00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Umugore arakekwaho gukubitisha umugabo we bikamuviramo urupfu

Yanditswe na Prudence Kwizera
Kuya 17 Nzeri 2021 saa 03:40
Yasuwe :
0 0

Umugabo witwa Tubanambazi Boniface wo mu Murenge wa Busasamana mu Karere ka Nyanza yakubiswe n’abantu ubwo yari ari gukimbirana n’umugore we, izo nkoni ziza kumuviramo urupfu.

Uwo mugabo yari asanzwe abana n’umugore we mu Mudugudu wa Kavumu mu Kagari ka Nyanza, bafitanye abana babiri babyaranye.

Tubanambazi w’imyaka 36 yakimbiranye n’umugore we ku mugoroba wo kuri uyu wa Kane biba ngombwa ko ubuyobozi bw’akagari butabara buri kumwe n’irondo.

Bivugwa ko ubwo abanyerondo bari bajyanye Tubanambazi kuri Polisi, umugore we yaje gusaba ko bamureka ahubwo we akajya iwabo akaba amuhunze.

Ngo baje kumureka asubira mu rugo ariko ahageze asanga umugore we yahamagaye abantu bo mu muryango we batangira kumukubita.

Icyo gihe ngo bamukubise abanyerondo bagiye gutabara ahantu hari hibwe ihene gusa umugore we avuga ko ari abanyerondo bamukubise.

Umunyamabanga Nshingwabikorwa w’Umurenge wa Busasamana, Bizimana Egide, yabwiye IGIHE ko mu gitondo cyo kuri uyu wa Gatanu ari bwo ubuyobozi bwahageze busanga Tubanambazi arembye bihutira kumujyana kwa muganga.

Yabanje kujyanwa ku ivuriro ryigenga riri mu Kagari ka Kavumu, ahageze babona arembye bamwohereza mu Bitaro bya Nyanza aba ari ho apfira.

Ati “N’ubwo kwa muganga baza kugaragaza icyo yazize ariko harakekwa ko ashobora kuba yishwe n’inkoni cyangwa se yakubiswe. Ikibazo cyatewe n’amakimbirane yo mu muryango yari afitanye n’umugore we.”

“Habaye ikibazo cy’amakimbirane irondo riratabara, nyuma haza kubaho ikibazo cy’uko umugabo yakubiswe. Ntituramenya uwamukubise niba ari irondo cyangwa niba ari undi muntu wamukubise, ubwo inzego zibishinzwe zirakomeza iperereza, abamukubise bakurikiranywe.”

Bizimana yavuze ko mu murenge ayoboye hakunze kugaragara amakimbirane yo mu ngo, ariko bayakemura bifashishije inshuti z’umuryango n’ubundi bukangurambaga bakora.

Yasabye abaturage kwirinda kwihanira igihe bagiranye ibibazo, ahubwo bakitabaza ubuyobozi bukabafasha kubikemura.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .