00:00:00 IGIHE NETWORK KN KINYARWANDA EN ENGLISH FR FRANCAIS

Nyarugenge: Amaduka na restaurants byafunzwe kubera kutubahiriza amabwiriza yo kwirinda Covid-19

Yanditswe na Thamimu Hakizimana
Kuya 18 Kamena 2021 saa 10:03
Yasuwe :
0 0

Ubuyobozi bw’Akarere ka Nyarugenge ku bufatanye na Polisi y’Igihugu, bafunze zimwe mu nzu z’ubucuruzi basanze zitubahiriza amabwiriza yo kwirinda Covid-19.

Ni ibikorwa by’isuzuma ryakozwe mu nyubako z’ubucuruzi zikomeye mu Mujyi wa Kigali, zirimo iya Nyarugenge, iyo muri gare izwi nka ‘Down Town’, mu Biryogo n’ahandi hatandukanye.

Mu nyubako ya ‘Down Town’ hafunzwe imiryango itanu kubera kutubahiriza amabwiriza yo kwirinda Covid-19, ndetse buri muryango ucibwa ibihumbi 150 Frw. Hanafunzwe restaurants ebyiri zari zarahinduwe akabari nazo zaciwe ibihumbi 150 Frw buri imwe.

Ubuyobozi bwa ‘Down Town’ nabwo bwaciwe amafaranga ibihumbi 300 Frw kubera kutuzuza inshingano zo gukurikirana abatubahiriza amabwiriza yo kwirinda Covid-19.

Umuyobozi Nshingwabikorwa w’Akarere ka Nyarugenge, Ngabonziza Emmy, yabwiye IGIHE, ko bakoze iki gikorwa nyuma y’uko bigaragaye ko imibare y’abandura Covid-19 iri kwiyongera.

Ati “ Ni ngombwa ko mu ngamba twari dusangwanywe habaho kuzikaza mu buryo budasanzwe kuko hari impinduka zigomba gufatwa zijyanye n’ibihe turimo. Niyo mpamvu twakoze igikorwa cyo kugenzura hirya no hino mu nyubako z’ubucuruzi ndetse n’aho abantu bahurira ari benshi mu Mujyi.”

Umwe mu bayobozi ba ‘Down Town’, Rembere Ngezi, na we yemeye amakosa yagaragaye muri izi nyubako.

Ati “ Nibyo hari imiryango imwe n’imwe yagaragaje ko yadohotse mu kubahiriza ingamba zo kwirinda Covid-19, rero nk’ubuyobozi hari inama twagiriwe n’ubwo twari dusanzwe tuzizi, ku buryo twasanze dukwiye gukomeza kuba hafi y’abacuruzi, tubashishikariza kutarenga kuri ayo mabwiriza.”

Umujyi wa Kigali umaze iminsi ufite ubwiyongere budasanzwe bwa Covid-19, kuko mu minsi irindwi ishize, abantu 552 banduye iki cyorezo, imibare iri hejuru cyane ugereranyije n’uko byari bimeze mu kwezi gushize.

Inyubako z'ubucuruzi zakorewe isuzuma ku ngamba zo kwirinda ikwirakwira ry'icyorezo cya Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .