Nyarugenge: Batewe impungenge n’ubwiyongere bw’abagore basabiriza bitwaje abana

Yanditswe na Thamimu Hakizimana
Kuya 13 Gashyantare 2020 saa 04:57
Yasuwe :
0 0

Abaturage bo mu bice bitandukanye by’Akarere ka Nyarugenge bakorera rwagati mu Mujyi wa Kigali bavuga ko bahangayikishijwe cyane n’ubwiyongere bw’abagore basabiriza bitwaje abana kugirango babone amaramuko.

Bamwe muri aba baturage bakorera mu Mujyi wa Kigali hafi y’ahazwi nka Matheus no muri Car Free zone babwiye IGIHE ko bahangayikishiwe n’ubwiyongere bw’abasabiriza ndetse ubuyobozi bwagakwiriye kugifatira izindi ngamba kugira ngo gikemuke.

Bavuga ko babazwa cyane n’uburyo hari bamwe mu bagore basabiriza bakodesha abana batari ababo ndetse hari n’ababakura mu mashuri bakabashora muri iyo ngeso kugira ngo bagire icyo babona.

Bahamya ko hari n’abasabiriza bakunda kubatuka iyo batabagize icyo babaha ku buryo inzego z’ubuyobozi zagakwiye kubijyamo.

Uwase Farida ucuruza muri Matheus, avuga ko atazibagirwa umuntu wigeze kumutuka kubera ko yamusabye ntagire icyo amuha.

Ati “Ubuyobozi budufash. Njye rwose hari umugore wigeze kuntuka ibitutsi bikomeye ntacyo dupfa anziza gusa ko yari asabye sinagira icyo muha.”

Uwitwa Bizagwira Innocent ,we avuga ko hatagize ingamba zifatirwa abagore basabisha abana iki kibazo cyafata indi ntera.

Ati “Numva ubuyobozi bwagakwiye kujya buhana abantu basabiriza bitwaje abana kuko ni ikibazo kimaze gufata indi ntera kuko usanga abagore basabiriza mu Mujyi baba bafite abana kandi ubona ko baba bagakwiriye kuba bagiye ku ishuri.”

Yavuze ko n’ababyeyi bemera gutanga abana babo ngo bajye gukoreshwa ibyo gusabiriza bakwiriye gufatirwa ibihano.

Umunyamabanga Nshingwabikorwa w’Umurenge wa Nyarugenge, Mukandahiro Hidaya,na we yemeza ko umubare w’abasabiriza ugenda wiyongera.

Ati “ Iyo urebye n’ubundi umubare w’abasabiriza ukomeza kwiyongera kuko baba bakurikira umujyi ariko icyo turi gukora ni ukubafata tukabajyana mu bigo bigishirizwamo, cyane cyane abagore dusigaye tubafata abana babo tukabajyana mu mashuri kuko babaga batakiga. Hari n’abo tujyana mu bigo ngororamuco bakagaruka baza mu buzima busanzwe.”

Yakomje avuga ko nta rutonde nyir’izina rw’abasabiriza bafite kuko umubare wabo ugenda uhinduka , gusa ngo kuwa Mbere w’iki cyumweru bakoze umukwabu bafata abagera kuri 16.

Ushinzwe Itangazamakuru mu Karere ka Nyarugenge, Serugendo Jean de Dieu yavuze igikorwa cyo kurwanya abasabiriza gikwiye guhoraho.

Ati “ Umunsi ku munsi twasanze ari ibintu tugomba kurwanya kuko none ubakuramo ejo hakaza abandi. M rwego rwo kubakurikirana rero twashyizeho imikwabu ihoraho ku buryo abasabirizi bafatwa tukareba muri abo bana abashobora kuba basubizwa mu miryango n’abakwigishwa indi mirimo bakajyanwa mu bigo ngororamuco.”

Yavuze ko bari gushyira imbaraga mu kwigisha ababyeyi uruhare rwabo mu burezi bw’abana babo kugira ngo barwanye iki kibazo.

Akarere ka Nyarugenge gakunze kubamo abantu basabiriza benshi ahanini kubera urujya n’uruza ruhahora kubera ko karimo ibikorwa byinshi by’ubucuruzi.

Mu mujyi rwagati hari abagore basabiriza bitwaje abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza