Nyaruguru: Abatuye Umurenge wa Nyabimata bahawe amashanyarazi urugo ku rundi

Yanditswe na Emma-Marie Umurerwa
Kuya 20 Gicurasi 2019 saa 11:28
Yasuwe :
0 0

Gucana agatadowa byabaye umugani mu Murenge wa Nyabimata wo mu Karere ka Nyaruguru, kuko buri rugo rurimo umuriro w’amashyanyarazi gahunda ubuyobozi buvuga ko ikomereje no mu yindi mirenge.

Mu cyumweru gishize nibwo abaturage bo mu Murenge wa Nyabimata yahawe umuriro w’amashyanyarazi bari baremerewe na Perezida Kagame.

Abatuye mu Murenge wa Nyabimata, barashima byimazeyo Parezida Kagame, aho bamwe bavuga ko iterambere n’imibereho yabo byatangiye guhinduka kubera umuriro w’amashanyarazi batangiye kubyaza umusaruro.

Umuyobozi w’Akarere ka Nyaruguru, Habitegeko François, yabwiye IGIHE ko igikorwa cyo guha amashanyarazi abaturage bose gikomereje no mu yindi mirenge.

Ati “Abaturage bo mu Murenge wa Nyabimata bafite amashyanyarazi ibintu bimeze neza barishimye, ni umuriro bemerewe na Perezida wa Repubulika mu bihe bitandukanye.”

“Akarere ka Nyaruguru gatuwe n’imiryango isaga ibihumbi 60, abari bafite umuriro w’amashyanyarazi ni 33% gusa. Ubu ariko imibare yiyongereye kandi izakomeza kwiyongera kuko intego dufite ni uko mu 2021 abafite amashanyarazi bazaba ari 100%.”

Ku kibazo cy’abaturage usanga batuye mu nzu zishaje cyane cyangwa mu manegeka badafite n’ubushobozi bwo kwigurira umuriro w’amashanyarazi igihe uwo bahawe washizemo, Habitegeko yavuze ko nabo batekerejweho.

Ati “Hari aho usanga koko hari abagituye mu nzu zitajyanye n’icyerekezo, ariko ntabwo wabuza umwana waho kwiga. Amashyanyarazi ni ayo gufasha abana kwiga neza batigira ku gatadowa. Uko duha abaturage amashyanyarazi niko tubafasha no gutura neza tuzamura imibereho yabo, ni gahunda zikomatanyije. Abadafite ubushobozi bwo kwigurira umuriro, bo bahabwa amashyanyarazi akomoka ku mirasire y’izuba.”

Guverinoma y’u Rwanda yiyemeje ko gahunda yayo 2017- 2024 izasiga abanyarwanda bose bagejejweho amazi meza n’amashyanyarazi, hagamijwe ko imibereho y’abagize umuryango ikomeza kuba myiza.

Impuzandengo y’ingo mu Rwanda zifite amashanyarazi iheruka gutangazwa muri Gashyantare 2019 igaragaza ko bangana na 51%, barimo 37% bafatira ku muyoboro mugari.

Ubu u Rwanda rukaba rufite ubushobozi bwo gutunganya amashanyarazi angana na Megawatt 221. Intego ni uko buri muturarwanda azaba afite amashanyarazi bitarenze mu 2024.

Indi nkuru wasoma:Nyaruguru: Akanyamuneza ku batuye mu ngo zisaga 5000 zahawe amashanyarazi mu mwaka n’igice

Abatuye mu Murenge wa Nyabimata bose bahawe amashanyarazi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza