Nyamirambo: Ibyishimo ku bahoze mu buraya bahawe akazi ko kubaka umuhanda

Yanditswe na Thamimu Hakizimana
Kuya 16 Gashyantare 2020 saa 10:46
Yasuwe :
0 0

Abagore batandukanye bakoraga umwuga w’uburaya mu Murenge wa Rwezamenyo mu Karere ka Nyarugenge, ubu bari mu byishimo nyuma yo guhabwa akazi ko kubaka ruhurura iherereye muri aka gace.

Bamwe muri aba bagore bakoraga uburaya i Matimba bamaze ibyumweru bisaga bibiri bakora ibiraka byo kubaka ruhurura iherereye muri Rwezamenyo mu gihe abandi bari kubaka ku Ishuri ribanza ryo ku Ntwari.

Abaganiriye na IGIHE bavuze ko bishimiye 2500 Frw bari guhabwa mu gihe bari batunzwe no kwigurisha kubera amikoro make.

Bahamya ko bagiye bahabwa akazi nk’abantu bari mu cyiciro cy’abatishoboye abantu benshi bakora uburaya babucikaho.

Nyirabahinde Saidat umaze imyaka irindwi mu buraya yagize ati “Ndishimira ko twabonye akazi kuko biri gutuma tutishora mu busambanyi nka mbere. Ubundi tujya kwigurisha kubera ikibazo cy’ubushobozi buke kugira ngo tubone icyo gutunga abana bacu.”

Yakomeje avuga ko aka kazi ko kubaka ruhurura kari kumufasha cyane kuko mu 2500 Frw ari guhembwa ku munsi ari gukuramo 1000 akacyizigamira kuri konti ye kugira ngo nagwira azatangire ubucuruzi buciriritse.

Nyiramayira yemeza ko buri gihe abakora uyu mwuga bagiye bahabwa akazi nta ndaya n’imwe yazongera kugaragara mu Rwanda.

Ati “Mbere nakoraga uburaya nari mbumazemo imyaka 10 ariko ubu ndi gukora muri ruhurura hano rero kuba narabonye akaraka nabyakiriye neza kuko kari kunkemurira ibibazo.’’

Yongeyeho ko ubu uburaya babuhagaraitse kuko babujyamo ngo babone ikibatunga cyane cyane ko banataha batinze.

Umunyamabanga Nshingwabikorwa w’Umurenge wa Rwezamenyo, Uwamwiza Chantal, na we yemereye IGIHE ko nyuma y’aho aba bagore bakoraga uburaya bahawe akazi ubu bigoye kubana indaya muri aka gace.

Ati “Kumenya imibare y’abakora uburaya biragoye kuko nta wugira icyapa kigaragaza ko ari indaya ariko ikigaragara nyuma y’aho bahawe akazi ubona ko nta ndaya zikigaragara muri aka gace kubera ko bavugaga ko babikoraga kubera ubukene. Akenshi usanga uburaya budaterwa n’ubukene ahubwo iba ari ingeso umuntu aba asanganywe.”

Mu rwego rwo guca uburaya i Matimba muri Rwezamenyo ubuyobozi bwashishikarije abakoraga uburaya kwibumbira mu makoperative bagakora imishinga kugira ngo bahabwe inkunga iri hagati y’ibihumbi 100 na miliyoni 1 Frw ngo babashe kwiteza imbere.

Abahoze mu buraya i Matimba bafite akanyamuneza nyuma yo guhabwa ikiraka cyo kubaka ruhurura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .