Nyaruguru: Umushoramari bazaniwe na Perezida Kagame akomeje gufasha abahinzi gusezerera ubukene

Yanditswe na Prudence Kwizera
Kuya 7 Werurwe 2020 saa 08:38
Yasuwe :
0 0

Bamwe mu bahinzi by’icyayi bo mu Karere ka Nyaruguru bashimira Perezida Kagame Paul wabazaniye umushoramari ubaguriza amafaranga yo guhingisha icyayi bakazamwishyura cyeze; bakemeza ko batangiye kubona inyungu muri byo.

Uwo mushoramari yabazaniye ni uwo mu gihugu cy’u Bwongereza witwa Sir Ian Wood; abaguriza amafaranga yo guhinga icyayi binyuze mu mushinga we witwa SCON (Services Company Outgrowers Nyaruguru Ltd).

Mu mwaka wa 2017 ni bwo yatangiye kubaha inguzanyo bazajya bishyura nta nyungu kandi bakayishyura ari uko icyayi kimaze kwera.

Bamwe muri abo bahinzi b’icyayi babwiye IGIHE ko mu mwaka wa 2019 icyayi cyari cyamaze kwera batangira kukigurisha kuko ubuyobozi bwa SCON bwababwiye ko bazatangira kwishyura inguzanyo nyuma yo kubaka uruganda rushya rugitunganya.

Mukarwego Cancilida ati “Icyayi nahinze cyatangiye kwera mu 2019 ku buryo ngisarura nkajya kukigurisha ku ruganda rwa Muganza-Kivu amafaranga nkayikenuza. Ubu maze kuvugurura inzu yanjye kandi ndateganya kuguramo n’inka yo korora. Ku kilo kimwe cy’amababi baduha amafaranga 329.”

Ngendahayo Théoneste we avuga ko amaze kugura inka kandi urugo rwe rutakigira ikibazo cy’ibiryo n’ibikoresho.

Ati “Amafaranga nakuyemo nayongereyeho andi ngura inka yo korora kandi ubu nta kibazo cy’ibyo kurya tukigira mu rugo, ibikoresho byo mu rugo na byo narabiguze ku buryo nta kibazo cy’ubukene kiri iwanjye. Njyewe icyo navuga ni ugushimira Perezida wacu watuzaniye abaduteza imbere badukura mu bukene.”

Abahinzi b’icyayi baganiriye na IGIHE bemeza ko mbere uwo mushoramari ataraza babagaho mu bukene bitewe n’uko amasambu yabo yari yaramezeho ishinge atabaha umusaruro.

Bavuga ko bibwiraga ko nta gihingwa na kimwe gishobora kuhera bitewe n’uko hari hameze nabi.

Umuyobozi wa SCON mu Karere ka Nyaruguru, Hategekimana Vincent, avuga ko biyemeje ko umwaka wa 2020 uzarangira bamaze gutanga inguzanyo ya 450 225 000 Frw ku bahinzi 900 bafite ubuso bwa ha 750.

Ati “Tumaze iminsi duhugura abahinzi 167 biyongera ku bandi barenga 700; twiyemeje ko umwaka wa 2020 uzarangira tumaze guha inguzanyo abahinzi 900 bafite hegitali 750; tuzabaha 450 225 000 Frw.”

Hategekimana yasobanuye ko kuri ubu umuhinzi wejeje icyayi yemerewe kukigurisha amafaranga akayakoresha kuko igihe cyo kwishyura inguzanyo kizatangira kwitabwaho ari uko kimaze kwera ku bwinshi ndetse hubatswe n’uruganda rushya rugitunganya.

Ati “Twabemereye ko bazatangira kwishyura ari uko icyayi kimaze kuba cyinshi byibura haboneka umusaruro ungana na toni 25 ku munsi. Nikimara kwera ku bwinshi ni bwo ikigo Unilever cyo mu Bwongereza kizubaka uruganda bazajya bagurishaho umusaruro.”

Umuyobozi ushinzwe ibikorwa bya SCON Ltd, Bihogo Etienne, yavuze ko umushinga wabo ari mugari kuko bateganya ko uzamara imyaka 20 bamaze guha inguzanyo abahinzi b’icyayi 7 000 kandi bahinze icyayi ku buso bwa hegitali ibihumbi birindwi.

Uwo mushinga watangiriye mu Mirenge ya Kibeho, Mata, Cyahinda na Munini ariko muri uyu mwaka wa 2020 uzakomereza mu Murenge wa Busanze.

Abahawe inguzanyo mu 2017 icyayi cyabo cyatangiye kwera
Abahinzi b'icyayi bamaze iminsi bahabwa amahugurwa abafasha kumenya uko icyayi gihingwa n'uko cyitabwaho
Abahinzi b'icyayi bo mu Karere ka Nyaruguru bavuga ko batangiye gusezerera ubukene
Abahinzi by’icyayi bo mu Karere ka Nyaruguru bashimira Perezida Kagame Paul wabazaniye umushoramari ubateza imbere
Biteganyijwe ko umwaka wa 2020 uzarangira bamaze guha inguzanyo abahinzi 900 bafite hegitali 750
Umuyobozi ushinzwe ibikorwa bya SCON Ltd, Bihogo Etienne, yavuze ko umushinga wabo ari mugari kuko bateganya ko uzamara imayaka 20
Uwo mushinga watangiriye mu Mirenge ya Kibeho, Mata, Cyahinda na Minini ariko uzakomereza no mu Murenge wa Busanze

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .