00:00:00 IGIHE NETWORK KN KINYARWANDA EN ENGLISH FR FRANCAIS

Nyanza: Abiyise ‘Abakusi’ ntibakozwa gahunda za Leta

Yanditswe na Prudence Kwizera
Kuya 31 July 2022 saa 07:50
Yasuwe :

Ubuyobozi bw’Akarere ka Nyanza buvuga ko bwatangiye ubukangurambaga bwo guhindura imyumvire ya bamwe mu baturage bagaragaje ko badakozwa gahunda za Leta z’iterambere n’imibereho myiza kubera imyemerere yabo.

Zimwe muri gahunda za Leta badakozwa zirimo gutunga indangamuntu, gutanga umusanzu w’ubwisungane mu kwivuza, gukora umuganda, EjoHeza, gupimisha inda batwite, gukingiza abana, kwikingiza Covid-19 n’izindi zigamije iterambere n’imibereho myiza y’abaturage.

Iki kibazo cyagaragajwe n’Umukozi w’Akarere ka Nyanza ushinzwe Ubukangurambaga bw’Ubwisungane mu kwivuza, Mushimiyimana Yvette, n’Umuyobozi w’Akarere ka Nyanza Wungirije ushinzwe Iterambere ry’Imibereho Myiza y’Abaturage, Kayitesi Nadine.

Mushimiyimana yabanje kugaragaza ko impamvu batagera ku ntego bihaye yo gutanga umusanzu w’ubwisungane mu kwivuza, mituweli, 100% biterwa n’imyemerere ya bamwe mu baturage biyita ‘Abakusi’.

Yavuze ko iyo myumvire ijyanye n’imyizerere yabo kuko bavuga ko serivisi z’ubuvuzi batazikeneye, ngo bumva ko bazasenga cyangwa bakivuza imiti gakondo yiganjemo guhekenya ibyatsi, guca indasago, gutongera n’iyindi.

Ati “Hari abantu bitwa Abakusi baba bafite amahame yabo aho ushobora gusanga atanatunga n’indangamuntu kandi kwishyura umusanzu wa mituweli bisaba ko umuntu aba afite indangamuntu."

Yakomeje avuga ko abo bantu babaganirije mu kwezi gushize bafatanyije n’abayobozi b’amadini n’amatorero ndetse kuri ubu bari kubarurwa kugira ngo bitabweho by’umwihariko kuko ari abaturage nk’abandi.

Ati “Dufatanyije n’amadini turi kubereka ko ari ubuyobe, cyane ko gutunga mituweli ari ubwisungane mu kwivuza, iyo utivuje mugenzi wawe ayivurizaho.”

Yavuze ko abo bantu babarizwa mu ngo 325 zo mu Mirenge ya Mukingo, Rwabicuma na Cyabakamyi nta rusengero bagira kuko bakunze guhurira mu rugo rumwe bakahasengera, biganjemo abahoze mu Idini ry’Abadiventisiti b’Umunsi wa Karindwi ariko nyuma barisohokamo.

Mushimiyimana yavuze ko ushobora gusanga mu rugo rumwe umugabo n’umugore ndetse n’abana bafite iyo myizerere ku buryo urwaye ativuza.

Hari n’aho usanga umugabo ari we ufite iyo myemerere ku buryo atagurira umuryango wose ubwisungane mu kwivuza ariko umugore we akajya kubutanga yihishe.

Muri izo ngo hakunze kugaragara abana bafite imirire mibi itera kugwingira bitewe no kutitabwaho n’ababyeyi.

Ati “Ibyo byose bigira ingaruka ku muryango, ni ho hahandi usanga dufite n’abana bahuye n’ibibazo by’imirire mibi, twarabibonye ubwo twakoraga ubusesenguzi butuma mu karere kacu tugifite abana benshi bagaragara mu mirire mibi.”

“Iyo adafite mituweli ntamujyana kwa muganga nyine, akenshi usanga avuga ngo bandogeye umwana cyangwa se akamusengera.”

Yavuze ko gahunda za Leta zibaganisha ku gukoresha indangamuntu zose batazikozwa.

Ikindi ni uko iyo umugore atwite atajya gupimisha inda kwa muganga ndetse yamara no kubyara ntakingize umwana ntanamwandikishe mu bitabo by’irangamimerere.

Umuyobozi w’Akarere ka Nyanza Wungirije ushinzwe Iterambere ry’Imibereho Myiza y’Abaturage, Kayitesi Nadine, yavuze ko ku bufatanye n’abanyamadini n’amatorero biyemeje kwegera abo baturage no kubigisha kugira ngo bahindure imyumvire.

Gusa yavuze ko bisaba ingufu ariko bazakomeza kubaba hafi kuko batabareka gutyo.

Bitewe n’uko abo baturage bifashisha Bibiliya mu myemerere yabo niyo mpamvu n’abayobozi b’akarere bahisemo gukorana n’abayobozi b’amadini n’amatorero kugira ngo babafashe kubigisha.

Hari umusaruro watangiye kuboneka kuri bake kuko ngo iyo baganiriye n’abanyamadini ubona ko batsinzwe bakemera ko bagiye guhinduka n’ubwo bidahita biba ako kanya.

Mu Murenge wa Cyabakamyi hari imiryango ibiri harimo umwe wari umukuru w’abo Bakusi yamaze kwemera ko yahinduye imyumvire.

Mushimiyimana ati “Uwo mukuru wabo amaze kugera ku kigero cyiza ahinduka kuko ubu turi gukorana ni we uri kudufasha kwigisha bagenzi be kuko ni we ubazi.”

Abo Bakusi biganjemo abantu bakuze b’abagabo n’abagore ariko harimo n’urubyiruko.

Hari impungenge ko abana babo nibakurira muri iyo myumvire bizabagiraho ingaruka mbi zibicira ejo hazaza kuko hari n’ababakura mu ishuri bakanga ko bajya kwiga.

Umukozi w’Akarere ka Nyanza ushinzwe Ubukangurambaga bw’ubwisungane mu kwivuza, Mushimiyimana Yvette, yavuze ko abo bantu bafite imyemerere idasanzwe babarizwa mu ngo 325
Umuyobozi w’Akarere ka Nyanza wungirije ushinzwe Imibereho Myiza y’Abaturage, Kayitesi Nadine, yavuze ko ku bufatanye n’abanyamadini n’amatorero biyemeje kwegera abo baturage no kubigisha kugira ngo bahindure imyumvire

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .