Nyarugenge: Abadukanye amayeri yo gucururiza mu ishyamba inzoga z’inkorano baburiwe

Yanditswe na Thamimu Hakizimana
Kuya 17 Ugushyingo 2019 saa 01:41
Yasuwe :
0 0

Abaturage bo mu Murenge wa Kigali mu Karere ka Nyarugenge bavuga ko bahangayikishijwe n’uburyo abenga inzoga zitujuje ubuziranenge muri ako gace basigaye baradukanye ingeso yo kuzicururiza mu nzira no mu ishyamba rya Mont Kigali mu rwego rwo kwirinda ko ubuyobozi buzisanga mu ngo zabo cyangwa mu tubari bakoreramo.

Abatuye mu Mudugudu w’Akirwanda n’uwa Muganza mu Kagali ka Kigali, bavuga ko abenga inzoga z’inkorano bamaze kwiyongera ndetse baduye uburyo bushya bwo kuzicururiza mu ishyamba kugira ngo inzego z’umutekano zitabafata.

Bemeza ko abenga izo nzoga barara bazenga noneho bakazinduka bazijyana mu ishyamba abazishaka bakaba ariho babasanga ku buryo biba bigoye kubafata.

Bavuga ko bifuza ko ubuyobozi bwashyira imbaraga mu kurwanya aba bantu basigaye benga inzoga zitemewe.

Uwitwa Munyabarenzi Jean de Dieu aganira na IGIHE yagize ati “Inzoga za hano zafashe indi ntera kuko zigeze ku rwego aho abantu basigaye bazenga bakazicururiza mu mashyamba. Ntabwo bigisaba ko umuntu akigira akabari k’inzoga ahubwo umuntu arabyenga abanywi bakamusanga mu mu shyamba ubundi akajya abapimira bamwishyura.”

Meya w’Akarere ka Nyarugenge Kayisime Nzaramba, aherutse kubwira IGIHE ko nyuma yo kumenya aya makuru bashyizeho itsinda rikurikirana iki kibazo.

Ati “Twasizeyo itsinda ridufasha kugira ngo tumenye niba ayo makuru y’abaturage batagicururiza izo z’inkorano mu duce batuyemo. Ni amakuru meza kandi turaza gukurikira kandi nidusanga ariyo nk’uko twabivuze ubu amategeko ahana abacuruza abenga n’abanywa ibiyobyabwenge cyane cyane mu bijyanye n’inzoga z’inkorano arahari.”

Yasoje avuga ko ubuyobozi bw’Akarere ka Nyarugenge butakwemera kugira abaturage b’abasinzi cyangwa banywa inzoga z’inkorano kuko zangiza ubuzima bwabo n’umutekano.

Abafashwe benga cyangwa bacuruza inzoga zitujuje ubuziranenge bahabwa ibihano birimo kuzimena no kubafungira cyangwa se bagacibwa amande.

Abafashwe benga cyangwa bacuruza inzoga zitujuje ubuziranenge bahabwa ibihano birimo kuzimena no kubafungira cyangwa se bagacibwa amande

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza