Nyabugogo: Amashimwe ku banyeshuri boroherejwe kubona imodoka mu itangira ry’amashuri

Yanditswe na Thamimu Hakizimana
Kuya 4 Mutarama 2020 saa 11:19
Yasuwe :
0 0

Abanyeshuri bagiye gutangira amashuri mu bice bitandukanye by’Intara z’Igihugu, baravugako bishimiye kuba nta kibazo cyo kubura imodoka bigeze bagirira muri Gare ya Nyabugogo nk’uko byari bisanzwe bigenda.

Kuri uyu wa Gtanu tariki ya 3 Mutarama 2020, nibwo abanyeshuri bo mu Ntara y’Amajyepfo n’iy’Iburengerazuba batangiye kujya ku bigo bazigamo.

Aba banyeshuri bazatangira amasomo yabo ku tariki 6 Mutarama 2020, babwiye IGIHE, ko bishimiye ko batigeze bahura n’ikibazo cyo kubura imodoka zibatwara.

Bashimangira ko ari bwo bwa mbere umwaka w’amashuri utangiye ntibahure n’ikibazo cyo kubura imodoka ndetse bagasaba inzego zibishinzwe ko zajya zibafasha nk’uko zabigenje kuri iyi nshuro.

Muhire Innocent, wiga mu Karere ka Nyanza yagize ati “Rwose nta modoka twabuze kandi n’ibintu twishimiye cyane kuko nibwo bwa mbere umwaka w’amashuri utangiye imodoka ntizibe ikibazo muri iyi Gare ya Nyabugogo.”

Maniriho Kevin, wiga mu mwaka wa Kabiri i Kabgayi mu Karere ka Muhanga, yagize ati “Nkiza bahise bankatira itike ubu ndagenda saa sita bitandukanye na mbere kubera ko umuntu yarazaga agasanga hari umubyigano no kubona imodoka bikaba ikibazo cyane kubera ubwinshi bw’abantu.”

Byukusenge Alice ufite umwana wiga mu Karere ka Rusizi, nawe avuga ko yishimiye kuba umwana we yagendeye ku gihe.

Ati “Nk’ababyeyi natwe byadushimishije kuza tugahita tubona abana bacu bahawe imodoka ntabyo gutegereza nko mu bihe bya mbere kuko ubu bari kuza ntibibasabe kujya ku murongo nka mbere.”

Yakomeje ashima inzego zose zatumye ikibazo cy’ibura ry’imodoka cyakundaga kugaragara mu itangira ry’amashuri gikemuka .

Ushinzwe ibikorwa muri kompanyi itwara abantu ya Horizon Express, Mihigo Olivier, we yemeza ko impamvu nta banyeshuri babuze imodoka zibatwara ku bigo bigamo byatewe n’uko kompanyi zose zitwara abagenzi zari zizi neza igihe amashuri azatangirira.

Ati “Byatewe n’uko twari twiteguye abanyeshuri kuko twari tuzi igihe amashuri azatangirira ku buryo abari kuza ntabwo bari gusabwa gutonda umurongo bari guhita binjira bagakatirwa itike bakagenda.”

Iki kibazo cy’ibura ry’imodoka zitwara abanyeshuri mu bigo bigamo gikemutse nyuma y’aho ku tariki ya 24 Ukuboza 2019, RURA yagiranye ibiganiro n’abayobozi ba kompanyi zitwara abagenzi ibasaba kuzakoresha uko bashoboye kugira ngo hatazagira abanyeshuri bazabura imodoka mu gihe cy’itangira ry’amashuri.

Abanyeshuri bishimiye ko ikibazo cy'imodoka zibatwara ku bigo bigamo cyakemutse
Abanyeshuri bishimiye ko imodoka zibatwara ku bigo by'amashuri zabonetse
Ushinzwe ibikorwa muri kompanyi itwara abantu ya Horizon, Mihigo Olivier avuga ko bakoze ibishoboka byose imodoka zikaboneka muri iki gihe cy'abanyeshuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .