00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Uko igikoni cy’Umudugudu kiri kwifashishwa mu kurandura imirire mibi yazahaje aka karere

Yanditswe na Hakizimana Jean Paul
Kuya 21 May 2022 saa 09:03
Yasuwe :

Ababyeyi bo mu Karere ka Nyabihu baravuga ko bamenye agaciro k’igikoni cy’Umudugudu mu kurwanya imirire mibi yugarije abakiri bato bo muri aka Karere nyuma yo kwigirayo byinshi byafashije abana babo.

Akarere ka Nyabihu ni kamwe mu turere tugaragaramo igwingira riri hejuru cyane, ubushakashatsi buheruka gukorwa bwa DHS mu mwaka wa 2020 bugaragaza ko aka Karere gafite abana bagwingiye bangana na 46,7%.

Ibi byatumye bashakisha impamvu zituma abana babo bagwingira cyane basanga bimwe mu bibitera harimo amakimbirane yo mu miryango, ubusinzi ndetse no kutamenya gutegura indyo yuzuye ku babyeyi kuko aka Karere gakungahaye cyane ku birayi, imboga n’imbuto.

Nyuma yo kubona iki kibazo bahise bashyira imbaraga mu kwigishiriza ababyeyi benshi ku bigo mboneza mikurire abandi bayoboka igikoni cy’Umudugudu kugira ngo babashe kwigisha ababyeyi benshi gutegura indyo yuzuye.

Uwizeye Esperance utuye mu Mudugudu wa Vunga mu Kagari ka Mpinga mu Murenge wa Shyira, avuga ko impamvu bahisemo gukoresha igikoni cy’Umudugudu mu kurandura imirire mibi ari uko bashakaga kujya bigishiriza ababyeyi benshi icyarimwe ndetse no kubafashiriza hamwe.

Ati “ Dufata inkono imwe tugashyiramo ibitera imbaraga, ibirinda indwara n’ibyubaka umubiri tukabiteka mu isafuriya imwe tukabivangavanga tukabinombanomba ku buryo abana batabivangura ubundi tukazana ba bana tukabagaburira.”

Uwizeye avuga ku gikoni cy’Umudugudu hahurira ababyeyi bafite abana bari munsi y’imyaka itanu, buri munsi ngo babatekere indyo yuzuye ariko nibura rimwe mu kwezi ngo bafata ba bana bakabapima ndetse bakanaboneraho kwigisha ababyeyi babo uko bateka indyo yuzuye.

Uwurukundo Aisha utuye mu Mudugudu wa Mukaka mu Kagari ka Mpinga mu Murenge wa Shyira avuga ko imwe mu mpamvu zituma ababyeyi benshi bagira abana bafite imirire mibi bituruka ku kwikomeza bakumva ko bazi gutegura indyo yuzuye nyamara nta n’ubumenyi babifiteho.

Yakomeje agira ati “ Nkanjye ntaraza hano ku gikoni cy’Umudugudu, isaha ku isaha numvaga ko ngomba guteka ibijumba n’ibishyimbo cyangwa ibirayi n’igitoki nkumva birahagije ariko hano banyeretse ko imboga ari ngombwa, karoti, indagara n’ibindi bimufasha.”

Uwurukundo yavuze ko ababyeyi benshi badakurikirana imikurire y’abana babo ngo iyo bafite abakozi baba bumva bihagije kugira ngo babarerere neza.

Umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal, avuga ko imwe mu mpamvu zituma Akarere kabo kakigaragaramo igwingira rikiri hejuru cyane ngo biterwa n’ababyeyi batarumva neza ikibazo cy’igwingira.

Yavuze ko mu Karere ka Nyabihu hari gahunda batangiye yo guhuza ababyeyi bagaragara mu mirire mibi n’amadini basengeramo aho iryo dini ribafasha mu gukurikirana ba bana, ibi ngo biza byiyongera ku gikoni cy’Umudugudu bashyizemo imbaraga mu gutuma cyitabirwa n’ababyeyi benshi.

Ati “ Igikoni cy’Umudugudu ni nk’ishuri ryigisha guteka, iryo shuri rero hari abantu batazi icyo bakora ngo umwana bamuhe indyo yuzuye, igikoni cy’umudugudu rero habayo uko abo bantu babafasha mu kubigisha ibyo baha abana babo ku buryo iyo umubyeyi ageze mu rugo nawe abikora bikagabanya imirire mibi.”

Kuri ubu Akarere ka Nyabihu gafite abana 49 bagaragara mu mirire mibi barimo 11 bari mu mutuku na 38 bari mu muhondo. Aka karere gafite ingo mbonezamikurire 1130 zigamo abana ibihumbi 38.

Uwizeye Esperance avuga ko kuri ubu igikoni cy'Umudugudu kimaze gufasha ababyeyi benshi kumenya guteka indyo yuzuye
Uwurukundo Aisha avuga ko umwana we yagaragaye mu mirire mibi kubera kwiyumva ko azi guteka neza nyamara atabizi
Umuyobozi w'Akarere ka Nyabihu wungirije ushinzwe imibereho myiza y'abaturage, Simpenzwe Pacal avuga ko igikoni cy'Umudugudu kiri gufasha ababyeyi benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .