Nyuma y’ibitero umutekano uradadiye: Impumeko y’abatuye i Nyabimata no mu nkengero za Nyungwe (Video)

Yanditswe na Prudence Kwizera
Kuya 23 Ukuboza 2019 saa 09:49
Yasuwe :
0 0

Nyuma y’umwaka n’amezi agera kuri atanu bagabweho igitero n’abagizi ba nabi; bamwe mu baturage bo mu Murenge wa Nyabimata mu Karere ka Nyaruguru bavuga ko kuri ubu umutekano ari nta makemwa kandi bafashe ingamba zo kuwubungabunga bafatanyije n’izindi nzego.

Tariki ya 1 Nyakanga 2018 nibwo mu Mudugudu wa Cyumuzi, mu Kagari ka Ruhinga mu Murenge wa Nyabimata, abagizi ba nabi bagabye igitero mu baturage babasahura amatungo, ibiribwa, imyenda n’amafaranga.

Mbere yaho mu ijoro ryo ku wa 19 Kamena 2018, nabwo abo bagizi ba nabi bitwaje imbunda bishe barashe abantu babiri i Nyabimata, bakomeretsa batandatu barimo n’uwari Umunyamabanga Nshingwabikorwa w’uwo Murenge, Nsengiyumva Vincent, batwika n’imodoka ye na moto y’umuturage.

IGIHE yasuye abaturage bo mu Kagari ka Ruhinga aho ibyo bitero byagabwe bagaragaza uko umutekano n’imibereho muri rusange bihagaze nyuma y’umwaka urenga bibaye.

Abo baturage bavuga bakimara kugabwaho igitero bafatanyije n’inzego z’umutekano hamwe n’ubuyobozi mu guhiga abo bagizi nabi ku buryo kuri ubu umutekano ari wose.

Sindikubwabo Emmanuel ati “Bimaze kuba twafashe ingamba zo kwicungira umutekano kuko ikibazo cyari cyamaze kuvuka; mu mudugudu wasangaga hariho site imwe y’irondo tugerageza kongera uburinzi dukora amasite abiri.”

Mu ngamba abaturage bavuga ko bafashe harimo gukaza amarondo, guhanahana amakuru n’inzego z’umutekano ndetse n’ubuyobozi, no gukoresha ibitabo by’abinjira n’abasohoka.

Niyindagiye Hillarie wo mu Mudugudu wa Ruhinga we avuga ko nk’abagore bagize uruhare runini mu kugarura umutekano no kuwubungabunga.

Ati “Tukagerageza cyane nk’uruhare rwacu abadamu (abagore) tukajya duteka kare mu rugo abatware abacu bakajya ku marondo hakiri kare bafashe amafunguro hakiri kare.”

Mukantwari Léonille we avuga ko ibitero bikimara kuba bagize ubwoba ariko bahumurizwa n’ubuyobozi ku bufatanye n’inzego z’umutekano bahita bibagaruramo imbaraga zo gutanga umusanzu wabo mu kubungabunga umutakano.

Ati “Muri ako kanya (nyuma y’ibitero) hahise haza abayobozi baduha inama baranaduhumuriza duhita twemera tubabwira ko twiyemeje gufatanya na bo gucunga umutekano cyane cyane dutangira amakuru ku gihe; ko umuntu tubonye tutazi wese twahita tubigeza ku buyobozi butwegereye.”

Ubuzima ni ubusanzwe, iterambere riraganje

Kuri ubu mu Murenge wa Nyabimata ibikorwa by’iterambere birimo amashanyarazi mu ngo no ku mihanda; ubuhinzi n’ubworozi birarimbanyije.

Bamwe mu baturage baganiriye na IGIHE bavuga ko nubwo umwanzi yigeze kubinjirana, bitabaciye intege kuko kuri ubu umutekano udadiye kandi bakomeje kwikorera bagamije iterambere rirambye.

Mukandekezi Francine ati “Hari ibikorwa byinshi: hari imidugudu, hari amashuri, hari amashanyarazi. Turanahinga duhuza ubutaka, duhinga igihingwa kimwe na nkunganire yatugezeho. Urumva ni mu rwego rw’ubukungu; tugahingira hamwe tukagerageza kubona umusaruro.”

Sindikubwabo Emmanuel wo mu Mudugudu wa Cyumuzi we avuga ko ubu bahawe amatara yo kumuhanda, abafasha gucunga umutekano ngo hatagira uwiyoberanya akongera kubatesha igihe.

Umunyamabanga Nshingwabikorwa w’Akagari ka Ruhinga, Rubumba François-Xavier, mu Murenge wa Nyabimata, yavuze ko umutekano muke wahabaye wahungabanyije abaturage mu gihe gito ariko kuri ubu nta kibazo gihari.

Ati “Cyahungabanyije (igitero) abaturage mu gihe gito basa n’abahahamutse ariko kubera imikoranire n’inzego z’umutekano n’ubuyobozi bwite bwa Leta bahayeho guhumurizwa. Mu gitondo cyo ku wa 20 Kamena Minisitiri Kaboneka yari ageze hano, abaturage bahita babona uruhare rw’ubuyobozi, ko batari bonyine.”

Rubumba avuga ko abaturage bakimara kubona ko hari abafite imigambi yo kubahungabanyiriza umutekano bakangutse.

Ati “Muri ya mikorere n’imyumvire y’abaturage bamaze guhinduka no kumva uruhare rwabo mu kwirindira umutekano cyangwa ingaruka mbi zo kuwuhungabanya. Bafashe iya mbere mu kurara amarondo, biyemeje gutanga amakuru y’ikintu cyose babona cyaba imbogamizi harimo kumenya uwinjiye mu mudugudu cyangwa udahari.”

Muri Nyabimata hashyizweho amarondo agenzura ayandi kugira ngo gucunga umutekano bikorwe neza.

Mu bindi abaturage bakoze harimo gufatanya n’ubuyobozi gushaka ibikoresho bigezweho by’abakora irondo birimo impuzankano, inkweto, amatoroshi n’ibindi.

Ibigaragaza ko abaturage batekanye

Umunyamabanga Nshingwabikorwa w’Akagari ka Ruhinga, Rubumba François-Xavier, avuga ko hari ibigaragaza ko abaturage batekanye kandi bakomeje ibikorwa bibateza imbere.

Icya mbere ni uko bakomeje ibikorwa byabo by’ubuhinzi n’ubworozi, ubwubatsi n’ibindi.

Ati “Usanga bari kugura amasambu, bari kugura amatungo, inka zo korora bari guhinga ibihingwa biramba, icyo cyayi, amashyamba ni ikintu kidasarurwa mu gihe gito ugasanga abantu baracyabikora.”

Icya kabiri ni uko abaturage bitabira gahunda za Leta nk’uko bisanzwe harimo gukora umuganda, kubaka amashuri, kwitabira inama, gutanga ubwisungane mu kwivuza n’ibindi.

Mu bigo by’amashuri abana bariga kandi abasore n’inkumi bakomeje kubaka ingo nshyashya.

Ibikorwa by’ubucuruzi birakomeje mu dusantere ku manywa no mu masaha y’umugoroba kuko hari amashanyarazi

Umurenge wa Nyabimata utuwe n’ingo 3 765 zibamo abaturage barenga 19 766.

Ingo zigera kuri 99% zifite umuriro w’amashanyarazi harimo akomoka ku muyoboro mugari n’akomoka ku mirasire y’izuba nk’uko ubuyobozi bubitangaza.

Ibikorwa by’amajyambere birimo kugezwa ku baturage harimo umushinga w’amazi meza mu tugari twa Kabere na Gihemvu; umuyoboro w’amashanyarazi mu dusantere twa Rumenero na Mujeni.

Hari kandi ibikorwa byo gutubura ibirayi mu mushinga wa ADENYA no gutunganya amaterasi y’indinganire kuri hagitari 50 mu rwego rwo kurwanya isuri no kongera umusaruro w’ubuhinzi.

Umuyobozi w’Akarere ka Nyaruguru, Habitegeko François, yemeza ko abaturage b’i Nyabimata bagize uruhare runini mu guhashya abagizi ba nabi bari bafite umugambi wo guhungabanya umutekano.

Ati “Uruhare ni runini cyane kuko barara amarondo, batangira amakuru ku gihe bakagenzura abashobora kuba babameneramo; bafatanya cyane n’inzego z’umutekano ndetse n’ubuyobozi.”

Habitegeko avuga ko abaturage bahugiye mu bikorwa by’amajyambere kandi ubuyobozi buzakomeza kubashyigikira bubagezaho ibyo badashobora kwibonera nk’amashanyarazi, amazi meza, amarerero y’abana, imihanda, amavuriro n’ibindi.

Umurenge wa Nyabimata ufite igice kinini gihereye ku ishyamba rya Nyungwe. Kimwe mu byo abaturage birinda ni ukujya muri iryo shyamba gukoreramo ibikorwa bishobora kwangiza ibidukikije.

Nubwo ibitero by’i Nyabimata byahungabanyije abaturage bikiba, inzego z’umutekano zahize bukware ababyigambye barimo Nsabimana Callixte wiyise Sankara wari umuvugizi wa FLN, umutwe w’iterabwoba wigambye kugaba ibyo bitero.

Uwo Nsabimana yarafashwe ubu ari mu butabera, mu gihe igisirikare cya Repuburika Iharanira Demokarasi ya Congo nacyo kigeze kure cyica kinafata mpiri bamwe mu bayobozi bakuru b’uwo mutwe bahungabanya umutekano mu burasirazuba bw’icyo gihugu.

Abana bari mu biruhuko bifatanya n'ababyeyi mu bikorwa birimo kwigishwa umuco, indangagaciro na kirazira
Abatuye i Nyabimata bemeza ko bamerewe neza kandi bafite umutekano
Amashanyarazi yageze no mu ngo z'abaturage
Bakimara kugezwaho amashanyarazi bamwe bahise bagura televiziyo mu ngo zabo
Bamwe mu baturage bo mu Murenge wa Nyabimata bemeza ko kuri ubu umutekano ari wose kandi bakomeje imirimo ya bo
I Nyabimata umutekano ni wose kandi amajyambere ararimbanyije
Iruhande rw'Ibiro by'Umurenge wa Nyabimata hakorera Ikigo cy'Imari Umurenge Sacco
Ibiro by'Umurenge wa Nyabimata mu Karere ka Nyaruguru
Imihanda yo mu Murenge wa Nyabimata ni Nyabagendwa
Ku biro by'Umurenge wa Nyabimata aho abagizi ba nabi bagabye igitero umwaka ushize
Ku mihanda y'i Nyabimata hashyizweho amatara
Kugezwaho amashanyarazi ni kimwe mu byo abatuye i Nyabimata bishimira
Mu Gasantereka Kamirabagenzi wenda kugera i Nyabimata_ abaturage bari mu bikorwa by'iterambere bitandukanye
Mu Murenge wa Nyabimata abaturage bahawe amatara ku mihanda abamurikira nijoro
Ukigera ku Biro by'Umurenge wa Nyabimata ubona ahari imihigo abaturage biyemeje gufatanya n'ubuyobozi kwesa
Umunyamabanga Nshingwabikorwa w’Akagari ka Ruhinga,Rubumba François-Xavier, avuga ko umutekano muke wahabaye wahungabanyije abaturage mu gihe gito ariko kuri ubu nta kibazo gihari

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza