Nyaruguru: Uko Nyabyenda yatangiye ubucuruzi amaze kumugara; BDF ikamutera ingabo mu bitugu

Yanditswe na Prudence Kwizera
Kuya 20 Mutarama 2020 saa 02:35
Yasuwe :
0 0

Nyabyenda Cyprien wo mu Murenge wa Kibeho mu Karere ka Nyaruguru, avuga ko yatangiye ubucuruzi buciriritse nyuma yo kumugazwa n’impanuka y’imodoka; Ikigega cy’Ingwate, BDF, kimutera ingabo mu bitugu yagura ibikorwa bye.

Ni umugabo w’imyaka 44 y’amavuko agendera mu igare ry’abafite ubumuga kuko yakoze impanuka y’imodoka amugara amaguru. Afite umugore babyaranye umwana umwe.

Akorera ubucuruzi bwe muri Santere ya Kibeho; acuruza amasabune, amasafuriya, amavuta yo guteka n’ayo kwisiga, ibitenge, amakayi, n’ibindi.

Akimara gukora impanuka mu 2010 ikamusigira ubumuga, yahise atekereza icyo yakora ashoboye ahita atangira ubucuruzi ahereye ku mafaranga ibihumbi 500 Frw.

Ati “Nishakashatsemo ubushobozi nkimara gukora impanuka nshaka ukuntu najya ncuruza utuntu tumwe na tumwe nirinda kugira ngo njye mu muhanda nsabirize; mbere yo gukora impanuka nari umuhinzi. Ntangira nashoyemo ibihumbi 500 Frw.”

Nyuma yaho atangiriye ubucuruzi mu mwaka wa 2017 yahuye n’abakozi b’Ikigega BDF bamugira inama yo kwagura ibikorwa bye bemera no kubimufashamo.

Ati “Bambwiye ko bafite umushinga wo gufasha abantu bafite ubumuga mu rwego rwo kugira ngo babagurize bakore noneho bazishyure kimwe cya kabiri andi bayakoreshe. Bampuje na Sacco ihita impa amafaranga ibihumbi 500.”

Nyabyenda akimara gufata ayo mafaranga yaguye ibikorwa bye ku buryo mu myaka ibiri gusa yari yamaze kwishyura inguzanyo.

Yemeza ko iyo nguzanyo yahawe iri kumwe n’inkunga yamufashije cyane kuko hari ibicuruzwa yongereye mu iduka rye bituma abakiriya benshi bamugana.

Ati “Nka biriya bitenge ubona nabyongeyemo ari uko mbonye ayo mafaranga, nagiye nongeramo n’ibindi abakiriya bakenera nk’itabi, amasafuriya n’ibindi.”

Nyuma yo kubona ko inguzanyo yahawe imugiriye akamaro kuri ubu avuga ko yasabye kongera kugurizwa bityo akaba ategereje igisubizo.

Afite icyizere ko Ikigega BDF kizongera kumufasha kubona indi nguzanyo kuko iyo yahawe mbere yayishyuye neza nk’uko amasezerano yabiteganyaga.

Atanga inama ku bantu bafite ubumuga yo gutinyuka bagakora imishinga ibavana mu bukene bakiteza imbere kandi bakagana ikigega BDF kikabagira inama.

Ati “Hari abamugara bakumva ko ubuzima burangiye ariko kumugara si ugupfa kuko iyo wamugaye ukenera kurya no kwambara ndetse no kubaho; ni byiza rero gushaka icyo ukora ushoboye.”

Mu Karere ka Nyaruguru, BDF ifasha abantu mu byiciro bitatu harimo abafashwa kubona inguzanyo bagatangirwa ingwate bakazishyura; urubyiruko ruhabwa ibikoresho nk’inkunga yo gutangiza imishinga nyuma yo kwiga imyuga; hari n’abahabwa inguzanyo n’inkunga mu mishinga ishingiye ku buhinzi.

Umukozi wa BDF mu Karere ka Nyaruguru, Bagaza Henry, avuga ko mu mwaka wa 2019 abafashijwe muri ibyo byiciro bose ari abantu 180.

Ikigega cy’Ingwate BDF (Business Development Fund) cyashinzwe mu 2011 na Banki y’u Rwanda Itsura Amajyambere, BRD.

By’umwihariko BDF iha amahirwe abagore n’urubyiruko kurusha abandi, kuko ni bo bahabwa ubufasha bwo kubemerera kubishingira nk’ingwate ku kigero cya 75%, mu gihe abagabo bo bemererwa kwishingirwa ku kigero cya 50%.

Akimara kubona inguzanyo yahise arangura ibicuruzwa abamugana bakenera
Iduka rya Nyabyenda ririmo ibicuruzwa bitandukanye
Iyo nkunga yahawe iri kumwe n'inkunga yaramufashije kuko hari ibicuruzwa yongereye mu iduka rye bituma abakiriya benshi bamugana
Mu iduka rye harimo ibicuruzwa nk'amasabune amavuta amabahasha n'ibindi
Nyabyenda avuga ko Ikigega BDF cyamuteye ingabo mu bitugu bituma ubucuruzi bwe bugenda neza
Ubucuruzi bwe abukorera muri Santere ya Kibeho mu Karere ka Nyaruguru
Umushinga w'ubucuruzi yawutangiye mu 2010 nyuma yaho impanuka y'imodoka imusigiye ubumuga
Yemeza ko Ikigega BDF cyamufashije kubona inguzanyo yagura ibikorwa bye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza