00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Yatemye umugore we aramwica ubwo umuhesha w’inkiko yabagabanyaga umutungo

Yanditswe na Prudence Kwizera
Kuya 19 May 2022 saa 07:48
Yasuwe :

Umugabo wo mu Murenge wa Ntyazo mu Karere ka Nyanza akurikiranyweho icyaha cyo kwica umugore we amutemye ijosi ubwo umuhesha w’inkiko yabagabanyaga umutungo.

Byabereye mu Mudugudu wa Rukoma mu Kagari ka Katarara ku gicamunsi cyo ku wa 18 Gicurasi 2022, ahagana saa Cyenda.

Amakuru aturuka muri uwo murenge avuga ko uwo mugabo w’imyaka 43 yari yarasezeranye mu mategeko n’umugore we w’imyaka 36 ariko bakaba batari bakibana kuko batandukanyijwe n’inkiko kubera amakimbirane yo mu rugo.

Aba bombi bari barabyaranye abana batatu.

Kuri uyu wa Gatatu ni bwo umugore yiyambaje umuhesha w’inkiko kugira ngo abagabanye umutungo nk’uko urukiko rwabitegetse.

Ni ko byagenze kuko yaje arayibagabanya arangije ajya kwandika imyanzuro uko yabishyize mu bikorwa.

Mu gihe yari muri ibyo ni bwo umugore yagiye kumureba ngo ayimuhe ahageze umugabo we arahamusanga yitwaje umuhoro ahita amutema ijosi, aramwica.

Umuyobozi w’Akarere ka Nyanza, Ntazinda Erasme, yemereye IGIHE iby’iyo nkuru y’ubwicanyi bwabaye.

Yagize ati "Yego ayo makuru ni yo. Ukekwaho icyaha yafashwe."

Yavuze ko uwo mugabo akimara gukora ubwo bwicanyi yagerageje guhunga ariko afatwa n’inzego z’umutekano. Kuri ubu afungiye kuri Sitasiyo ya RIB mu Murenge wa Ntyazo.

Umurambo wa nyakwigendera wajyanywe ku Bitaro bya Nyanza gukorerwa isuzuma kugira ngo hamenyekane icyamwishe.

Mu butumwa bwa Meya wa Nyanza, Ntazinda Erasme, yasabye abashakanye kwimakaza kubana mu mahoro kuko ari ryo shingiro ryo kubaka umuryango uhamye kandi utekanye.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .