00:00:00 IGIHE NETWORK KN KINYARWANDA EN ENGLISH FR FRANCAIS

Nyamagabe: Abaturage bambuye miliyoni 200 Frw ibitaro bya Kigeme

Yanditswe na Prudence Kwizera
Kuya 21 Ukwakira 2022 saa 10:26
Yasuwe :

Abaturage batandukanye bagannye ibitaro bya Kigeme mu Karere ka Nyamagabe bahabwa serivise z’ubuvuzi bagenda batishyuye kubera impamvu zitandukanye zirimo ubukene no kutagira ubwisungane mu kwivuza, babereyemo ideni ibi bitaro ry’asaga miliyoni 200 Frw.

Umuyobozi ushinzwe ibikorwa by’abaforomo n’ababyaza mu Bitaro bya Kigeme, Niyitanga Augustin, yavuze ko kuva mu 2015 kugeza ubu, abaturage bafitiye ideni ibyo bitaro ry’asaga miliyoni 200 Frw.

Ati “Hari abaza bakoze impanuka mu muhanda n’abaza barembye ku buryo nta kundi wabigenza. Uhereye mu 2015 ibitaro bibara arenga miliyoni 200 by’abagiye batishyuye kubera ubushobozi badafite kandi badafite ubwisungane mu kwivuza.”

Yasobanuye ko ibyo bigira ingaruka mbi kuri serivise batanga kuko hari ibikoresho batabasha kugura kubera ko batishyuwe.

Mu Murenge wa Cyanika mu Karere ka Nyamagabe haherutse kubera ubukangurambaga bwo gusaba abaturage kujya bitabira gutanga umusanzu w’ubwisungane mu kwivuza kugira ngo bajye babona serivise z’ubuzima bitabagoye.

Uwimpuhwe Marie Golette yavuze ko yamaze imyaka ibiri mu bitaro bya Kigeme arwaje umugabo, babura ubwishyu bw’asaga miliyoni imwe n’ibihumbi 390 Frw.

Yasobanuye ko byatewe no kutagira ubwisungane mu kwivuza bituma bagurisha imitungo ibashiraho kugira ngo bishyure ariko birangira basigayemo ideni.

Ati “Imitungo yadushizeho tubura ubwishyu kuko twamaze imyaka ibiri mu bitaro abana baba mu rugo bonyine. Isomo twakuyemo ni iryo kujya dutanga mituweli [ubwisungane mu kwivuza] hakiri kare.”

Yankurije Marie Françoise yajyanye umwana mu bitaro bya Kigeme kumuvuza, birangira yitabye Imana, abura ubwishyu kuko yatashye asize ideni ry’asaga ibihumbi 69 Frw, ibyangombwa bye barabisigarana.

Yavuze ko yabuze ubwishyu bitewe no kutagira ubwisungane mu kwivuza ariko yakuyemo isomo ryo kujya atanga umusanzu hakiri kare.

Umuyobozi w’Akarere ka Nyamagabe, Niyomwungeri Hildebrand, yavuze ko ayo mafaranga y’ideni agomba kwishyurwa n’abaturage bahawe serivise ariko ubuyobozi butabatererana.

Ati “Ariko abaturage ni ab’akarere, ni abacu. Hari igihe ibitaro bitwegera bikatwereka abaturage batabashije kwishyura noneho twe tukajya kureba amakuru yabo aho batuye, iyo dusanze badafite ubushobozi ariko bafite imbaraga tubafasha kubabonera akazi bakazabona uko bishyura.”

Yavuze ko kandi iyo habonetse umuterankunga ashobora kubafasha akabishyurira uko ubushobozi bungana.

Yasabye abaturage kwitabira gutanga umusanzu w’ubwisungane mu kwivuza kuko ari bwo batazajya bagorwa no kubona amafaranga yo kwivuza igihe barwaye.

Kugeze ubu Akarere ka Nyamagabe kageze ku kigero cya hafi 90% mu kwitabira gutanga umusanzu w’ubwisungane mu kwivuza w’uyu mwaka.

Abaturage bo mu Karere ka Nyamagabe bafitiye ideni Ibitaro bya Kigeme ry’arenga miliyoni 200 Frw
Umuyobozi w'Akarere ka Nyamagabe, Niyomwungeri Hildebrand, yavuze ko ayo mafaranga y’ideni agomba kwishyurwa n’abaturage bahawe serivise ariko ubuyobozi butabatererana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .