Nyarugenge: Abashinjwa guha abaturage inzoga zitemewe bikabaviramo guteza umutekano muke bafashwe

Yanditswe na Thamimu Hakizimana
Kuya 1 Ugushyingo 2019 saa 11:59
Yasuwe :
0 0

Abantu bane barimo abagore babiri bo mu Murenge wa Kigali mu Karere ka Nyarugenge batawe muri yombi bashinjwa gucuruza inzoga zitujuje ubuziranenge nyuma y’uko abari bamaze kuzinywa bateje umutekano muke.

Ku wa Kane tariki ya 1 Ugushyingo 2019 nibwo aba bantu batawe muri yombi banagaragazwa mu ruhame ubwo Meya w’Akarere ka Nyarugenge, Kayisime Nzaramba, yasuraga abaturage bo mu Kagari ka Kigali mu Mudugudu w’Akirwanda muri gahunda yo kumva ibibazo bafite.

Abatuye mu midugudu ya Muganza n’Akirwanda bagaragarije Meya Kayisime ko batewe impungenge n’abakora inzoga zitemewe muri aka gace kuko bigira ingaruka ku miryango yabo.

Bavuga ko iyo abantu bamaze kuzinywa bateza umutekano muke kuko hari n’abarwana bagakomeretsanya bikabije, bikanateza amakimbirane mu miryango.

Abafashe ijambo bamusabye kugira uruhare mu guta muri yombi abazicuruza.

Uwitwa Munyabarenzi Jean de Dieu yabwiye IGIHE ko mu gace kose batuyemo hahora umutekano muke uterwa n’inzoga zitujuje ubuziranenge.

Yagize ati “Hano hagaragara ibiyobyabwenge bibiri birimo urumogi n’inzoga z’inkorano ariko izo nzoga nizo zihiganje kandi ziteza umutekano muke buri gihe kuko abantu bazinyweye barasinda bakarwana. Usanga hahora amakimbirane yaba mu ngo no muri ubwo bubari.”

Yongeyeho ko bifuza ko abayobozi bakurikirana abacuruza izo nzoga ngo babashe kugira umutekano.

Mukeshimana Clarisse watawe muri yombi kubera gucuruza inzoga zitemewe, yavuze ko yabitewe n’ubuzima bubi yari abayemo abisabira imbabazi.

Yagize ati “Nari mbimazemo amezi atatu inzoga nakoraga bayita Nyirantare, nayengeshaga amasaka. Nbanzaga gucanira amazi akabira ngasukamo isukari n’amasaka ariko kuba menye ko bitemewe ndabisabira imbabazi, sinzongera.”

Meya Nzaramba we yavuze ko hagiye gukorwa imikwabo yo gufata abakora inzoga zitemewe.

Yagize ati “Kuba abaturage biyemeje ko bagiye kujya batanga amakuru ku gihe ku bantu bose benga inzoga z’inkorano n’abazinywa ikigiye gukurikira tugiye gukora imikwabo dufatanye nabo kugira ngo abazenga n’abazicuruza tubashyikirize inzego z’ubutabera.”

Yasoje avuga ko yizeye ko ku bufatanye n’abaturage bagiye guhashya byimazeyo abenga n’abacuruza inzoga zitemewe kuko mbere ikibazo bahuraga nacyo ari icy’uko itegeko ryari ririho rijyanye no guhana abenga n’abakora inzoga z’inkorano ritagaragaragamo ibijyanye n’ibihano.

Abatawe muri yombi bashinjwa kugurisha inzoga zitujuje ubuziranenge mu Murenge wa Kigali
Abaturage bafatanywe amajerekani n'amabase yuzuyemo inzoga z'inkorano berekanywe mu ruhame
Iyi nama y'abaturage yabereye mu Kagari ka Muganza ahakunze kugaragara ibiyobyabwenge birimo inzoga zitujuje ubuziranenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza