Nyamasheke: Bishyize hamwe biyemeza gutandukana n’imbaragasa bashyira sima mu nzu babamo

Yanditswe na Sitio Ndoli
Kuya 12 Kanama 2020 saa 04:25
Yasuwe :
0 0

Abaturage bo mu Murenge wa Cyato, babinyujije mu buryo bw’ikimina bari gufashanya gushyira sima mu nzu zabo, aho byageze bakaba bemeza ko baruhutse imbaragasa n’umukungugu.

Ubuyobozi bw’uyu murenge buvuga ko ari gikorwa cyatangiriye mu kagari kamwe ariko ubu kikaba bigeze no mu tundi tugari kandi ko bigomba gukomeza bikarenga isima bigakomeza no mu bindi bibazo byugarije abaturage.

Urugero nko mu kagari ka Murambi, mu Murenge wa Cyato, bishyize hamwe bakajya batanga igihumbi buri cyumweru ubundi bakagura sima n’umucanga bakayishyira mu nzu y’umwe mu banyamuryango, kugeza bose barangiye.

Nyiranshimiyimana Agnes ati “Wabonaga ari mu byondo bisa nabi ubundi rero twishyira hamwe turi abaturage 40, tukajya dutanga amafaranga igihumbi buri cyumweru tukagura sima, tukajya gushaka umucanga ubundi tugafatanya dukora umuganda dushyira sima mu nzu y’umuntu umwe.”

Mukarunga Laurencie yunzemo ati “Byaradufashije cyane kuko mbere twabaga dufite ivumbi mu nzu ndetse n’imbaragasa. Wabonaga bitameze neza none byarahavuye tumeze neza nta mbaragasa zirangwa mu nzu zacu ahubwo duhora dukoropa ubona ko hasa neza.”

Ni igikorwa batangiye mu mwaka wa 2019 ari abaturage 40 mu mudugudu, none bimaze kugera no mu tundi tugari tw’uyu murenge ku buryo abarenga ijana bamaze gushyira sima mu nzu.

Umunyamabanga Nshingwabikorwa w’Umurenge wa Cyato, Ndanga Janvier, avuga ko bitazagarukira ku gushyira sima mu nzu, ahubwo aba baturage biyemeje ko bazakomeza kurwanya ibibazo bibugarije biciye muri iyi gahunda ya ‘ndi urugero’.

Ati “Ni igikorwa kitagomba kurangira kuko cyageze no mu tundi tugari, ubu mu Murenge wose dufite ingo zirenga ijana zimaze kugeramo sima hasi mu nzu. Biyemeje kubikomeza, aho nibava kuri sima bazakomeza bakajya no gushyira mu nzu zabo umuriro w’amashanyarazi, irangi n’inzugi nziza, gukomeza gutyo.”

Si ubwa mbere aba baturage bishyira hamwe bagakora igikorwa cy’indashyikirwa kuko bigeze no kwiyubakira ibiro by’umurenge wabo wa Cyato.

Abatuye Cyato bishyize hamwe batanga amafaranga yo gufashanya mu gushyira sima mu nzu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .