00:00:00 IGIHE NETWORK KN KINYARWANDA EN ENGLISH FR FRANCAIS

Nyabihu: Abantu babiri bafatanywe udupfunyika 2000 tw’urumogi

Yanditswe na IGIHE
Kuya 23 May 2022 saa 08:36
Yasuwe :

Polisi y’u Rwanda yatangaje ko ku wa Gatandatu yafatiye mu Karere ka Nyabihu abantu babiri, bari batwaye udupfunyika ibihumbi bibiri tw’urumogi mu modoka rusange yavaga ku Mukamira yerekeza mu Karere ka Ngororero.

Umuvugizi wa Polisi mu Ntara y’Iburengerazuba, SP Bonaventure Twizere Karekezi, yavuze ko abafashwe ari umugore w’imyaka 20 n’umuhungu wa 26.

Yagize ati "Aba bombi bafashwe ahagana saa kumi z’umugoroba, ubwo abapolisi bahagarikaga imodoka mu mudugudu wa Ryabasenge, mu gusaka imizigo abagenzi bari batwaye baza kubona umufuka wari urimo ibirayi ahagana munsi harimo ishashi irimo udupfunyika babwiye nyir’umuzigo ngo asuke hasi ibirayi basanga yari yabanje hasi ishashi irimo udupfunyika tw’urumogi ,ahita atabwa muri yombi."

Uwo musore yahise avuga ko urwo rumogi ari urw’umugore bari kumwe mu modoka, baruhawe n’umugabo we babana mu Murenge wa Kanama mu Karere ka Rubavu, ari naho bari baturutse.

Ngo yari arushyiriye abakiliya be bo mu Karere ka Ruhango, akaba yari buhembwe ibihumbi 20 Frw nyuma yo kurugurisha.

Abafashwe n’ibyo bafatanwe bashyikirijwe Urwego rw’Ubugenzacyaha (RIB) rukorera kuri Sitasiyo ya Jomba ngo hakomeze iperereza mu gihe hagishakishwa uwari warubahaye ngo nawe afatwe.

SP Karekezi yaburiye abakomeje kwishora mu gukwirakwiza ibiyobyabwenge, ko batazihanganirwa, abasaba kubireka bagashaka indi mirimo bakora yemewe kuko amayeri menshi bakoresha yamaze gutahurwa.

Iteka rya minisitiri ryo mu 2019 rigena urutonde rw’ibiyobyabwenge n’ibyiciro byabyo rishyira urumogi mu biyobyabwenge bihambaye.

Ni mu gihe amategeko y’u Rwanda agena ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha.

Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20 Frw, ariko atarenze miliyoni 30 Frw ku byerekeye ibiyobyabwenge bihambaye birimo urumogi.

Abafatanywe urumogi bashyikirijwe RIB

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .