00:00:00 IGIHE NETWORK KN KINYARWANDA EN ENGLISH FR FRANCAIS

Nyamasheke: Miliyoni 523 Frw zashowe mu gufasha abaturiye pariki kumva icyanga cy’amadovize

Yanditswe na Nsanzimana Erneste
Kuya 18 Gashyantare 2022 saa 10:54
Yasuwe :

Abaturiye Pariki ya Nyungwe mu Karere ka Nyamasheke bishimira ibikorwa bibahindurira ubuzima bakomeje kwegerezwa muri gahunda yo gusaranganya amadovize ava mu bukerarugendo, bakavuga ko iyi gahunda ibafasha kumva inshingano bafite yo kubungabunga pariki.

Mu 2005 nibwo gahunda yo gusaranganya n’abaturiye pariki amafaranga ava ku bukerarugendo yatangiye. Abo mu nkengero za Pariki ya Nyungwe ku ruhande rw’Akarere ka Nyamasheke bubakiwe amashuri, basanirwa ayari ashaje, amakoperative aterwa inkunga.

Abandi bubakiwe inzu nziza zo kubamo bava muri nyakatsi. Hari abahawe amazi, abahawe imihanda, amavuriro n’ibindi.

Tariki 16 Gashyantare 2022, ubwo hatahwaga ku mugaragaro ishuri ry’imyuga n’ubumenyi ngiro rya miliyoni 88 Frw ryubatswe mu Murenge wa Cyato, abaturage bavuze ko ibi bikorwaremezo bakomeje kwegerezwa bivuye mu bukerarugendo bituma barushaho gukunda Pariki.

Gisèle Uwiringiyimana yavuze ko ishuri ry’imyuga bahawe rije ari igisubizo kuko bakoraga urugendo rurerure kugira ngo bagere aho babona ishuri ry’imyuga.

Ati "Bamwe bajyaga mu Murenge wa Kagano, abandi bakajya i Rusizi ariko tugize amahirwe kuba tubonye iri shuri mu Murenge wa Cyato".

Ruzigamanzi Ferdinand, yavuze ko abana babo barangizaga ayisumbuye, abatabonye akazi bakandagara.

Ati "Kuba tubonye ishuri rivuye ku bukerarugendo biratwigisha kubungabunga ibidukikije, tubirinda uwabyangiza kuko niba bari kuduha ibi bikorwa bazaduha n’ibindi byinshi".

Umuyobozi wungirije w’Akarere ka Nyamasheke ushinzwe imibereho myiza, yasabye abaturage gukomeza kubungabunga Pariki ya Nyungwe kugira ngo bakomeze kubona ibyiza biva ku mafaranga yo mu bukerarugendo.

Umukozi wa RDB ushinzwe guhuza pariki n’abaturage bazituriye, Mbabazi Marie Louise, yavuze ko Abanyarwanda 80% bamaze kumva akamaro ka Pariki.

Ati "Mbere ntabwo bari bazi akamaro k’ibivamo, ariko nka ba rushimusi twagiye tubakorera amakoperative y’ubuvumvu bareka gukomeza kujya guhiga muri Nyungwe...Ubu abahoze ari ba rushimusi nibo bari kudufasha mu bukangurambaga bwo kwigisha bagenzi babo".

Nibura 10% by’amafaranga ava mu bukerarugendo niyo akoreshwa mu bikorwa biteza imbere abaturuye za pariki mu rwego rwo kubafasha kumenya akamaro kazo ngo barusheho kuzibungabunga.

Umwaka wa 2019, u Rwanda rwinjije miliyoni 500$ avuye mu bukerarugendo. Intego ni uko amafaranga ava mu bukerarugendo agomba kwiyongera akagera kuri miliyoni 800$ ku mwaka.

Muri gahunda yo gusaranganya amafaranga ava mu bukerarugendo abaturiye Pariki ya Nyungwe ku ruhande rw’Akarere ka Nyamasheke bamaze guhabwa ibikorwa bifite agaciro ka 523 231 220Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .