00:00:00 IGIHE NETWORK KN KINYARWANDA EN ENGLISH FR FRANCAIS

Nyaruguru: Uko umusaruro w’ubuhinzi wiyongereye nyuma yo kuyoboka ishwagara yarumbuye ubutaka

Yanditswe na Prudence Kwizera
Kuya 20 April 2022 saa 10:32
Yasuwe :

Abahinzi bo mu Karere ka Nyaruguru bavuga ko nyuma y’aho batangiriye guhinga bagashyira ishwagara mu butaka, umusaruro wazamutse ku buryo basigaye beza bakihaza mu biribwa bagasagurira n’amasoko.

Mu 2013 ni bwo abahinzi bo mu Karere ka Nyaruguru bagaragarije Perezida Kagame ko ubutaka bwabo busharira bigatuma batabona umusaruro utubutse, abemerera ishwagara.

Mu 2015 batangiye kuyihabwa ku buryo bwa ‘nkunganire’, uko imyaka ishira abayifata bakiyongera. Buri muhinzi yiyishyuriraga ikiguzi cya 50% Leta ikamutangira asigaye.

Ibihingwa byatoranyijwe mu Karere ka Nyaruguru n’ubuso bihingwaho tugendeye ku gihembwe cy’ihinga cya 2022 B, ni ibirayi bihingwa ku buso bwa hegitari zigera ku 8200; ibigori (7400); ibishyimbo (41000); ingano (5000); imboga (350) n’urutoki nibura ruhingwa kuri hegitari 2500.

Muri ibyo bihingwa nibura buri mwaka hakoreshwa toni 6500 z’ishwagara mu kubihinga kugira ngo igabanye ubusharire bw’ubutaka.

Umuyobozi w’Akarere ka Nyaruguru Wungirije Ushinzwe Iterambere ry’Ubukungu, Gashema Janvier, yabwiye IGIHE ko abahinzi bamaze kumenya ibyiza byo guhingisha ishwagara, bityo biteganyijwe ko iyo bakoresha buri mwaka izajya yiyongera.

Uko umusaruro wazamutse mu mibare

Imibare itangwa n’ubuyobozi bw’Akarere ka Nyaruguru igaragaza ko ishwagara yazamuye umusaruro mu buhinzi ku buryo bugaragara.

Ku bigori umusaruro wavuye kuri toni 2,5 ugera kuri 4,8 kuri hegitari imwe naho ku birayi uva kuri toni hafi 15 ugera kuri toni 26,7 gusa hari n’aho ugera kuri toni 30 kuri hagitari imwe.

Ku bishyimbo bavuye kuri toni imwe bageza kuri toni enye kuri hagitari imwe naho ku ngano bava kuri toni ebyiri bezaga bageza kuri toni 3,6 kuri hegitari imwe.

Kuba Akarere ka Nyaruguru gafite ubutaka busharira ubuyobozi ntibubibona nk’ikibazo kuko ahubwo ari igisubizo kuko bweraho ibihingwa ngengabukungu bitanga amafaranga menshi birimo icyayi n’ikawa.

Abahinzi mu byishimo

Bamwe mu bahinzi bo mu Karere ka Nyaruguru bishimira ko ishwagara ibageraho ku gihe kimwe n’izindi nyongeramusaruro kandi basigaye babona umusaruro utubutse.

Nsanzimana Japhet wo mu Murenge wa Ruheru avuga ko iwe batakibura ibyo kurya kubera guhinga mu materasi y’indinganire akoresheje inyongeramusaruro zirimo ishwagara.

Ati “Umusaruro nabonaga wariyongereye cyane kubera ko ubutaka butagitwarwa n’isuri, ishwagara n’ifumbire iyo ubishyizemo bigumamo. Iyo uhinze imbuto nziza ukayihinga ahantu heza mu murima uteguye neza bizana impinduka zikomeye; uyu munsi tumeze neza, ibiribwa birahari. Ibirayi biri hano ni byinshi birashimishije cyane.”

Mukagahima Athanisie wo mu Murenge wa Cyahinda avuga ko asigaye yeza ibirayi agasagura ibyo kujyana ku isoko kandi mbere atarabonaga n’ibyo arya bimuhagije.

Ati “Kuva aho abayobozi batuzaniye inyongeramusaruro zirimo ishwagara n’ifumbire mvaruganda n’imbuto z’indobanure, umusaruro w’ibirayi warabonetse ku buryo tubona ibyo kurya ndetse tukajyana no ku isoko. Mbere twarahingaga bikanga kwera kubera ko twapfaga guhinga nta fumbire, nta n’imbuto nziza dufite.”

Politiki mbi yari yarakenesheje Nyaruguru

Mu myaka ya mbere ya 1994 abaturage bo mu Karere ka Nyaruguru babagaho mu bukene bukabije ku buryo bakundaga gusuhuka bakajya gushakisha ibyo kurya ahandi [ibyo bitaga kudeya] cyangwa bakicwa n’inzara.

Abatuye muri ako Karere bavuga ko ibyo byaterwaga n’imiyoborere mibi yari mu gihugu aho byavugwaga ko abaturage b’aho ari abanebwe batazi gukora.

Amateka agaragaza ko mbere ya 1994 hari impaka zabagaho z’abavuga ko abaturage bakomoka muri Perefegitura ya Gikongoro [Nyaruguru na Nyamagabe by’ubu] ari abanebwe ko ari yo mpamvu bicwaga n’inzara, abandi bakavuga ko ari ubuyobozi bubi bubitera.

Abahinga icyayi nabo bafashwa kubikora kijyambere

Mu Karere ka Nyaruguru umusaruro uva mu buhinzi bw’icyayi urebewe mu nganda eshatu zigitunganya ugera hafi kuri toni 5000 ku mwaka.

Kuri ubu hari umushinga w’umushoramari witwa ‘Unliver Tea Company’ watangiye guhinga icyayi hakoreshejwe ikoranabuhanga kandi agiye kubaka uruganda runini ruzajya rutunganya umusaruro ungana na toni ibihumbi 10 ku mwaka.

Ni umushinga witezwe impinduka zikomeye mu kuzamura imibereho myiza y’abaturage kuko utabarirwa mu ngano gusa ahubwo harebwa n’abaturage bahabwamo akazi haba mu buhinzi mu kwita ku cyayi no mu gukora mu ruganda.

Abahinzi b’icyayi bo mu Karere ka Nyaruguru bavuga ko mbere bagihingaga mu buryo busanzwe ariko kuri ubu bagihinga kijyambere kikabaha umusaruro mwiza.

Havugimana Placide avuga ko yahinze icyayi ku isambu ye ifite ubuso bwa hegitari imwe nyuma yo guhabwa inguzanyo n’umushinga witwa SCON azishyura nta nyungu atanze.

Ati “SCON yampaye inguzanyo y’ibihumbi 900 Frw ubu icyayi natangiye kugisarura nkigurisha ku ruganda. Isambu nagiteyeho yari imaze imyaka myinshi yaramezeho ishinge nta kintu na kimwe imariye. Icyayi nkitezeho iterambere kandi ndateganya guhinga ikindi.”

Ubuyobozi bw’Akarere ka Nyaruguru buvuga ko ikibazo cy’inzara cyakemutse mu baturage kandi n’umusaruro wabo ufite isoko.

Bimwe mu bihingwa beza bigira uruhare mu guteza imbere gahunda yo kugaburira abana ku ishuri (School Feeding) kuko ari byo bikoreshwa.

Mu rwego rwo gukomeza guteza imbere ubuhinzi, kugeza ubu mu Karere ka Nyaruguru hamaze gutunganywa ibishanga byinshi hacibwa n’amaterasi y’indinganire ku misozi ihanamye.

Mu karere ka Nyarugur hasigaye hera ibirayi ku bwinshi kubera ko babihinga kijyambere bakoresheje inyongeramusaruro zirimo n'ishwagara
Aha ni mu Murenge wa Muganza mu Karere ka Nyaruguru muri imwe mu mirima abahinzi batuburiramo imbuto y'ibirayi
Ibigori nabyo biri mu bihingwa byera neza mu Karere ka Nyaruguru
Ifu y'ibigori ikorerwa mu Karere ka Nyaruguru igurishwa hirya no hino mu gihugu
Bitewe n'uko Akarere ka Nyaruguru bafite ubutaka bwera icyayi, abahinzi bahujwe n'umushoramari ubafasha kubona umusaruro utubutse
Abahinzi bo mu Karere ka Nyaruguru batojwe guhinga kijyambere none umusaruro wariyongereye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .