00:00:00 IGIHE NETWORK KN KINYARWANDA EN ENGLISH FR FRANCAIS

Nyaruguru: Ababyeyi bakora mu mirima y’icyayi bashyiriweho amarerero yo gusigamo abana

Yanditswe na Mukahirwa Diane
Kuya 30 September 2021 saa 03:00
Yasuwe :

Akarere ka Nyaruguru gafatanyije n’inganda zihinga icyayi byashyizeho amarerero atatu, ababyeyi bazikoreramo bazajya basigamo abana kugira ngo barusheho kwitabwaho, na bo bakore akazi kabo neza.

Aya marerero yashyizweho biturutse ku gitekerezo ubuyobozi bw’akarere bwagize bugisangiza inganda eshatu z’icyayi zikorera muri Nyaruguru zirimo urwa Mata, Nshili n’urwa Muganza Kivu.

Yubatswe ku buryo azajya aba arimo ibyangombwa byose abana bakeneye nk’ibibatunga, ibikinisho n’ababitaho bituma bagira imikurire myiza n’ababyeyi babo bagakora batuje.

Mu kiganiro na IGIHE, Umuyobozi w’Akarere ka Ngororero, Gashema Janvier, yavuze ko batekereje gushyiraho aya marerero kugira ngo bafashe ababyeyi gutanga umusaruro uhagije ndetse n’abana babashe gukura neza.

Yagize ati “Mu mirima y’icyayi hakoramo abagore batandukanye haba abahinga, abasoroma n’ibindi mu kubireba tukabona batabona umubyizi uhagije no gukorana abana bibagora, hashyirwaho aho abana bazajya basigwa bigatuma umwana akura neza n’umubyeyi agatanga umusaruro uhagije.”

Akarere ka Nyaruguru gashyize imbere gahunda y’amarerero kuko babona ko itanga umusaruro ku bana n’ababyeyi, umwana wakuriye mu irerero abasha gufashwa mu mikurire myiza n’ubwonko bwe bugakangurwa hakiri kare.

Muri aka karere buri mudugudu ufite amarerero atatu ndetse bashyizweho n’umwihariko wo kugira amarero agendanwa ‘Mobile ECD’ kugira ngo ababyeyi bari mu mirimo irangira ahantu ahajyanywe babone aho gusiga abana.

Meya Gashema yavuze ko ubu bwoko bw’amarerero babushyira ahantu hari ibikorwa rusange bihuje abantu byarangira bakayajyana aho byimukiye mu gufasha ababyeyi babikoramo gutanga umusaruro.

Yagize ati “Dufite na ECD Mobile aho dufata amahema tukayajyana ahantu bari nko gucukura amaterasi tugashyiramo amata n’udukinisho tw’abana, aho umwana agasigara umubyeyi agahinga atuje ha hantu harangira tukimurira ahandi.”

Yakomeje agira ati “Bifasha umubyeyi cyane kuko abasha gutanga umusaruro atabanje kujya kwita ku mwana ndetse n’umwana akaba atuje kandi nawe ntaba agomba guhiganwa agomba kurerwa neza.”

Mu Karere ka Ngororero habarirwa amarerero y’abana agera kuri 996.

Abana bazajya basigwa hanyuma bitabweho mu gihe ababyeyi bari mu mirima
Abana bashyiriweho ahantu hihariye bazajya baruhukira
Amarerero y'abana ashyirwaho kugira ngo ababyeyi ntibakomeze gukorana abana ndetse nabo babashe kwitabwaho mu buryo bwiza
Hashyizweho amarerero atatu y'ababyeyi bakora mu nganda eshatu z'icyayi muri Nyaruguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .