Nyamasheke: Abafite ubumuga bw’ubugufi bukabije bishyize hamwe mu kurwanya ihohoterwa ribakorerwa

Yanditswe na Sitio Ndoli
Kuya 16 Ukuboza 2020 saa 09:16
Yasuwe :
0 0

Abafite ubumuga bw’ubugufi bukabije bo mu mirenge 15 igize Akarere ka Nyamasheke bihurije hamwe mu rwego rwo guhangana na bimwe mu bikorwa by’ihohoterwa bakorerwa no gushaka icyatuma babona ubushobozi bwo kwikorera bakiteza imbere.

Bagaragaza ko mu bikibabangamiye harimo amazina bitwa arimo abatesha agaciro, aho batuye n’aho bagenda.

Niyogushimwe Leah utuye mu Murenge wa Kirimbi muri Nyamasheke yavuze ko mu bagitotezwa n’ababafata uko batari.

Yagize ati “Imbogamizi tugira ni iz’abantu badutoteza, batubwira ngo turi bagufi baduca intege ngo nta kintu twashobora. Ababyeyi bakadufata uko tutari, bakatubwira ngo ntabwo tuziga uretse abandi bana. Nkanjye nagarukiye mu wa gatatu w’amashuri yisumbuye mu rugo banga kundihira.”

Nyirandungutse Béatrice wo mu Murenge wa Macuba yunzemo ati “Muri sosiyete dutuyemo biri kugenda bigabanuka, nk’ubu hari igihe uba uri kugenda, ukumva baravuze ngo ni ipine, dore kariya, ngo ni igikuri ibintu byinshi cyane. Twebwe tubona ari ihohoterwa dukorerwa.”

Uhagarariye Ihuriro ry’Abafite Ubumuga bw’Ubugufi bukabije ku rwego rw’igihugu, Buntubwimana Apolline, avuga ko batoye ababahagarariye kandi ko hari icyo bizabafasha mu mibereho yabo ya buri munsi.

Ati “Ni ukubanza kubashaka, imbogamizi twabonye nk’ahandi dukunda kujya ni uko babaseka bigatuma bitinya ndetse ntibaniyakire. Tubafashije gutora abahagarariye kugira ngo tuzabafashe kubakorera ubuvugizi.”

Abafite ubumuga bukabije bishimiye kuba batoye ababahagarariye bagizwe n’abantu batandatu bakemeza ko iri huriro rizabafasha kurwanya ihohoterwa bakorerwa aho batuye.

Nyirandungutse ati “Iri huriro rigiye kudufasha kwigirira icyizere, ntiduhere mu bwigunge ndetse rikadufasha kurwanya ihohoterwa dukorerwa n’abantu bakidufata nk’ibintu. Ubu twagiriwe icyizere; rizadufasha uko abantu badufataga ndetse tubereke ko ntacyo bidutwaye.”

Kuri ubu mu Karere ka Nyamasheke harabarurwa abafite ubumuga bw’ubugufi bukabije bagera kuri 33 ariko sibo bonyine ahubwo ngo hari n’abandi nuko hari bamwe mu babyeyi babahisha.

Ihuriro ryashyizweho ryijeje ko rizakomeza ubukangurambaga kugira ngo abantu bumve ko nabo ari nk’abandi kandi bashoboye.

Abafite ubumuga bw’ubugufi bukabije bishyize hamwe kugira ngo barwanye ihohoterwa bakorerwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .