00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Hatashywe ikiraro cy’abanyamaguru kirekire muri Afurika y’Iburasirazuba

Yanditswe na Igizeneza Jean Désiré
Kuya 18 Mutarama 2023 saa 08:57
Yasuwe :

Minisitiri w’Uburezi akaba n’imboni y’Akarere ka Nyanza, Dr Uwamariya Valentine yayoboye umuhango wo gutaha ikiraro cya mbere kirekire mu Rwanda no muri Afurika y’Iburasirazuba, cyubatswe n’Umuryango mpuzamahanga utegamiye kuri leta wubaka ibiraro byo mu kirere bikoreshwa n’abanyamaguru, Bridges to Prosperity, ku bufatanye na Guverinoma y’u Rwanda.

Gihuje imirenge ya Cyabakamyi mu Karere ka Nyanza n’uwa Musange mu Karere ka Nyamagabe kinyuze hejuru y’Umugezi wa Mwogo watumaga imigenderanire itagenda neza.

Iki kiraro cyatashywe kuri uyu wa 18 Mutarama 2023 gifite metero 150 z’uburebure, cyuzuye gitwaye miliyoni zirenga 204 Frw kikaba icya 150 muri 355 bizubakwa n’uyu muryango bitarenze umwaka wa 2024. Byose hamwe bikazatwara miliyoni 23$ ni ukuvuga arenga miliyari 23 Frw.

Ni amasezerano y’imyaka itanu uyu muryango wagiranye na leta y’uko hazubakwa ibiraro bizahuza abaturage barenga miliyoni nk’imwe muri gahunda yo kurwanya ubukene buterwa n’uko ibyaro biri mu bwigunge.

Minisitiri Uwamariya yavuze ko kubaka ibikorwaremezo byagize uruhare mu kuzamura ubukungu bw’igihugu nyuma ya Jenoside yakorewe Abatutsi mu 1994, ibinakurura ishoramari mu nzego zitandukanye.

Ati « U Rwanda ni igihugu cy’imisozi igihumbi kandi gitekanye aho imisozi n’imigezi bigaragaza uburanga bwacyo, bukarushaho kugaragara iyo imisozi ihuhwe n’ibyo biraro. »

Ubushakashatsi bwakozwe na Bridges to Prosperity n’abarimu bo muri za Kaminuza bwagaragaje ko ahubatswe ibiraro umusaruro w’abaturage wazamutseho 20% kubera ubuhahirane no kongera umusaruro mu mirimo itandukanye ibimburiwe n’ubuhinzi.

Minisitiri Uwamariya yakomeje avuga ko "kubaka bene ibi bikorwaremezo kandi bigamije gusuzuma uburyo abaturage bakira indi mishinga igihugu kibafitiye, ngasaba abayobozi b’uturere twombi kukibungabunga uko bikwiriye."

Nubwo mu 2019 ari bwo umushinga wo kubaka ibi biraro wamuritswe ku bufatanye na Minisiteri y’Ibikorwaremezo, iy’Imari n’Igenamigambi n’uturere, Bridge to Prosperity (B2P) imaze imyaka 10 ikorera mu Rwanda.

Umuyozi Mukuru wa B2P, Murenzi Joseph yavuze ko kubaka ibi biraro byatewe n’ubushakashatsi bakoze bakabona ko mu bice by’ibyaro iterambere ritagenda neza ribangamiwe no kubura ibibahuza mu guha imbaraga ubuhahirane no kubona izindi serivisi.

Ati "Twasanze abantu benshi baba mu byaro ariko ibintu bitagenda neza haba mu buhahirane, mu kujyana abana ku ishuri, kujya ku isoko n’ibindi. Twemeje ko tugomba kubikemura tububakira ibiraro bibahuza."

Ukinyuraho nta mpungenge zo kuba yagwa agira kuko hashyizweho ibyuma bimurinda mu mpande

Iki kiraro kitarubakwa kwambuka umugezi wa Mwogo byari bigoye cyane ku buryo iyo wuzuzwaga n’imvura hari n’ababiburiragamo ubuzima.

Umuyobozi w’Akarere ka Nyanza, Ntazinda Erasme avuga ko iri ari iterambere rifatika bagezeho rirengera n’ubuzima bw’abantu ndetse ko bafite na gahunda yo kubaka ibindi.

Ati "Iki ni ikiraro cya gatanu dutashye, hari ibindi bine kandi tuzubaka muri uyu mwaka. Dufatanyije na B2P twakoze inyingo y’ibiraro 20 tuzubaka no mu mwaka utaha mu kurushaho guha imbaraga ubuhahirane."

Koroshya ubuhahirane n’imigenderanire kw’iki kiraro bihamywa kandi na Mukanzige Eleda utuye mu Murenge wa Musange ho mu Karere ka Nyamagabe uvuga ko "Iyo Mwogo yabaga yuzuye, byanagoranaga kujya guhahira mu isoko rya Mucubira riri mu Murenge wa Cyabakamyi."

Umuyobozi Mukuru wa B2P ku Isi, Nivi Sharma yashimiye ubuyobozi bw’igihugu bwabafashije mu gushyira mu bikorwa uyu mushinga kuko "biratangaje kubona abayobozi bo mu nzego zo hejuru bava mu byo barimo bakaza kwita ku nyungu z’abaturage. Nifuza ko n’iwacu muri Kenya byaba uku."

Igitekerezo cyo kubaka ibiraro cyavuye ku mugabo witwaga Ken Frantz wabonye ifoto y’abagabo bo muri Ethiopia bambuka ikiraro cyari cyangiritse ku mugezi wa ‘Blue Nile’ bakoresheje imigozi.

Byatumye we na bagenzi be biyemeza kucyubaka ari nabwo batangije B2P nk’uburyo bwiza bwo kurwanya ubukene buterwa n’ubwigunge mu bice by’ibyaro, kugeza ubu ikaba imaze gusakara ku Isi hose.

Minisitiri Dr Uwamariya yari kumwe n'abaturage benshi bavuye muri Nyamagabe na Nyanza mu gutaha iki kiraro ku mugaragaro
Abaturage bo mu turere twa Nyamagabe na Nyanza bakiranye yombi ikiraro cyabubakiwe, kizaborohereza mu migenderanire
Ubuhahirane hagati ya Nyamagabe na Nyanza bugiye kurushako kugira ingufu kubera iki kiraro cyabubakiwe
Iki kiraro kitarubakwa kwambuka umugezi wa Mwogo byari bigoye cyane ku buryo iyo wuzuzwaga n’imvura hari n’ababiburiragamo ubuzima
Hehe no kuzongera guhura n'ibibazo byo kwambuka umugezi wa mwogo
Umuyobozi w’Akarere ka Nyanza, Ntazinda Erasme avuga ko iri ari iterambere rifatika bagezeho rirengera n’ubuzima bw’abantu ndetse ko bafite na gahunda yo kubaka ibindi
Guverineri w'Intara y'Amajyepfo, Kayitesi Alice, yashimiye B2P ku bufatanye idahwema kugaragaza mu guteza imbere imibereho myiza y'abaturage
Minisitiri Uwamariya n'Umuyobozi wa B2P ku Isi baganira
Umuyobozi w’Akarere ka Nyanza, Ntazinda Erasme yavuze ko muri aka karere bamaze gutaha ibiraro bitanu byo mu kirere ndetse ko bateganya kubaka ibindi bigera kuri 20
Umuyozi Mukuru wa B2P mu Rwanda, Murenzi Joseph, yavuze ko bateganya kubaka ibiraro birenga 300 kugeza mu 2024
Umuyobozi wa B2P ku Isi, Nivi Sharma, yavuze ko yifuza mu gihugu cye cya Kenya ubuyobozi bwita ku baturage nk'uko ubw'u Rwanda bubigenza
Yari inkuru iryoheye amatwi ku baturage kumva ko bubakiwe ikiraro kigiye kubafasha kongera mu kugenderanirana nta nkomyi
Itorero Urugangazi ni ryo ryasusurukije abitabiriye uyu muhango

Amafoto: Habyarimana Raoul


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .