Nyarugenge: Abakuwe mu manegeka bakimurirwa mu mashuri barasaba ubufasha

Yanditswe na Thamimu Hakizimana
Kuya 12 Ukuboza 2019 saa 07:58
Yasuwe :
0 0

Abaturage bo mu Karere ka Nyarugenge bakuwe mu nyubako zabo zari mu manegeka bakimurirwa mu bigo by’amashuri mu rwego rwo kwirinda ko bahitanwa n’ibiza barasaba ko bashakirwa ahandi hantu ho gutura.

Ikigo cy’Igihugu gishinzwe Iteganyagihe giheruka gutangaza ko guhera ku wa 8 Ugushyingo kugeza kuri 31 Ukuboza 2019 hazagwa imvura nyinshi, kinaburira abaturage kuba maso.

Ubuyobozi bw’Akarere ka Nyarugenge bwafashe icyemezo cyo kwimura imiryango 193 ituye mu manegeka mu bice bitandukanye mu kurengera ubuzima bwabo.

Abaturage bakuwe mu manegeka bagacumbikirwa mu mashuri batangarije IGIHE ku wa 10 Ukuboza 2019 ko bahangayikishijwe n’imibereho yabo.

Umukecuru witwa Mukaruboneka Esther uri kurarana n’abuzukuru be batandatu mu Kigo cy’amashuri cya Kimisagara, yavuze ko yifuza ko Leta yabashakira aho kuba kugira ngo batazahora bimurwa.

Ati “Ubu simbayeho neza kuko ndi kurara imbeho inyica njye n’abuzukuru banjye kuko turara ducurikiranye ikindi nta n’uburenganzira mfite bwo kuba najya gufura utuntu dutandukanye ngo mbe najya kubahahira.”

Yakomeje asaba ubuyobozi kumufasha akabona inzu yo kubamo itari mu manegeka.

Munyabahuma Gérard w’imyaka 65 we yasabye gufashwa kubona aho kuba aho guhora yimurwa buri uko imvura iguye.

Yagize ati “Turi hano kubera impamvu y’ibiza kuko batubwiye ko imvura ari nyinshi kandi n’ubundi hasanzwe haba ibitengu, batubwira ko tugomba kuhava kugira ngo bitatuzatugwira.”

Mu byifuzo by’abo baturage hari n’abasabye koroherezwa kubona ibiryamirwa kugira ngo batarara bicwa n’imbeho.

Mutuyimana Claudine yakomeje ati “Aha ni ahantu haba abantu benshi nta bintu byo kurya dufite kubera ko nta byo twimukanye, baduhaye ibiringiti n’inzitiramibu byadufasha kuko hari imibi myinshi.”

Umuyobozi w’Akarere ka Nyarugenge, Kayisime Nzaramba, yavuze ko bahisemo kwimura abaturage mu rwego rwo kurengera ubuzima bwabo nyuma y’umuburo wa Meteo Rwanda.

Ati “Twimuye abatuye mu manegeka akabije, ba bandi twavuga ngo imvura iramutse iguye ubutaka bumaze gusoma abaturage bacu amahirwe yo kubaho yaba ari makeya cyane. Ngira ngo ni gahunda iri ku rwego rw’igihugu aho ubuyobozi bwite bwa Leta n’inzego z’ibanze biri mu nshingano zacu ngo tubungabunge ubuzima bw’abaturage bacu.”

Yakomeje avuga ko bahisemo gufata iki cyemezo cyo kwimura abaturage bwangu kuko kuva mu Ukwakira kugeza mu Ukuboza 2019 ibiza bimaze kwangiza hegitari 37 z’imyaka no guhitana abantu bane.

Mu Karere ka Nyarugenge abantu 13 400 ni bo batuye mu manegeka ndetse ubuyobozi bufite gahunda yo kubashakira aho kuba uko ubushobozi buzaboneka.

Abakuwe mu manegeka bimuriwe mu Kigo cy'amashuri cya Kamuhoza kiri mu Murenge wa Kimisagara
Bamwe mu bakuwe mu manegeka bacumbikiwe mu Kigo cy'amashuri basabye ubuyobozi kubaba hafi
Munyabahuma Gérard w’imyaka 65 yasabye gufashwa kubona aho kuba
Umukecuru witwa Mukaruboneka Esther acumbikiwe mu Kigo cy’amashuri cya Kimisagara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .