Nyaruguru: Hubatswe ikiraro cyo mu kirere cya Miliyoni 117 Frw ku mugezi watezaga ibibazo

Yanditswe na Prudence Kwizera
Kuya 17 Gashyantare 2020 saa 02:47
Yasuwe :
0 0

Mu Karere ka Nyaruguru hubatswe ikiraro cyo mu kirere gifasha abaturage kwambuka umugezi w’Agatobwe, umaze igihe wuzura ugatwara abantu ugahagarika n’ubuhahirane kubera imiterere yawo ituma amazi yuzura mu bihe by’imvura.

Uwo mugezi w’Agatobwe uhuza utugari twa Yaramba na Murama two mu Murenge wa Ngera; iyo wuzuye mu bihe by’imvura uhagarika ubuhahirane hagati y’abaturage ndetse ugatuma n’abanyeshuri batambuka ngo bajye kwiga.

Cyubatswe mu buryo bwa kijyambere gitwara 117,080,000 Frw; Akarere ka Nyaruguru katanze arenga Miliyoni 37 Frw naho umufatanyabikorwa mu kubaka amateme yo mu kirere witwa Brige Prosperity atanga arenga Miliyoni 78 Frw.

Umuyobozi wungirije ushinzwe imibereho myiza y’abaturage mu Karere ka Nyaruguru, Kayitesi Collette, yavuze ko icyo kiraro bacyubatse kuko mu gihe cy’imvura uwo mugezi watezaga ibibazo.

Ati “Mu gihe cy’imvura uriya mugezi wajyaga wuzura; iyo huzuye uduteme turatwarwa bigahagarika ubuhahirane kuko abantu batabashaga gutambuka.”

Bamwe mu baturage bo mu Murenge wa Ngera bashimye ubuyobozi bwabahaye icyo kiraro bavuga ko babangamirwaga no kuhanyura kuko hari hameze nabi.

Munyanziza Alexis ati “Iyo imvura yagwaga twatinyaga kuhanyura kuko uduteme twabaga twarengewe hari n’abantu bigeze kujya barohamamo. Twari twasabye ubuyobozi kureba icyakorwa none barakitwubakiye turabashima cyane.”

Mu munsi ishize mu Karere ka Nyaruguru hatashywe ikindi kiraro cyo mu kirere mu Murenge wa Nyabimata cyubatswe ku mugezi Rwerere na wo wakundaga guteza ibibazo mu gihe cy’imvura; cyatwaye arenga Miliyoni 41 Frw.

Hari n’ikindi cyubatswe Murenge wa Ruramba ku mugezi wa Mwogo cyatwaye arenga Miliyoni 24 Frw.

Ibyo biraro byose binyurwaho n’abanyamaguru hamwe n’ibinyabiziga bito nka moto n’igare.

Ubuyobozi bw’Akarere ka Nyaruguru buvuga ko buzakomeza kubaka ibiraro n’amateme ku migezi yose iteza ibibazo kugira ngo abaturage babashe guhahirana nta mbogamizi.

Abaturage batangiye kukinyuraho nta mpungenge kuko cyubatswe mu buryo bukomeye
Abaturage bo mu utugari twa Yaramba na Murama bishimiye ikiraro bubakiwe
Bamwe mu baturage bo mu Murenge wa Ngera bashimye ubuyobozi bwabahaye icyo kiraro bavuga ko babangamirwaga no kuhanyura kuko hari hameze nabi
Iki kiraro cyubatswe mu buryo bwa kijyambere gitwara 117,080,000 Frw
Iki kiraro cyubatswe ku bufatanye bw'Akarere ka Nyaruguru n'abafatanyabikorwa
Abaturage bishimiye kujya banyura ku kiraro nta mbogamizi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .