00:00:00 IGIHE NETWORK KN KINYARWANDA EN ENGLISH FR FRANCAIS

Nyiramandwa yashyinguwe, Perezida Kagame amushimira urukundo rw’igihugu rwamuranze

Yanditswe na IGIHE
Kuya 31 Ukuboza 2022 saa 07:07
Yasuwe :

Nyiramandwa Rachel, umukecuru w’imyaka 110 wari inshuti ya Perezida Paul Kagame yashyinguwe kuri uyu wa Gatandatu nyuma y’umunsi umwe yitabye Imana.

Uyu mukecuru yashyinguwe mu Murenge wa Gasaka muri Nyamagabe aho yari atuye, nyuma y’uko yitabye Imana mu ijoro rishyira kuri uyu wa Gatanu tariki 30 Ukuboza, azize izabukuru.

Guverineri w’Intara y’Amajyepfo, Kayitesi Alice niwe wasomye ubutumwa bwa Perezida Kagame n’umuryango we, wamushimiye urukundo rw’igihugu rwamuranze.

Ati “Umuryango wa Perezida wa Repubulika Paul Kagame, bababajwe no kumenya inkuru y’akababaro y’urupfu rwa Nyakwigendera Nyiramandwa Rachel. Nyakwigendera Nyiramandwa Rachel azibukirwa ku mirimo myiza ya kibyeyi ndetse no guhora yifuriza ineza igihugu cyamubyaye nkuko yagiye abigaragaza mu biganiro bye ndetse no mu minsi ye ya nyuma.”

“Mu izina rye bwite n’umuryango we, nyakubakwa Perezida wa Repubulika aramenyesha umuryango wa Nyiramandwa Rachel ko bifatanyije nabo kandi awifurije gukomera muri ibi bihe by’akababaro, Imana imuhe iruhuko ridashira.”

Madamu Jeannette Kagame ni umwe mu bifurije iruhuko ridashira Nyiramandwa. Abinyujije kuri Twitter ye yagize ati “Ubupfura, ubudaheranwa no gukunda u Rwanda byakuranze, byanyuze benshi. Ruhukira mu mahoro.”

Nyiramandwa ni umukecuru wakundaga cyane umukuru w’igihugu n’umuryango we, ndetse yagiye abimugaragariza kenshi ubwo yabaga yasuye Akarere ka Nyamagabe.

Byatumye muri Kanama uyu mwaka ubwo Perezida Kagame yasuraga Nyamagabe, asura uwo mukecuru iwe mu rugo bamara umwanya baganira.

Mbere yo gutabaruka ubwo yari mu bitaro bya Kaminuza bya Butare (CHUB), Nyiramandwa yongeye kwifuriza imigisha Perezida Kagame n’umuryango we, amushimira ibyo yamukoreye.

Yagize ati “Intore izirusha intambwe, yankoreye ibyiza byinshi, yangiriye neza kenshi, yambereye Imana y’i Rwanda hamwe na Madamu w’iwe ari we rugori rwera.”

Nyiramandwa ni umukecuru wakundwara na benshi baba abato n’abakuru, abamuzi n’abatamuzi dore ko n’uwabonaga ifoto ye, urugwiro n’ubumuntu yabimusomaga mu maso.

Aheruka kubwira IGIHE ko yavutse ko ngoma y’Umwami Yuhi V Musinga hagati ariko nyina yitaba Imana akiri muto bituma ajya kurerwa na Nyirasenge ari na we wamwise izina rya ‘Nyiramandwa’.

Uyu mukecuru warokotse Jenoside yakorewe Abatutsi, yavuze ko guhera mu myaka ya 1959 umuryango we wibasiwe uzira ubwoko, biba bibi nyuma y’uko u Rwanda rubonye ubwigenge kuri Repubulika ya mbere n’iya kabiri kuko umuryango we wishwe.

Yavuze ko mu 1994 muri Jenoside yakorewe Abatutsi ari bwo umugabo we yishwe, hicwa n’abana be batatu. Nyiramandwa yarokokanye n’umukobwa we bari bakibana, kuri ubu ufite imyaka 78.

Ubwo Nyiramandwa yashyingurwaga mu cyubahiro kuri uyu wa Gatandatu
Abaturanyi n'inshuti baje gusezera kuri Nyiramandwa witabye Imana kuri uyu wa Kane
Guverineri Kayitesi Alice ni umwe mu bifatanyije n'umuryango wa Nyiramandwa muri ibi bihe by'akababaro

Amafoto: RBA


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .