00:00:00 IGIHE NETWORK KN KINYARWANDA EN ENGLISH FR FRANCAIS

Nyaruguru: Abana barenga 2300 basubijwe ku ishuri mu minsi ibiri

Yanditswe na Prudence Kwizera
Kuya 23 January 2022 saa 07:33
Yasuwe :

Nyuma yaho hatangijwe ubukangurambaga bwo gushakisha abanyeshuri batatangiye ishuri mu Karere ka Nyaruguru, mu minsi ibiri hamaze kugaruka kwiga abagera ku 2 372.

Mu minsi ishize ku wa 19 Mutarama 2022 mu Karere ka Nyaruguru habarurwaga abana 4 034 batarasubira kwiga kuva igihembwe cya kabiri cy’uyu mwaka w’amashuri cyatangira.

Icyo gihe hari hatangijwe ubukangurambaga bugamije kujya kubashaka mu ngo no kumenya ibibazo byatumye batajya ku ishuri kugira ngo bikemurwe ariko bajye kwiga.

Umuyobozi w’Akarere ka Nyaruguru wungirije ushinzwe imibereho myiza y’abaturage, Byukusenge Assoumpta, yabwiye IGIHE ko mu bukangurambaga bakoze ku bufatanye n’izindi nzego, abana benshi bamaze kugaruka ku ishuri.

Ati “Ubu uyu munsi abana bagera mu 2 372 bagarutse ku ishuri mu bukangurambaga twakoze. Twajyaga mu ngo kureba impamvu ituma bataza kwiga tukaganira n’ababyeyi, abafite ibibazo tugafatanya kubikemura ariko umwana akajya ku ishuri.”

Ikibazo nyamukuru yagaragaje basanze gituma abana batajya ku ishuri ku gihe ni uko usanga ababyeyi batabitaho ngo babagurire ibikoresho n’imyenda y’ishuri.

Abana bagiye basanga badafite amakayi, amakaramu n’imyenda y’ishuri babafashije kubibona bagaruka kwiga.

Yavuze ko kugeza ubu hasigaye abana 1 662 bataraza ku ishuri ariko nabo mu cyumweru kimwe bazaba bagarutse kwiga kuko ubukangurambaga bukomeje.

Muri ubwo bukangurambaga hari abana bagera kuri 44 biga muri mashuri yisumbuye basanze baragiye kwiga ku bindi bigo by’amashuri, hari n’abandi bagera 35 barwaye bityo bakaba bari kwivuza kugira ngo bagaruke kwiga.

Ati “Ubukangurambaga twakoze mu minsi ibiri tubasanga mu ngo bwatanze umusaruro kuko n’ababyeyi bahinduye imyumvire bumva agaciro umwana w’u Rwanda afite ndetse n’ibyiza by’ishuri.”

Mu mashuri y’incuke hamaze kugaruka kwiga abana 213, mu mashuri abanza ni 1 159, mu mashuri yisumbuye hagarutse 215 biga bataha n’abagera 51 biga bacumbika ku ishuri n’abandi 24 biga imyuga.

Bamwe mu bana biga mu Rwunge rw’Amashuri Saint Paul Kibeho baherutse kubwira IGIHE ko bimwe mu bituma abanyeshuri bava mu ishuri harimo kuba ababyeyi batabitaho ngo babahe ibikoresho, abangavu baterwa inda n’ubukene buri mu miryango.

Bagaragaje kandi ko hari ababyeyi babakura mu ishuri bakabakoresha imirimo yo mu rugo irimo kwita ku matungo cyangwa guteka.

Abana barenga 2 000 mu bari batarajya ku ishuri mu Karere ka Nyaruguru bamaze kugaruka kwiga
Byukusenge yagiriye inama abanyeshuri ko kwiga ari byiza bizatuma bagira ejo hazaza heza
Umuyobozi w’Akarere ka Nyaruguru wungirije ushinzwe imibereho myiza y’abaturage, Byukusenge Assoumpta, hamwe n'abandi bayobozi mu bikorwa byo gukurikirana abana batagarutse ku ishuri

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .