00:00:00 IGIHE NETWORK KN KINYARWANDA EN ENGLISH FR FRANCAIS

Nyarugenge: Babiri bafashwe bashaka gukorera ‘provisoire’ bifashishije ubutumwa buhimbano ko bipimishije COVID-19

Yanditswe na IGIHE
Kuya 26 January 2022 saa 07:49
Yasuwe :

Abapolisi bakorera mu Ishami rishinzwe Ibizamini no gutanga Impushya zo gutwara ibinyabiziga bafashe abantu babiri babasanganye ubutumwa bugufi bw’ubuhimbano bugaragaza ko bipimishije icyorezo cya COVID-19.

Aba bagabo barimo uw’imyaka 44 n’ufite 38, bafatiwe mu Karere ka Nyarugenge, muri stade ya Kigali i Nyamirambo, mu gitondo cyo ku wa Kabiri, tariki ya 25 Mutarama 2022.

Umuvugizi wa Polisi wungirije, CSP Africa Sendahangarwa Apollo, yavuze ko abatawe muri yombi bafatiwe ku marembo bashaka kwinjira muri stade ngo bakore ibizamini by’agateganyo byo gutwara ibinyabiziga.

Yagize ati “Mbere y’uko abantu batangira gukora ibizamini abapolisi babanza kugenzura ibyangombwa byabo. Babonye bariya bantu baje gukora ikizamini ariko ubutumwa bwa RBC bugaragaza ko bipimishije Covid-19 ndetse ko ari bazima. Byagaragaye ko ubwo butumwa atari umwimerere ahubwo ari ubuhimbano. Bamaze gufatwa bavuze ko batipimishije ahubwo bagahitamo guhimba ubutumwa bwa RBC.”

CSP Sendahangarwa yakomeje avuga ko abafashwe uko ari babiri baturutse mu Karere ka Gatsibo ariko uwo bafatanije guhimba no kohererezanya ubu butumwa ntabwo biramenyekana neza aho atuye. Yakomeje akangurira abantu kubahiriza amabwiriza yo kwirinda COVID-19.

Yagize ati “Turakomeza gukangurira abantu muri rusange n’abarimo gukora ibizamini byo gutwara ibinyabiziga ko bagomba kubahiriza amabwiriza yo kwirinda ikwirakwizwa rya COVID-19 kugira ngo birinde kandi barinde bagenzi babo. Guhimba ukanakoresha icyemezo icyo ari cyo cyose gihanwa nk’ibindi byaha byo gukora no gukoresha inyandiko mpimbano.”

Abafashwe bashyikirijwe Urwego rushinzwe Ubugenzacyaha (RIB) rukorera muri Sitasiyo ya Polisi ya Rwezamenyo kugira ngo hatangire iperereza

Ingingo ya 276 y’Itegeko no68/2018 ryo ku wa 30/08/2018 riteganya ibyaha n’ibihano muri rusange, ivuga ko umuntu wese uhimba cyangwa uhindura mu buryo ubwo ari bwo bwose inyandiko cyangwa ikindi kintu cyanditseho igitekerezo, ashyiraho umukono cyangwa igikumwe bitari byo, yonona inyandiko cyangwa imikono, asimbuza abantu abandi, ahimba amasezerano, imiterere y’ingingo zayo, igitegetswe gukorwa cyangwa icyarangije kwemeranywa, aba akoze icyaha.

Umuntu wese, ku bw’uburiganya, wandika, wandikisha ibintu bidahuye n’ukuri cyangwa ukora imenyekanisha ritari ryo afatwa nk’uwakoze icyaha cyo gukora ibihimbano.

Iyo abihamijwe n’urukiko, ahanishwa igifungo kitari munsi y’imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni 3 Frw ariko atarenga miliyoni 5 Frw cyangwa kimwe gusa muri ibyo bihano.

Abagabo babiri bo mu Karere ka Gasabo bafashwe bashaka gukorera ‘provisoire’ bifashishije ubutumwa buhimbano bugaragaza ko bipimishije COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .