutanga umusaruro mu gihe cya vuba?

Gasana : Yego rwose, nagiye kubasura nta kibazo kirimo rwose bafite intego yo kugira ngo babone Megawatt 80.

IGIHE : Imijyi yunganira Kigali mufitemo Muhanga na Huye. Haba hari ibigo muteganya byatangiye gukorera muri iyi ntara?

Gasana : Kugeza ubu urutonde ntirurasohoka ariko barabiduteguje kandi barabitumenyasha ko ibyo bigo bizaza kugira ngo bifashe iryo terambere ariko mu gihe bitaraza nakubwira ko twiteguye.

IGIHE : Kimwe mu bintu byakozwe mukigera muri iyi ntara, ni ukuvugurura umujyi wa Huye. Bigeze ku kihe kigero ?

Gasana : Inzu 40 zaravuguruwe. Urabona ko bashishikajwe no gukora, bimeze neza cyane ku buryo hari impinduka iyo urebye umugoroba wabo umeze neza.

Intara y'Amajyepfo igizwe n’uturere umunani, imirenge 101,utugari 352 n’imidugudu 3501
Isuku iri hose mu bice bitandukanye by'Umujyi wa Huye
Umujyi wa Huye wongeye gusa n'ukanguka nyuma y'aho inzu zari zarafunzwe zongeraga gukora
Mu Mujyi wa Huye hagaragara inyubako nyinshi zisukuye zimaze igihe gito zuzuye
Ibikorwaremezo birimo imihanda bimaze kuba byinshi mu Ntara y'Amajyepfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza