Nyarugenge: Umushinga Gikuriro washyikirije ubuyobozi ibikorwa bya miliyoni 350Frw

Yanditswe na Akayezu Jean de Dieu
Kuya 18 Nzeri 2019 saa 06:58
Yasuwe :
0 0

Ubuyobozi bw’Akarere ka Nyarugenge bwashyikirijwe ibikorwa bifite agaciro ka miliyoni 350Frw, biteza imbere imibereho myiza y’abaturage bubakiwe muri gahunda y’umushinga Gikuriro umaze imyaka ine ukorera mu Mirenge 10 igize aka karere.

Gikuriro ni umushinga w’imyaka itanu watangijwe n’Umuryango Mpuzamahanga w’Ubutabazi w’Abepisikopi ba Kiliziya Gatolika bo muri Amerika, [Catholic Relief Services (CRS)] , ku bufatanye n’Umuryango Mpuzamahanga w’Abaholandi wita ku Iterambere (SNV) batewe inkunga n’Umuryango Mpuzamahanga w’Abanyamerika wita ku Iterambere (USAID).

Kuri uyu wa Gatatu tariki 18 Nzeri 2019, nibwo habaye umuhango wo gutaha no kumurikira Akarere ka Nyarugenge ibikorwa byubakiwe abaturage, guhemba amatsinda y’isuku yitwaye neza mu Mirenge igize 10 yo muri aka karere.

Mu bikorwa byashyikirijwe Akarere ka Nyarugenge harimo icyumba cy’umukobwa cyubatswe ku Rwunge rw’Amashuri rwa Kigali [GS Kigali], ubwiherero bwubakiwe abaturage, uturima tw’igikoni, utuzu tw’amazi 7, amasoko karemano y’amazi 20, kano 7 n’ibindi.

Umuyobozi w’Akarere ka Nyarugenge wungirije ushinzwe iterambere ry’ubukungu, Nsabimana Vedaste, yabwiye IGIHE ko ibikorwa biterwa inkunga na USAID n’abafatanyabikorwa bayo bikomeje gushyigikira gahunda ya guverinoma yo kubaka iterambere rirambye.

Yagize ati “Ibikorwa bakora ni ibijyanye na gahunda ya guverinoma yo kurwanya imirire mibi no gushishikariza abaturage kwizigamira, byose biganisha ku iterambere rirambye. Ni ibikorwa dushima kandi biri kugenda neza.”

Nsabimana yavuze ko kuba abafatanyabikorwa barafashe miliyoni 350Frw bakazishyira muri ibikorwa hari ikintu gikomeye bivuze ko iterambere ry’akarere.

“Icyo bivuze kirakomeye cyane kuko nk’uko mwanabibonye banafasha n’abagenerwabikorwa kwihangira imirimo, hari abakora imigati, ababoha, abo bigisha guhinga kijyambere no korora, icyo bivuze ni uko hari uruhare rukomeye cyane uyu mushinga uri kugira mu iterambere ry’Akarere.”

Umushinga wa Gikuriro ukora mu nkingi enye zirimo imirire myiza aho abaturage bahurizwa hamwe mu mudugudu bakigishwa guteka nyuma bakagaburira abana babo, ubukungu bujyana no kubaka ubushobozi bw’abaturage bigishwa umuco wo kuzigama bakabasha gukora imishinga ibateza imbere.

Indi nkingi ni ijyanye n’ubuhinzi aho abaturage bigishwa ibijyanye no guhinga bijyanye n’ingano y’ubutaka bwabo, aho abo mu Mujyi bigishwa guhinga mu mabase, uturima tw’igikoni cyangwa mu mifuka, inkingi ya nyuma ni iyijyanye n’isuku n’isukura aho abaturage bubakirwa imigezi, bakanahabwa ibigega bifata amazi.

Umuyobozi muri AEE, ushinzwe gukurikirana imishinga muri Nyarugenge na Rwamagana, Kabagamba Wilson, yavuze ibyo bakora byose biba biganisha ku kwita ku muryango kugira ngo umere neza kandi ugere ku iterambere.

Ati “Intego yacu ni uko umwana muto uri munsi y’imyaka itanu atagwingira, ibyo dukora byose aho niho tuba dushaka kuganisha, twita kugira ngo umuryango umererwe neza, byumvikane ko bizahera kuri wa mwana.”

Kabagamba avuga ko ari ubuyobozi n’abagenerwabikorwa bakwiye gufatanya mu kubungabunga ibyo baba bahawe no kubifata neza kandi bibuka kubibyaza umusaruro.

Muri rusange Gikuriro yashyizeho amatsinda y’isuku, 350, ni ukuvuga muri buri Mudugudu, ibikoni by’imidugudu 350, imirima y’ibikoni itangirwamo amasomo yo gutegura indyo yuzuye no kurwanya imirire mibi.

Imirenge yahize indi mu kugira amatsinda y’isuku akora neza yahawe ibihembo aho aba mbere bashyikirijwe miliyoni 1Frw, aba kabiri bahabwa ibihumbi 500Frw mu gihe aba gatatu bashyikirijwe ibihumbi 300Frw.

Abayobozi batandukanye bafunguye icyumba cy'umukobwa n'ubwiherero byubakiwe ishuri rya GS Kigali
Gikuriro yigishije abagore kwihangira imirimo
Icyumba cy'umukobwa cyubatswe muri GS Kigali
Icyumba cy'umukobwa kirimo ibikoresho bikenerwa n'abakobwa
Muri iyi gahunda ya gikuriro hubatswe amavomo 7 mu Mirenge itandukanye y'Akarere ka Nyarugenge
Ubwiherero bugezweho nibwo bwubakirwa abaturage muri iyi gahunda y'umushinga Gikuriro
Ubwiherero bwubatswe muri gahunda y'umushinga gikuriro
Abahize abandi bashyikirijwe ibihembo aho itsinda rya mbere ryahawe miliyoni 1Frw
Abakobwa bo mu ishuri rya GS Kigali bubakiwe icyumba cy'umukobwa
Kabagamba Wilson ashyikiriza icyemezo cy'ishimwe umwe mu bitwaye neza mu gushyira mu bikorwa ibyo basabwa na gahunda ya Gikuriro
Visi meya Nsabimana ashyikiriza impamyabumenyi uwitabiriye amahugurwa atangwa muri gahunda ya Gikuriro
Kabagamba Wilson ushinzwe umushinga mu turere twa Nyarugenge na Rwamagana yavuze ko bashyize imbere iterambere ry'umuturage
Umuyobozi w’Akarere ka Nyarugenge wungirije ushinzwe iterambere ry’ubukungu, Nsabimana Vedaste (hagati) yashimye USAID n'abafatanyabikorwa bayo
Mukaneza Jeannine uyobora GS Kigali yashimye iyi gahunda ya Gikuriro yabubakiye icyumba cy'umukobwa

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza