Nyagatare: Leta mu biganiro ku gutangiza uruganda rutunganya amata y’ifu

Yanditswe na Hakizimana Jean Paul
Kuya 26 Ugushyingo 2020 saa 09:59
Yasuwe :
0 0

Minisitiri w’Ubuhinzi n’Ubworozi Dr Mukeshimana Gerardine yatangaje ko leta iri mu biganiro n’uruganda Inyange Industries, ku buryo hakubakwa uruganda rutunganya amata y’ifu mu Karere ka Nyagatare, rwajya rwakira litiro ibihumbi 500 ku munsi.

Yabitangaje kuri uyu wa Gatatu ubwo yari mu Karere ka Nyagatare, mu nama mpuzabikorwa yagaragarijwemo uko aka Karere kesheje imihigo y’umwaka ushize, kanasinyana imihigo mishya n’Imirenge ndetse n’abafatanyabikorwa.

Minisitiri Mukeshimana yashimiye aborozi bo muri aka karere, avuga ko byagaragaye ko iyo babonye amasoko, n’umukamo wabo wiyongera, abasaba gukomereza aho bakongera umusaruro w’amata, kuko leta igiye kuberegereza uruganda ruyatunganya.

Ati “Hari ibiganiro bihari hagati ya Leta y’u Rwanda n’uruganda rw’Inyange, kugira ngo hano muri Nyagatare hajyeho uruganda rutunganya amata y’ifu, ruzajya rutunganya hafi litiro ibihumbi 500 ku munsi. Mukeneye kuzamura cyane ibipimo, aborozi mugomba kongera ibipimo by’umukamo kugira ngo muzabashe kuruhaza.”

Yavuze ko bakiri mu biganiro ari nako hanozwa umushinga neza, kuko bataramenya neza igihe uru ruganda rwaba rwatangiriye gukora.

Umuyobozi w’Akarere ka Nyagatare, Mushabe David Claudien, yavuze ko mu mwaka ushize bagize umusaruro mwinshi waruse abawuguraga, avuga ko uruganda rw’amata niruboneka, ruzatuma aborozi bongera umukamo kurushaho, runatange akazi.

Ati “Icya mbere ruje gutuma abantu bashobora kongera umusaruro kubera ko umukamo wabo uzaba ufite ahantu ushobora kuba wagurishwa, uruganda rw’amata ni ingenzi cyane, niruramuka rubonetse hazabaho kuzamura umujyi wacu, rutange akazi ndetse rugire n’akamaro ku borozi benshi.”

Kanzayire Jacqueline utuye mu Murenge wa Nyagatare, ukora umwuga w’ubuhinzi n’ubworozi ku buso bungana na hegitari enye, yavuze ko hari ubwo babona umukamo mwinshi bakabura aho bagurisha amata, bamwe akabapfana.

Ati “Uruganda niruza ruzongerera agaciro umukamo wacu, umukamo uraboneka ariko hari ubwo uruganda tugemuraho rutayafata yose kubera impamvu runaka, ariko dufite uruganda ruyahinduramo ifu, nta mata yazongera kubura aho ajya cyangwa ngo abure aho agemurwa.”

Hodari Hirari we yavuze ko mu gihe cy’imvura usanga umukamo wariyongereye cyane, ku buryo kubona isoko biba bitoroshye. Ngo iyo aborozi babuze isoko ni nako bacika intege, ariko ngo uru ruganda niruza bizatuma benshi bongera umukamo.

Kugeza ubu mu Karere ka Nyagatare haboneka umukamo ungana na litiro ibihumbi 100 ku munsi, benshi mu baturage bakavuga ko amasoko babona adatwara amata yose bikabaviramo kugira amata menshi abapfiraho.

Rimwe mu masoko bari babonye harimo kugemura amata ku mashuri y’inshuke, ariko nayo amaze amezi menshi afunzwe kubera icyorezo cya Coronavirus.

Minisitiri Mukeshimana yijeje aborozi ko bashobora kwegerezwa uruganda rutunganya amata y'ifu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .